1 ဇဝ်ဖြာ အိုပ် တူတ့် ဒွန် မျုဝ် ဒဲင် ကာဒါယ်။ ခုဝ်၊ ဂေ ဒူအီ ယုဝ် အန်။ အန် ဇဝ် ဘော ကွယ် ကာတဲ အာမူ အာမာတ် အန် အီ စိူဝ် ခေရုပ်။^a ခုဝ်၊ ဘော မာအိမ် ဘော ယုဝ် ဘော ယေန့်။

2 ဇဝ်ဖြာ ဟဲ့ ဘွတ် မျာတ် ခဲင် မိူင် ဇီအူန်။^b အန် ဇဝ် ဘွတ် မျာတ် လွှိုမ် ဒူအီ ဘောကာဂ့လျီတ်။

3 တဲး ဂေ အိူပ် ပွုန် အန် ဇဝ် အီ ဘွတ် ကာဆဝ် အီ မွှိုမ် ယုဝ် ကာဆဝ်။ အန် ဇဝ် ဟဲ့ ဆီငါ ဘွတ် အာခ်ု မှာန်။

4 ခုန်ဒီခမ် တီ ဟဲ့ မိုဝ်း ပွုန် တာင်။ အန် ရွက့် ဂေ ဒူအီ အီ ဘူင် နာ မုး နာ မှာန်။ မဲ ဇဝ် ဟဲ့ မာနုဝ် ဒူအီ အီဆာရေလ၊ တဲး ဂေ နပ် နာ မုး နာ မှာန်။

5 တဲး အေ အိူပ် ဇဝ်ဖြာ ပီ ကြိုပ် အေ။ တဲး အေ ကြိုပ် နာ ကွယ် မာလာင် အန် ဇဝ်။ အန် ဇဝ် ဟဲ့ ဆီငါ ဘွတ် အာခ်ု မှာန်။

6 အာမုဝ်ဆဲ ဂါယ် အာရူန် တွိုန် မုး ဒူအီ အီ လှူ ဒီ အန် ဇဝ်။ အာဆာမူအေန် ဘော မုး အီ ဆာခိုဝ် ဂါဝ် ပွုန် အန် ဇဝ်။ ဂေ တီ ဟီ ဆာခိုဝ် ဒီ ဇဝ်ဖြာ၊ အန် ဇဝ် ဘော ထူမ် ဂြုဝ်း ပီ ဆာခိုဝ် ဂေ။

7 အန် ဇဝ် ဟဲ့ ကွယ် ခဲင် န့အု၊ ကာလာင် ဂြုဝ်း ဒီ အာမုဝ်ဆဲ ဂါယ် အာရူန် တွိုန်။ ဂါယ် ဘော ဘူင် ဒူပ် ပီ တဝ်း အန် ဇဝ်၊ ဘော ဒူပ် ဒါရာ ပီ ကာလာင် အုန် အန် ဒီ ဂေ။

8 အိုယ် မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် ယေ။ မဲ ဇဝ် ဟဲ့ ထူမ် ဂြုဝ်း ဂေ။ မဲ ဇဝ် ပီ ဘော ဟဲ့ ဒမ် မှာပ် ကူပ် ဟဲ့ ကာလိုပ် ဂေ၊ မဲ ဇဝ် ယီ ဝီ တဲး ဂေ နပ်၊ မဲ မုး အီ ဂဝ်း ဝဲန် မှာပ် ဂေ။

9 တဲး အေ အိူပ် ဇဝ်ဖြာ ပီ ကြိုပ် အေ။ တဲး အေ ကြိုပ် အန် ဇဝ် ဒီ နွန် ဆီငါ ဘွတ် အီ မုး ဒူင် ကွယ် အန်။ ခုဝ်၊ အန် ဇဝ် မုး ဇဝ်ဖြာ အီ ဆီငါ ဘွတ် အာခ်ု မှာန်။