1 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်။ အုဝ် ဘော မှာန့်၊ တဲး မဲ ဇဝ် စွယ် အုဝ်။

2 ဒေါ ကာဒုး အုဝ် ဒုက် တာင်၊ အုဝ် မှာန့်၊ ကွဲ့ တဲး မဲ ဇဝ် ဘ့လေး ဝဲန် အုဝ်။ ဒေါ ဆာခိုဝ် အုဝ် ဒီ မဲ၊ တဲး မဲ ဇဝ် ဘော ဝျီ့ ခြန် ဂြုဝ်း အုဝ်။

3 အာဆာက် အုဝ် ဒီ ဘော ဟြာယ် ဘော တူတ့် ပီ ဒက် ငဝ်။ ဒုဝ် ဘူင့် အုဝ် ဟဲ့ ဒါတ် ပီ န့ကိုဝ် ငဝ်။

4 နဝ်း အုဝ် ဟဲ့ ဒီလှး ပီ ပေတ့် ပီ ရိုတ့် ဝဲန် အီ။ အုဝ် မိူဝ် အာဝ် ဟူ မိုဝ်း နဝ်း ဆီ ဟူမ် မာဆေ။

5 ကူပ် က့လိုဝ် အုဝ်၊ အုဝ် ဟဲ့ ချာ ကာဆဝ်၊ ဂိတ် မီ ဟုန် ဂါယ် ကာအာင်။

6 အုဝ် ဘော ပီ မာဒီဘုဝ့် အီ ကွယ် ခဲင် ပြဲ ကာဟဝ်း။ အုဝ် ဘော ပီ မာဒီဘုဝ့် အီ ကွယ် ခဲင် ရဝ် ရာမ်။

7 အုဝ် အိတ် နေ၊ ယီ တူ ပွိုန် ဒီ အိတ်။ အုဝ် ပီ မာဆီလဝ်း အီ ကွယ် အန် အူ ဒုဝ် ဒဲင် ကာတု ကာင်။

8 ဂေ ရန်ဆူ အုဝ် ဘော နဲန အုဝ် ဒွင် ဝန်။ ဂေ အီ ကာအိး အုဝ်၊ ဂေ ဘော တဝ်း စိူဝ် အုဝ် ဘော အေး ဘော ဒိူင် အီ ဟဝ်။

9 အုဝ် ဘော ကာဒုး ဒီ ဟူမ် ကာဝှါင်၊ တဲး န့ ဘဲန် ပီ ဒီ ဟူမ် အုဝ်။ ဒေါ ဒျီင် အုဝ် ဒီ အိုမ်၊ အုဝ် ဘော ဒျီင် ဘော အိုမ် ငါယ် အုဝ်။

10 ခုဝ်၊ န့ မုး မဲ ဇဝ် အီ ဆီ တဲး အုဝ် ခမ် မှာပ် ဇိုဝ် တီ။ မဲ ဇဝ် ဟဲ့ ဇတ့် ဝဲန် အုဝ်၊ ပီ ဂေ ဇတ့် ဝဲန် ကာအး။

11 အာဆာက် အုဝ် ဘော ပီ ကာမိုက် ဒေါ ဘာ ဒီ အပ်။ အုဝ် ဘော ဟျီ့ ကာဟဝ်း ပီ ပေတ့်။

12 မဲ ဇဝ်ဖြာ၊ မဲ ယီ ကွယ် ဒဲင် မာလာင် မဲ၊ အိုပ် ဆေဆေ။ ဒူအီ ဒီ ဘော ရုဝ်ဆေ မဲ ဇဝ် ဒွန် စုဝ် ဒွန် ဘာန်။

13 မဲ ဇဝ် ဒီ ဘော ကာဝေ ဒူအီ ခဲင် မိူင် ဇီအူန်။ ခုဝ်၊ အာခြာဝ် ဒီ လုဝ် မဲ ဇဝ် ဂေဇူ ဂေ ဟဲ့ ဟွတ့် ဇမ်။ န့ ဟဲ့ ဟွတ့် ဇမ် ဒေါ တီ နီ။

14 ယေ ဒဲစေန့် မဲ ဇဝ် ယီ ရွက့် မိူင် ဇီအူန် တီ။ န့ ပီ ဘော ဟဲ့ ကာပျာတ့် ဟဲ့ လိုဝ် မိူဝ်၊ ယေ ယီ ကာဝေ မိူင် တီ။

15 ခဲ့ ကွယ် အာမျုဝ် ဒူအီ၊ ဂေ ဒီ ဘော ယုဝ် ဇဝ်ဖြာ။ ခဲ့ ကွယ် ခုန်ဒီခမ် အီ ကွယ် ဒဲင် ကာဒါယ် နီ၊ ဂေ ဒီ ဘော ရုဝ်ဆေ အန် ဇဝ်။

16 ဇဝ်ဖြာ ဒီ ဝီ ဆမ်၊ ဝီ မ့ပြာယ် မိူင် ဇီအူန် တီ။ အန် ဇဝ် ဒီ တဲး န့ လိုဝ်း ဆီချာ ခဲ့ တာင် အာဖုင် ဒင်ခုဝ် အန်။

17 အန် ဇဝ် ဒီ ဘော ထူမ် ဂြုဝ်း ဆာဒူင် ဆာခိုဝ် ဂေ ဒူအီ ဂိန်။ အန် မိူဝ် တူ ဝဲန် ပီ မှာန့် ဂေ။

18 လွင် အန် တီ လုဝ် ဒဲမ် အုန်၊ တဲး ဂေ လှုက်လှာန် အေ ဝီ နပ်။ တဲး ဘော ဂေ အီ ဒီ ဂွိုတ် ဝါယ် နီ ဝီ ပွိုန် ဒီ အိူပ် အန် ဇဝ်။

19 ဇဝ်ဖြာ ဘော ကွယ် နာ ဒဲင်၊ ဒူင် ကွယ် အန် ဟဲ့ ဘွတ် ကာဆဝ်။ အန် ဝီ ယွတ် လူင် ဒဲင် ကာဒါယ်၊

20 တဲး အန် ဇဝ် ထူမ် ပီ ငှုန် ဂေ အီ ကွယ် ခဲင် ကာပိုမ်၊ တဲး အန် ဇဝ် ဝီ ဘ့လေး လေး ဂေ ပဲ့ ဟဲ့ ဟွတ့် အီ ဆုင်ဖျာတ် ဒီ ငဝ်း ယမ်၊ တဲး ဂေ လွတ် ယမ်။

21-22 ဒေါ အန် တီ ဂေ ဒူအီ ဒွန် မာန် ဒွန် မိူင် ဒီ တး ကာဇု တဝ်း ဂေ ဒီ ကြိုပ် ဇဝ်ဖြာ။ ဂေ ဒီ ကာလာင် လွင် ပဲ့ ဟဲ့ ဘူင် ဇဝ်ဖြာ ခဲင် မိူင် ဇီအူန်။ ဂေ ဒီ ဘော အိူပ် အန် ဇဝ် ခဲင် မိူင် ယေရူဆာလဲမ်။

23 ဇဝ်ဖြာ ဟဲ့ ဘူင် တဲး ပ့လူမ် အုဝ် ယူမ် ဒေါ ဆီ နှိုမ် အုဝ်၊ ကွဲ့ တဲး အာဆာက် အုဝ် ဝီ တူင့်။

24 အုဝ် ယီ တဝ်း၊ “အိုယ် မဲ ဇဝ်ဖြာ၊ အုဝ် မှာန့်၊ ကွဲ့ တဲး အုဝ် ယမ် အာတ့် ကတ် အာတ့် ဂဲ အုဝ်။” မဲ ဇဝ်ဖြာ၊ မဲ ယီ ကွယ် ဆေဆေ ဒွန် စုဝ် ဒွန် ဘာန်။

25 ဆိန့် ဒေါ ဂုဝ်၊ မဲ ဇဝ် ဟဲ့ ဖာန် ဘ့လေး ကာဒါယ်။ မဲ ဟဲ့ ဘူင် ဘော ဂါင်ဟြာဝ်။

26 ဇိုဝ် တီ ဒွန် မျုဝ်၊ န့ ဒီ ဘော လိုဝ် ဟြာယ် တူတ့်။ မဲ ဇဝ် ယီ ကွယ် ဆေဆေ၊ တူ ဟြာယ် ဒေါ မှဝ်။ အာမျုဝ် တီ၊ ဒီ ဘော နပ် ဒီ ဘြိမ်၊ နပ် ဒီ ကာမဝ်။ မဲ ဇဝ် ဒီ ဘော ဝဲန် ဂေ ပီ ခြိုင် ဘြိမ်။ ခုဝ်၊ မျုဝ် တီ ဘော မုး မျုဝ် အီ နပ် ဒီ ပွုန်၊ နပ် ဒီ ဟြာယ်။

27 မဲ ဇဝ် ယီ တူ ကာပ့လု ဒေါ မှဝ်။ အာဆာက် မဲ ဇဝ် မိူဝ် တူ နပ် ဒီ တူတ့်။ မဲ ဒီ ကွယ် ဆေဆေ။

28 လှုက်လှာန် ယေ ဒဲစေန့် မဲ၊ ဂေ ဒီ ကွယ် ရိုမ် ဒူပ် မဲ ဇဝ်။ မဲ ဒီ ဘော တဲး ဂေ ကွယ် ဒါခိုယ် ဂျာမ်ဆာ ပါယ် တီ။