1 အုဝ် အိူပ် ဇဝ်ဖြာ ခဲင် နဝ်း ဖွိုမ် အုဝ်။ အန် မုး ဇဝ်ဖြာ အီ ဘွတ် ကာဆဝ် ပီ ကြိုပ် အုဝ်။ အန် ဇဝ် ဘော မိုဝ်း အာဖုင် ဒင်ခုဝ် တာင်။

2 အန် ဇဝ် ဘော တဲး ဘ့လာင် ကွယ် ရူပ် အန်၊ တဲး န့ ပီ ဒူအီ စှိုပ် ခြိုင်။ အန် ဇဝ် ဟဲ့ ဘူင် တဲး န့ မိုဝ်း ဂါင်ဟြာဝ်၊ တဲး န့ ပီ ထိုပ် တာင်။

3 အန် ဇဝ် ဟဲ့ ဘူင် ဒူင် ကွယ် အန် တဲး မာနက် အန် ကွယ် ခဲင် အိုမ် အီ ကွယ် နာ ဒဲင် ဘ့လေန့်။ အန် ဇဝ် ဘော ပဝ့် န့အု၊ တဲး န့ ဘဲန် လက်လဝ် အန်။ အန် ဘော တဲး ခုန် ဒိုဝ်း ဝိဝ် ဒိုဝ်း ဝေန့် အန်။

4 ခုန် ဘော ဘဲန် အာမူ အာမာတ် ပီ စ်ု အန် ဇဝ်။ ပ့လဲ့ ငဝ် ဘော ဘဲန် ဒဲစေန့် အန် ဇဝ်။

5 ဇဝ်ဖြာ ဟဲ့ ဘ့လေး ကာဒါယ် တဲး န့ ကွယ် ဆီချာ ဆေဆေ ဒဲင် စေန့် အန်၊ ကွဲ့ တဲး န့ နပ် ဒီ ရ်ု။

6 မဲ ဇဝ် ဟဲ့ တဲး အိုမ် မ့ပုန် တူတ့် ကာဒါယ်၊ တဲး န့ ပီ အီ တာ ခြိုင်။ အိုမ် တီ ဘော မ့ပုန် နွန် ဒွန် နွန်။

7 ဟဲ့ ဟွတ့် ဇဝ်ဖြာ ဝီ စ်ု အိုမ်၊ တဲး န့ ဟြာယ်။ န့ ဘော လှဲ ဟာဝ် ခြန် ခြန် ဒေါ ဟဲ့ ယိုဝ် အိုမ် ဟမ် ကာနမ်။

8 အိုမ် တီ ဘော ဟာဝ် ဒဲင် နွန်၊ ဝီ လူင် ဒူပ် ဒီလယ့်၊ တဲး န့ ကော ဝီ ဇမ် ဒူင် ပီ ဘူင် ဘ့လေး မဲ ဇဝ် အာဒါ အိုမ် တီ။

9 မဲ ဇဝ် ဟဲ့ ဘူင် တဲး န့ မိုဝ်း ခူပ်၊ မိုဝ်း ကာအုန်၊ ကွဲ့ တဲး အိုမ် ဝီ မ့ပုန် ကာဒါယ် ပေါ အူ ဇေန့်။

10 ဇဝ်ဖြာ ဟဲ့ ဘူင် တဲး အိုမ် တုဝ်း ဒွန် ဘ့လဲင် ဒွန် ဒီလယ့်။ န့ ဘော လှဲ ဟာဝ် ကာတဲ နွန် ဒွန် ပ့လုဝ့်။

11 ပါယ် တီ အန် တဲး ဒုဝ် ဆတ်ဒါဝါ အီ ကွယ် ဒဲင် ကာဒါယ် ပွိုန် ဒီ ဒျီင်၊ တဲး ဘော မာလာ ခဲင် ပြဲ ပွိုန် ဒီ ဒျီင် ဖဲ။

12 မာဆိမ် ခဲင် ဘ့လေန့် ဘော တး ကွယ် ခူပ် အိုမ် တီ၊ ဂေ ဘော ဟမ် ကွယ် ဒဲင် ရာ ဟေ။

13 ဇဝ်ဖြာ အီ ကွယ် ဒူင် စာ၊ အန် ဒိုဝ်း အိုမ် တီ၊ ရိုက် နွန် ဒွန် ပ့လုဝ့်။ ကူပ် ပီ ဘူင် အန် ဇဝ် တီ၊ ဒဲင် ကာဒါယ် န့ ဒါခိုယ်။

14 ဇဝ်ဖြာ ဘော တဲး ပေတ့် လတ့်၊ တဲး န့ ဘဲန် ပီ ဒီ ဟူမ် ဒုဝ် ဆတ်ဒါဝါ။ အန် တဲး န့ လတ့် ဘဲန် မျုဝ် ဘဲန် မျုဝ်၊ တဲး န့ ဘဲန် ပီ ဒီ ဟူမ် ဒူအီ အီ ကွယ် ဒဲင် ကာဒါယ် နီ။

15 အန် တဲး န့ မိုဝ်း ဘော အိုမ် မာငုန် အီ တဲး နဝ်း ဒူအီ ဒါခိုယ်၊ ဘော နာမန် အီ တဲး နာ ဒူအီ ကာလ၊ ဘော ပီ ဒီ ဟူမ် အီ ဘဲန် ပ့လူမ် ဘဲန် ဟဲန့်၊ တဲး နဝ်း ဒူအီ ဒါခိုယ်။

16 ခဲ့ ကွယ် ဟေ ပီ ဆမ် ဇဝ်ဖြာ ဘော ဟေ အာရိတ် အီ ကွယ် ဒီ နွန် လေဘာနုန်၊ ဂေ ဟဲ့ ဖဲ အိုမ် ဆေဆေ။

17 ခဲ့ ကွယ် မာဆိမ်၊ ဂေ ဘော တး ဘူင် ကာဟုန် ဂေ။ ခဲ့ ကွယ် မာဆိမ် နုဝ်ကျာင်၊ ဂေ ဘော တး အိတ် ဒီ ဟေ န့ကေ ဒီ တီ။

18 နွန် ဘူင့် အီ စာ ဘော ဘဲန် ဒူင် ကွယ် မင်ဂျီး။ ဒါအာင် မာဝ် ဘော ဘဲန် ဒူင် ချြီင် မာယုန် ပြဲ။

19 ဇဝ်ဖြာ ဘော ဘူင် မာဂျီန်၊ တဲး ဒူအီ နပ် အာခြာဝ် အန်။ ဘော ဆီငဲ ဟဲ့ နပ် ပန် ဒီ ဂေတ့် အန်။

20 မဲ ဇဝ်ဖြာ ဘော ဘူင် ခဲင် မှိုဝ်၊ တဲး န့ အပ် ဝွင့်၊ တဲး မာဒုဝ် ပြဲ ပွိုန် ဒီ လေး လဲ။

21 ဘော မာခြင်ဆီ နှိုမ် ဘော ဟမ်၊ ဟြေတ့် ပီ ဒီ ဟူမ် ပီ ဒွါ မဲ ဇဝ်ဖြာ ဒီ ဂေ။

22 ဆီငဲ ဟီ လေး၊ ဂေ ဘော ဝီ ဟာဝ် လိုပ် ခဲင် ကာဒဝ် ဒူင် အိတ် ဂေ။

23 ဒေါ အန် တီ ဂေ ဒူအီ ဘော နပ် ဒီ ဘူင် မာန်၊ ဘူင် ဂါန် ဂေ၊ တဲး ကော ဇမ် အပ်။

24 အိုယ် မဲ ဇဝ်ဖြာ၊ ပဲ့ ဟဲ့ ဘူင် ဘ့လေး မဲ ဇဝ် ဇိုဝ် တီ ဟဲ့ ကိူန် ကာဆဝ်။ မဲ ဇဝ် ဟဲ့ ဘူင် ဇိုဝ် တီ ဒွန် မျုဝ်၊ တဲး န့ ဒူပ် အာငျာန် မဲ ဇဝ်။ အီ ကွယ် ဒဲင် ကာဒါယ် နီ၊ ဟဲ့ မုး တူတ့် ပီ ဖာန် ဘ့လေး မဲ ဇဝ်။

25 နာ တ ဒွယ် ဘော မိုဝ်း အိုမ် နမ်မုက်ဆာရာ၊ အီ တာင် အီ ကာဝဝ်း။ အိုမ် တီ ဘော ဘဲန် ဒူင် ကွယ် ဒုဝ် ဆတ်ဒါဝါ ဘဲန် မျုဝ် ဘဲန် မျုဝ်။ န့ ဘော မိုဝ်း ဘော ဒုဝ် တျီ့ ဒုဝ် တာင်။ ဂေ ဟဲ့ ကိူန် ကာဆဝ်၊ အာဝ် ဟူ ပဲ ဒီ တိး။

26 န့ ဘော မိုဝ်း ဘော ရိုဝ် ဆင်ဖုဝ် ဟာဝ် ဟာဝ် တး တး။ န့ မိုဝ်း ဘော မာကြာယ် အီ မုး ပီ ဖာန် ဘ့လေး မဲ ဇဝ်ဖြာ တဲး အန် ဒီလာဝ် ခဲင် အိုမ် တီ။

27 ဒုဝ် ဆတ်ဒါဝါ ဂေ တီ ဟီ ကာပြာန့်၊ ဂေ ဘော ဘ်ု ဒီ ယွတ် ပန် ဒီ တဲး မဲ ဇဝ် ဂေ ဟူမ်။

28 ပီ တဲး မဲ ဇဝ် ဂေ ဟူမ်၊ ဟဲ့ မွှိုမ် ကာဆဝ်။ ဒေါ တဲး မဲ ဂေ ဟူမ်၊ ဂေ ဘော နပ် ဒီ ဘာဝ် ဟူမ်။ ဒေါ ဟျီင် မဲ ဇဝ် ဂေ ဟူမ်၊ ဂေ မိူဝ် ဟဲ့ ဖဲ ဆီချာ။

29 ဆေ မဲ ဇဝ် တူ ယွတ် မဲန် ဂေ၊ ဂေ ဘော ယုဝ် ကာဆဝ်။ ဆေ မဲ ဇဝ် ဒိုဝ်း လေး ဖွိုမ် ဂေ၊ ဂေ ဘော ယမ် ဝီ ဘဲန် ကာဒါယ်။

30 ဆေ မဲ ဇဝ်ဖြာ ယီ ဟပ် နဝ်း ဖွိုမ် မဲ၊ န့ တဲး ဂေ အိမ်။ တဲး န့ ဝီ မိုဝ်း ကာမာယ် ဒွန် မျုဝ်။

31 မှာန့်၊ တဲး အာဖုင် ဒင်ခုဝ် မဲ ဇဝ်ဖြာ ကွယ် ဆေဆေ။ တဲး မဲ ဇဝ် ဘော ဘျုဝ် ဒါခိုယ် ကူပ် ပဲ့ ဟဲ့ ဘူင် ဘ့လေး မဲ ဇဝ် ဒွန် မျုဝ်။

32 ဆေ မဲ ဇဝ် ယွတ် ကာဒါယ်၊ ကာဒါယ် ဘော ဒီယုး ဒီယေန့်။ ဆေ မဲ တာ ဒိုဝ် နွန်၊ န့ ဒီ ဘော မိုဝ်း ဒက် လေး။

33 ဘော စုဝ် အုဝ်၊ အုဝ် ဒီ တဝ်း မှုဝ် တဲး ဇဝ်ဖြာ ထူမ်။ ဒေါ ဆီ မိုဝ်း အုဝ် အာဆာက်၊ အုဝ် ဒီ တဝ်း မှုဝ် အီ အိူပ် ဇဝ်ဖြာ။

34 ပီ ကာဒွါ့ ကာဖာ အုဝ် တီ၊ တဲး န့ လဝ့် နဝ်း အန် ဇဝ်။ အုဝ် မိူဝ် ဟဲ့ ဘျုဝ် ဒါခိုယ် ကူပ် အိူပ် အုဝ် ဇဝ်ဖြာ။

35 အီ မုး ဒူအီ ဒဲင် ကာဒါယ် အီ ဘူင် မှာပ်၊ တဲး ဂေ ဟြာယ် တူတ့်။ ကွဲ့ တဲး န့ ဆီ မိုဝ်း ဒူအီ မိူက် ဒူအီ ဟာယ်။ အုဝ် ယီ အိူပ် ဇဝ်ဖြာ ခဲင် နဝ်း အုဝ်။ အုဝ် အိူပ် အန် ဇဝ်။