1 တဲး အေ ဒါင် ဂုင် ဂေဇူ ဒီ ဇဝ်ဖြာ။ တဲး အေ ဆာခိုဝ် ဒီ အန် ဇဝ်။ တဲး အေ ဘော ကာလာင် ဘျ ဒီ ဒူအီ ဟဝ် လွင် ပဲ့ ဟဲ့ ဘူင် အန် ဇဝ်၊ တဲး ဒူအီ ဘောကာဂ့လျီတ် နပ် လွင် အန် တီ။

2 တဲး အေ တဝ်း မှုဝ် အီ အိူပ် ဇဝ်ဖြာ။ တဲး အေ လှုဝ်း ဒွန် မျုဝ် ပဲ့ ဟဲ့ ဘူင် အန် ဇဝ် အီ မွှိုမ် အာမ်။

3 ကူပ် မုး အေ ဒူအီ ပီ အိုပ် အန် ဇဝ်၊ တဲး အေ ဘော ခူယ်။ တဲး ဂေ အီ ကြိုပ် အန် ဇဝ် ဘော ဘျုဝ် ဒါခိုယ်။

4 တဲး အေ ဘော ဘိုင် ဇဝ်ဖြာ၊ တဲး အေ ဘိုင် ပွုန် အန်။ တဲး အေ ဘော ကြိုပ် ဆာခိုဝ် ဒီ အန် ဆေဆေ။

5 တဲး အေ လှုဝ်း ပဲ့ ဟဲ့ ဘူင် အန် ဇဝ် အီ မွှိုမ် အာမ် ကာဆဝ်။ တဲး အေ လှုဝ်း ဘော ပဲ့ ဟဲ့ ဒမ် အန် ဇဝ် ဒီ အီ။

6 ဒါ အာဘြာဟမ် ဟဲ့ မုး ဒဲစေန့် ဇဝ်ဖြာ။ ဘော ဒါ အာကူပ် ဟဲ့ မုး ဒူအီ ပီ ရဝ်း ဇဝ်ဖြာ။ ဘေ အီ မုး လှုက်လှာန် ဂါယ်၊ တဲး ဘေ လှုဝ်း လွင် ဇဝ်ဖြာ။

7 အန် ဇဝ် ဘော မုး ဇဝ်ဖြာ ပီ ကြိုပ် အေ။ ပီ ကာလာင် အန် ဇဝ် ဘော ပီ ဒမ် အုန် အန်၊ အေ ဒူအီ အီ ကွယ် ဒဲင် ကာဒါယ် ဘောကာဂ့လျီတ် လုဝ် ဒူပ်။

8 အန် ဇဝ် ဘော လှုဝ်း ဆေဆေ ကာဒိက် ဆတ်ဇာ ပီ ဒွိုမ် ကာဆဲန့် အန် ဒီ အေ။ အန် မိူဝ် တူ ပိဝ် ဒါရာ ပီ ဒမ် အုန် အန် ကော ဇမ် အူ ဟြဲန့် စုဝ်။

9 အန် ဇဝ် ဘော ဘူင် ဒူပ် ပီ ကာဆဲန့် အန် ဒီ ဒါ အာဘြာဟမ် တွိုန်။ အန် ဘော လှုဝ်း ပီ ကာဆဲန့် အန် ဒီ အာဆဲက်။

10 အန် ဝီ ကာလာင် အုန် လွင် အန် တီ ဒီ အာကူပ်၊ တဲး န့ ဘော ဘဲန် ဒါရာ အီ ကွယ် ဆေဆေ ခဲင် မိူင် အီဆာရေလ။

11 အန် ဇဝ် ဟဲ့ တဝ်း၊ “အုဝ် ဒီ ဒိုဝ်း မိူင် ကာနန့် တွိုန်၊ တဲး န့ ဝီ ဘဲန် ခါဂုန် ပီ ဒွါ အုဝ် ဒီ ဘေ၊ တဲး ဘေ လာယ် ပ့လု ဟာဝ် ဆေဆေ။”

12 ဂေ ဒူအီ ပီ အိုပ် ဇဝ်ဖြာ ဒေါ ဆီ ပြေတ့် ကာဆဝ် ဂေ၊ ဂေ ဟဲ့ ပီ ခဲတ့် တး ကွယ် ခဲင် မိူင် ကာနန့်။

13 ဂေ ဘော လုဝ် ဟာဝ် ဝိဝ် ဟာဝ် ဝေန့်။ ဟဲ့ ဇမ် အူ မိူင်၊ ပီ ဝီ လုဝ် ဟာဝ် ပေါ အူ မိူင်။ ဂေ ဟဲ့ တး ဒီ ဒူအီ အူ မျုဝ်၊ ပီ ဝီ လုဝ် ဟာဝ် ဒီ ဒူအီ ပေါ အူ မျုဝ်။

14 မာလဲ၊ ဇဝ်ဖြာ တူ တဲး အီ ဟဝ် ခါနှာပ် ဂေ။ အန် ဇဝ် ဘော မာနုဝ် ခုန်ဒီခမ် ဘဲန် ကာဒင် ဘဲန် ကာဒင် တဝ်း၊

15 “အာဝ် ပွိုန် ဘ့လတ့်၊ အာဝ် ပွိုန် ပျာတ့် အီ မုး ဒူအီ ပီ ရဝ်း အုဝ်။ အာဝ် ပွိုန် ဘူင် နာ စီစိဝ် ဒီ ဂေ ဒူအီ အီ ဘျာန် ဂြုဝ်း အုဝ်။”

16 ဇဝ်ဖြာ ဘော ဘူင် တဲး ဂေ ဒူအီ ခဲင် မိူင် တီ အေတ့် ပီ ဒီ ဟူမ်။ ခဲ့ ကွယ် ပီ ဒီ ဟူမ် ဒွန် မျုဝ်၊ အန် တဲး န့ စှိုမ် တူတ့်။

17 န့ ယီ မုး အာယုဝ်။ အီကတ် အန် ဟဲ့ ဒွိုမ် ယွင့် အန်၊ တဲး အန် ဘဲန် မှာယ် အီ ဟဝ်။ ဇဝ်ဖြာ ယီ ဟဲ့ ရဝ်း အန်။

18 ဂေ ဟဲ့ ပက် ဝန် ဟိန် ဒီ ပ့လဝ် အန်၊ တဲး န့ ကော ဒိမ်။ ဘော ဒီ မဲင် အန် ဂေ ဟဲ့ ကာစှိုပ် ဟိန်။

19 ဟဲ့ ဟွတ့်၊ န့ ဝီ ဘဲန် ပဲ့ ဟဲ့ ဒွိုမ် ကာလာင် အန်။ န့ ဘော လိုဝ်း ဆီချာ လွင် ဇဝ်ဖြာ ဟဲ့ ကာလာင် ဂြုဝ်း ဒီ အန်။ ဂေ မိူဝ် ဟဲ့ နပ်၊ ဂြုဝ်း ပဲ့ ဟဲ့ ကာလာင် အန် ဟဲ့ မှာန်။

20 ခုန်ဒီခမ် အီ အိုပ် မိူင် အဲဂိုပ် ဘော ခ့ဝါင် တဲး အန် လေး ခဲင် ကာပိုမ်။ ခုန်ဒီခမ် အီ အိုပ် ဂေ ဒူအီ ဘဲန် မျုဝ် ဘဲန် မျုဝ်၊ အန် ဘော ဘ့လေး အာယုဝ် တဲး အန် ကွယ် ဒါခိုယ်။

21 ခုန်ဒီခမ် ဘော ဝီ တဲး အန် ဘဲန် ဒါ အီ အိုပ် ခဲင် ဟုဝ်၊ တဲး အန် အိုပ် တူတ့် ဘော ကြုဝ်ကြာမ် ခုန်ဒီခမ် ဒွန် မျုဝ်။

22 ခုန်ဒီခမ် ဘော ခ့ဝါင် အန် စ်ု ဂေ ဂွန် ခုန်ဒီခမ် ခဲ့ ပီ အိုင် အန်၊ တဲး အန် မာနုဝ် အာကျာမ် အာငျာန် အန် ဘော ဒီ ဂေ အာမူ အာမာတ် ခုန်ဒီခမ်။

23 ဒေါ အန် တီ အာကူပ် ဘော ဟာဝ် ခဲင် မိူင် အဲဂိုပ်၊ ဘော ဟာဝ် ကွယ် ခဲင် မိူင် တီ။

24 ဇဝ်ဖြာ ဘော ဘူင် တဲး ဂေ ဒူအီ အန် ဝီ ဘြဲ ကိူန်၊ တဲး ဂေ ဘော မိုဝ်း ပ့လူမ် မိုဝ်း ဟဲန့် လွှိုမ် ရန်ဆူ ဂေ။

25 အန် ဇဝ် ဘော တဲး ဂေ ဒူအီ အဲဂိုပ် ဝီ ဇွင့် ဂေ ဒူအီ အာမျုဝ် အန်။ တဲး ဂေ ပီလွှက့် ဒီ ဂေ ဒဲစေန့် အန်။

26 ဒေါ အန် တီ ဇဝ်ဖြာ ဝီ စ်ု ဒဲစေန့် အန် အီ စိူဝ် အာမုဝ်ဆဲ ဂါယ် အာရူန်၊ အီ မုး ဒူအီ ပီ ရဝ်း အန်၊ တဲး ဂါယ် ဟာဝ် ဒူင် ကွယ် ခုန်ဒီခမ်။

27 ဂါယ် အာ ဝီ တီ ဘော ဘျ တဲး အီ ယိုဝ် ခဲ့ တာင် အာဖုင် ဒင်ခုဝ် ဇဝ်ဖြာ။ ဂါယ် ဘော ဘူင် ဘဲန် မျုဝ် ဘဲန် မျုဝ် အီ မွှိုမ် အာမ် ခဲင် မိူင် အဲဂိုပ်။

28 ဇဝ်ဖြာ ဘော ဘူင် တဲး န့ အပ် ဝွင့် ခဲင် မိူင် ဂေ။ မာလဲ၊ ဂေ ဒူအီ အဲဂိုပ် တူ ထူမ် ဂြုဝ်း ဇဝ်ဖြာ၊ ဝီ ဘူင် ကာဘး ဒီ ဇဝ်ဖြာ။

29 အန် ဇဝ် ဘော ဘူင်၊ တဲး အိုမ် ဝီ ဘဲန် နှာမ်၊ တဲး ဘော မာဂါ ဘောကာဂ့လျီတ် ယမ်။

30 ခဲင် မိူင် ဂေ တီ ဘော မိုဝ်း မာရုဝ့် ကိူန် တး၊ ဘော ကွယ် ဒွန် နာ ဒွန် ပ့လုဝ့်။ ဘော ခဲင် အိတ် ခုန်ဒီခမ် ဟဲ့ မိုဝ်း မာရုဝ့်။

31 ဇဝ်ဖြာ ဘော တဝ်း၊ တဲး မာရွယ် တး ကိူန် ခဲင် မိူင် ဘော မိူင်။ အန် စ်ု ဘော မာကာမုတ် တး ဘဲန် ဖိုင် ဘဲန် ဖိုင်။

32 ဇဝ်ဖြာ ဘော ဘူင် တဲး ဂ့လာယ် စုဝ်း ဘဲန် ဘျြီ။ အန် ဘော တဲး န့ မိုဝ်း ပ့လ မ့ပ့လေတ့် ဝီ ဘဲန် ငဝ် စုဝ်း ဘဲန် ပ့လုဝ့် ဘဲန် ပ့လုဝ့်။

33 ဇဝ်ဖြာ ဘော ဘူင် တဲး ဟေ မာငုန် ဘော ဟေ ဒီပူ ကာဘက် ကေး။ အန် ဘော တဲး ဘော ဟေ ဘဲန် မျုဝ် ဘဲန် မျုဝ် လိုဝ် စှိုမ် တူတ့်။

34 ဇဝ်ဖြာ ပီ ဝီ စ်ု မာ အာဇူင့် ကိူန် ကာဆဝ် တး ခဲင် မိူင် ဂေ တီ။ အန် တဲး ဘော မာ အာမူင့် ကိူန် တး ကော ဟူ နပ် ဒီ တိး။

35 ခဲ့ ပီ ဆမ် ဂေ ခဲင် မိူင်၊ မာဝ ဂေ တီ ဟဲ့ ဟူမ် တူတ့် ဒွန် မျုဝ်။ ဘော ဒဝ် ဘော ငှုဝ် ဘော ကာယူင့် ငှုဝ် ဟဲ့ ဟူမ် တူတ့်။

36 ပန် တီ ဇဝ်ဖြာ ဘော တဲး ဂွန် ဂိန့် ဂေ ဒူအီ အဲဂိုပ် ယမ် တူတ့် ဒွန် အီ။ န့ မုး ဂွန် ဂေ အီ ဆီ မိုဝ်း ပ့လူမ်၊ အီ ညှမ် ကတ်၊ ဂေ ဟဲ့ စှိုမ်။

37 ဟဲ့ ဟွတ့်၊ ဇဝ်ဖြာ ဘော တဲး ဂေ ဒူအီ အီဆာရေလ လေး ခဲင် မိူင် တီ၊ တဲး ဂေ ဘော ဒိုဝ်း ဘော ရွိုန် ဘော ခြိဝ် ဂေ ဒူအီ အဲဂိုပ် ဟာဝ် ဒူပ်။ ဂေ ဒူအီ ပီ အိုပ် ဇဝ်ဖြာ၊ အာဝ် မိုဝ်း အီ စှိုမ်။ ဂေ ပ့လူမ် ခ ဒွန် အီ။

38 ဒေါ လေး ဟာဝ် ဂေ တီ၊ ဂေ ဒူအီ အဲဂိုပ် ဘော ခူယ် ကာဆဝ် ကူပ် ဟဲ့ ယုဝ် ကာဆဝ် ဂေ။

39 ဇဝ်ဖြာ ဘော တဲး န့အု တပ် နာ ဒဲင် ဂေ ဒူအီ အီဆာရေလ၊ တဲး န့ ဘော ဘ့လာင် ဒီ ဂေ ခဲင် မှိုဝ်။

40 ဂေ ဘော မှာန့် ဒီ ဇဝ်ဖြာ၊ ဇဝ်ဖြာ ဘော ဒွါ မာ အာဘြူင့် ဒီ ဂေ။ အန် ဒွါ ဘော ခါမုန် အီ လေး ခဲင် ဂါင်ဟြာဝ် ဒီ ဂေ၊ တဲး ဂေ ပွိုန် ဒီ ဟူမ် ဖဲ ဒွန် အီ။

41 ဇဝ်ဖြာ ဘော ဘူင် တဲး န့ မိုဝ်း အိုမ် တုဝ်း ဒီ မာဝ်၊ တဲး အိုမ် တီ လှဲ ဟာဝ် ဒူင် ကာဟဝ်း။ တဲး န့ ပီ အိုမ် ဘ့လဲင် တာင်။

42 ခုဝ်၊ ဇဝ်ဖြာ ဟဲ့ လှုဝ်း ကာဒိက် ဆတ်ဇာ ပီ ဒွိုမ် ဒွါ အန် ဒီ ဒဲစေန့် အန် အီ မုး ဒါ အာဘြာဟမ် တွိုန်။

43 ဇဝ်ဖြာ ဟဲ့ ဟွတ့် ဘူင် ပါယ် တီ၊ အန် ဘော ယဲတ့် ဂေ ဒူအီ ပီ အိုပ် ပီ ရဝ်း အန်၊ တဲး ဂေ ဟာဝ် ဒါခိုယ် ဘော တဝ်း မှုဝ်။

44 ဇဝ်ဖြာ ဘော ဒိုဝ်း မိူင် ဒူအီ အာမျုဝ် ဟဝ်၊ ဝီ အာပ် တဲး ဂေ ကွယ်။ ဂေ ဘော ပွိုန် ကြုဝ်ကြာမ် အီ ဟဝ်၊ တဲး န့ ဝီ ဘဲန် ခါဂုန် ဂေ။

45 ဇဝ်ဖြာ ဟဲ့ ဘူင် ဇိုဝ် တီ တူတ့် ဒွန် မျုဝ်၊ တဲး ဂေ ဘော ထူမ် ဂြုဝ်း ပီ ကာလာင် အန် ဒီ ဂေ၊ တဲး ဂေ ဘော ဒူပ် ဒါရာ အန်။ ခုဝ် အန် တီ တဲး အေ အိူပ် ဇဝ်ဖြာ။