1 အုဝ် အိူပ် ဇဝ်ဖြာ ခဲင် နဝ်း အုဝ်။ ဘော နဝ်း ဘော ဖွိုမ် အုဝ်၊ အုဝ် အိူပ် မျုက် အန် ဇဝ် အီ ဘွတ် ကာဆဝ်။

2 အုဝ် အိူပ် ဇဝ်ဖြာ ခဲင် နဝ်း အုဝ်၊ ကွဲ့ တဲး အုဝ် ပိဝ် ဂုင် ဂေဇူ အန် ဇဝ် ဒွန် မျုဝ်။

3 အန် ဇဝ် ဟဲ့ ဂဝ်း ဝဲန် မှာပ် အုဝ် ဒွန် မျုဝ်။ အန် ဇဝ် ဘော တဲး န့ ဟြာယ် ဘော ဆဝ် ရောဂါ ဒွန် မျုဝ်။

4 အန် ဇဝ် ဟဲ့ ထုတ် လေး အုဝ် ခဲင် ကာဒဝ် ဘာရေဝ်။ အန် မိူဝ် ဟဲ့ ရွက့် ကာဝေ အုဝ်၊ မွင့်ကာရာ ဒွါ ဒီ အုဝ်။

5 အန် ဇဝ် ဒွါ နာ ဘွတ် နာ မွှိုမ် ဒီ အုဝ်၊ ကွဲ့ ဟူ တဲး န့ မိုဝ်း ပီ ဆီ လုဝ် အုဝ်။ အန် တဲး အာဆာက် အုဝ် ဝီ ပီ ဒေါ နှိုမ် အုဝ်၊ တဲး န့ တူင့် ပီ အာဆာက် မာဂ့လာင်။

6 အာဆေ ခမ် အီ ခါနှာပ် အန်၊ ဇဝ်ဖြာ ဒီ ဝီ ဘူင် နာ မှာန် နာ မွှိုမ် ဒီ အန်။

7 အန် ဇဝ် ဟဲ့ ဘျ ဒီ အာမုဝ်ဆဲ၊ တဲး အန် နပ် ပီ ခြာမ် အန် ဇဝ် ဒီ ဘူင်။ အန် ဘော တဲး ဂေ ဒူအီ အီဆာရေလ ယိုဝ် ဒွန် မျုဝ် ခဲ့ ပီ ဘူင် အန်။

8 ဇဝ်ဖြာ မိုဝ်း နဝ်း ရွက့် ကာဝေ ဆေဆေ။ အန် ခမ် ဒီ ယိူန်၊ တူ ငှိုယ် ရူ။ ဘော ဂေဇူ အန် ဟဲ့ ကိူန် ကာဆဝ်။

9 အန် ဇဝ် တူ အေး အီ ဆေဆေ။ အန် မိူဝ် တူ ရူ လှေန့်၊ တူ အုန် နဝ်း။

10 အန် တူ ဒမ် မှာပ် ပီ ကာအာပ် ခမ် အေ။ အန် မိူဝ် တူ ဘူင် ဝျီ့ အီ ကာဒါန် မှာပ် ပဲ့ ဟဲ့ ဘူင် အေ။

11 ခဲ့ ကာဝဝ်း ဘ့လေန့် ဂါယ် ကာဒါယ်၊ ဘော နဝ်း ရွက့် ဇဝ်ဖြာ ဟဲ့ ကာဝဝ်း ခဲ့ တီ။ အန် ရွက့် ဂေ အီ ရုဝ်ဆေ အန်။

12 ဒူင် လေး ဆီငဲ ဂါယ် ဒူင် ဂေတ့် ဆီငဲ ဟဲ့ လာယ် ကာတူင့် ကာဆဝ်။ ပါယ် တီ ဘော ဇဝ်ဖြာ ဒီ ဒိုဝ်း ဝဲန် မှာပ် အေ တဲး န့ ကွယ် တူင့် ခဲ့ တီ ဒီ အေ။

13 ဇဝ်ဖြာ မိူဝ် ရွက့် ကာဝေ ဂေ အီ ရုဝ်ဆေ အန်။ နဝ်း အန် ဘော ပီ နဝ်း ဂုန့် အီ ရွက့် ဂွန် အန်။

14 ခုဝ်၊ ဇဝ်ဖြာ ဘော လှုဝ်း ဒေါ ဘူင် အန် အာရိုပ် အေ။ အန် ဘော နပ် အေ ဟဲ့ ဒွိုမ် မုး ကာဒါယ်။

15 အာဆာက် ဒူအီ ဘော ပီ ဘုဝ်း ဂေ ပေတ့်။ န့ ဘော နပ် ဒီ တာင် ပီ ဘုဝ်း အီ ကွယ် ခဲင် ပြဲ နပ် ဒီ ဘြး။

16 ဆေ ခုန် ဟီ တး ဘုတ်၊ န့ ဒီ ဝီ ဟြာယ်။ ဒူင် ကွယ် ဘြိမ် အန် အာဝ် ဟူ မိုဝ်း အာဆေ အီ ဝီ နပ် လွင် အန်။

17-18 နဝ်း ရွက့် ဇဝ်ဖြာ တူ နပ် ဒီ တူတ့် ဒေါ မှဝ်။ ဘဲန် ဇာတ် ဘဲန် ဇာတ် အန် နပ် ဒီ ရွက့် ဂေ အီ ရုဝ်ဆေ အန်။ အန် နပ် ဒီ ဘူင် နာ မှာန် ဒီ လှုက်လှာန် ဂေ ဒူအီ ပီ ရွက့် အန် တီ။ န့ မုး ဂေ ဒူအီ ဇိုဝ် တီ၊ ဂေ အီ ဒူပ် ပီ လာယ် ကာဆဲန့် ဂေ ဒီ ဇဝ်ဖြာ ဘော ဂေ အီ ခမ် ဒါရာ အန်၊ ဇဝ်ဖြာ ဒီ ဂေဇူ ဂေ ဆေဆေ။

19 ဇဝ်ဖြာ ဘော ဘ့လေး မာလာင် အန် ခဲင် ဂါင်ဟြာဝ်။ မိူင် ပီ အိုပ် အန် ဘော ကွယ် ဒွန် နာ ဒွန် ပ့လုဝ့်။

20 ဘော ဘေ အာမူ အာမာတ် ဇဝ်ဖြာ အီ မိုဝ်း ပွုန် တာင်၊ အီ ထူမ် ဂြုဝ်း အန် ဇဝ် ဘော ဘူင် ဒူပ် ပီ တဝ်း အန်၊ တဲး ဘော ဘေ အိူပ် ဇဝ်ဖြာ။

21 ဘော ဘေ အီ မိုဝ်း ပွုန် အီ ကွယ် ခဲင် ဂါင်ဟြာဝ်၊ ဘေ အီ ဘူင် ဒူပ် ပီ အိုင် အန် ဇဝ်၊ တဲး ဘော ဘေ အိူပ် ဇဝ်ဖြာ။

22 ခဲ့ ပီ ဖာန် ဘ့လေး ဇဝ်ဖြာ အီ ကွယ် ခဲင် မိူင် ပီ အိုပ် အန် ဇဝ် ဒွန် နာ ဒွန် ပ့လုဝ့်၊ တဲး ဘော ဘေ အိူပ် ဇဝ်ဖြာ။ ဘော နဝ်း ဘော ဖွိုမ် အုဝ် ဘော အိူပ် ဇဝ်ဖြာ။