1 တဲး ဘေ တဝ်း မှုဝ် ကာမာယ်၊ တဲး ဇဝ်ဖြာ ထူမ်။ အန် ဇဝ် ဟဲ့ ဘူင် အီ မွှိုမ် အာမ် ဒွန် မျုဝ်။ ခုဝ်၊ န့ မုး အန် ဇဝ် အီ မိုဝ်း ပွုန် တာင် အီ ဘွတ် ကာဆဝ်၊ အန် ဟဲ့ အွင် ဟဲ့ ပဲ ရန်ဆူ အန်။

2 ဇဝ်ဖြာ ဘော တဲး ဒွန် အီ နပ် လွင် ဟဲ့ အွင် ဟဲ့ ပဲ အန် ရန်ဆူ အန်။ အန် ဟဲ့ တဲး ဘော ဒူအီ အာမျုဝ် ဟဝ် နပ် လွင် အန် တီ။

3 အန် ဇဝ် ဟဲ့ လှုဝ်း နဝ်း ရွက့် အန် ဒီ ဂေ ဒူအီ အီဆာရေလ။ အန် ဘော ဘူင် နာ မုး နာ မှာန် ဒီ ဂေ၊ တဲး ဂေ ဒူအီ ဘော ကာဒါယ် ကော နပ် ကော ယိုဝ် လွင် ဇဝ်ဖြာ ဟဲ့ ဂေဇူ ဟဲ့ ချွတ် ဂေ။

4 အိုယ် ဘေ ဒူအီ အီ ကွယ် ဒဲင် ကာဒါယ်၊ တဲး ဘေ ဘောကာဂ့လျီတ် တဝ်း မှုဝ်၊ အိူပ် ဇဝ်ဖြာ။ တဲး ဘေ တဝ်း တာင် မှုဝ် ဒါခိုယ် အီ အိူပ် အန် ဇဝ်။

5 တဲး ဘေ တဝ်း မှုဝ် ဘော ဘး ဒိင်၊ တဲး ဇဝ်ဖြာ ထူမ်။

6 တဲး ဘေ ဘုတ် ဘော ဝဝ် ဘော နိုင် ပဲ အီ ဟမ် ဒါခိုယ်၊ တဲး ဇဝ်ဖြာ ထူမ်။ အန် မုး ခုန်ဒီခမ် အီ အိုပ် အေ။

7 တဲး အိုမ် နမ်မုက်ဆာရာ ဘော ဒုဝ် ဆတ်ဒါဝါ အီ ကွယ် ခဲင် အိုမ် တီ ဘော ဒီငိုန့် ဟမ် တာင်။ တဲး ကာဒါယ် ဘော ဂေ အီ ကွယ် ဒဲင် ကာဒါယ် တီ တဝ်း မှုဝ် ဒါခိုယ်။

8 တဲး အိုမ် ဒွန် ဒီလယ့် ဒွန် ဘ့လဲင် ဒါခိုယ် ပီ ဒူအီ အီ ကာထ ဒဲ ဂေ။ တဲး ဘော နွန် ဘောကာဂ့လျီတ် ခူယ် ပီ ဒူအီ အီ တဝ်း မှုဝ်၊ အီ အိူပ် ဇဝ်ဖြာ။

9 တဲး အေ အိူပ် ဇဝ်ဖြာ။ ခုဝ်၊ အန် ဇဝ် ဒီ ဘော တး အိုပ် ဒဲင် ကာဒါယ် နီ။ အန် ဇဝ် ဒီ ဘော ဆုင်ဖျာတ် အာမူ ဒူအီ အီ ကွယ် ဒဲင် ကာဒါယ် နီ၊ တဲး န့ ဆိူဝ်၊ တဲး န့ မှာန်။