1 တဲး အေ တဝ်း မှုဝ် ကာမာယ် အီ အိူပ် ဇဝ်ဖြာ။ ဒူအီ ဘောကာဂ့လျီတ် အီ ကွယ် ဒဲင် ကာဒါယ်၊ တဲး အေ တဝ်း မှုဝ် ဒီ ဇဝ်ဖြာ။

2 တဲး အေ တဝ်း မှုဝ် ဘော အိူပ် မျုက် အန် ဇဝ်။ ဒွန် ဆီငဲ ဒွန် ဆီငဲ၊ တဲး အေ ကာလာင် လွင် ဇဝ်ဖြာ ချွတ် အီ။

3 ကာလာင်၊ တဲး ဒူအီ ဘောကာဂ့လျီတ် နပ် ခဲ့ တာင် အာဖုင် ဒင်ခုဝ် အန် ဇဝ်။ ကာလာင် ဘော အီ မွှိုမ် အာမ် ကာဆဝ် ပဲ့ ဟဲ့ ဘူင် အန် ဇဝ်၊ တဲး ဒူအီ ဒွန် မျုဝ် ကော နပ်။

4 ခုဝ်၊ ဇဝ်ဖြာ ဟဲ့ ဘွတ် မျာတ် ကာဆဝ်၊ ဟဲ့ ကာအာပ် အေ အိူပ် အန် ဇဝ်။ န့ ဟဲ့ ကာအာပ် အေ ယုဝ်၊ အေ ရုဝ်ဆေ ဇဝ်ဖြာ လွှိုမ် အီ ဟဝ် ရုဝ်ဆေ ဇဝ် ပီ ကြိုပ် ဂေ ဘဲန် ကာဒင် ဘဲန် ကာဒင်။

5 ဇဝ် ပီ ကြိုပ် ဂေ ဒူအီ အာမျုဝ် ဟဝ် ဘောကာဂ့လျီတ် မုး မီ အာရိုပ် ရာင်။ အီ မုး ဇဝ်ဖြာ အာခါခ်ု၊ အန် ယီ ဖာန် တဲး န့ မိုဝ်း ဘ့လေန့် ဂေ ဂါင်ဟြာဝ်။

6 အန် ဇဝ် ဘော မိုဝ်း ပွုန် ဂေ အာဖုင် တာင် ကာဆဝ်။ ခဲင် ဟုဝ် အီ မုး ဒူင် ကွယ် အန်၊ ပွုန် အန် ဘော အာရူင် အန် ဟဲ့ လိုဝ်း ဆီချာ။

7 အိုယ် ဘေ ဒူအီ အီ ကွယ် ဒဲင် ကာဒါယ် ဘောကာဂ့လျီတ်၊ တဲး အေ အိူပ် ဇဝ်ဖြာ။ တဲး အေ အိူပ် ပွုန် အန် ဘော အာဖုင် ဒင်ခုဝ် အန်။

8 တဲး အေ အိူပ် ဇဝ်ဖြာ၊ တဲး န့ ကာအာပ် ခဲ့ တာင် အာဖုင် ဒင်ခုဝ် အန်။ တဲး အေ ဘော ရဲန် ဘော ပီ ဒီ လှူ၊ တး လှူ ခဲင် ဝဲင် ဟုဝ် အန် ဇဝ်။

9 တဲး အေ အိူပ် အန် ဇဝ် ဒေါ လိုဝ်း အာဖုင် ဒင်ခုဝ် အန် ဒီ အေ။ တဲး အေ အီ ကွယ် ဒဲင် ကာဒါယ် ဘော ယုဝ် ဇဝ်ဖြာ။

10 တဲး အေ ဘော ခဲ ဒီ ဒူအီ ဒွန် ဇိုဝ် ဒွန် ခြိုဝ် တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ်။” ခဲ့ ကွယ် ဒွန် မျုဝ် ဒဲင် ကာဒါယ်၊ န့ ကွယ် မန် ဆီချာ၊ အာဝ် ဟူ ပွိုန် ရ်ု၊ အာဝ် ဟူ ပွိုန် ဒီယုး ဒီယေန့်။ ဇဝ်ဖြာ ဒီ ဘော ဆုင်ဖျာတ် နာ မုး နာ မှာန် ဒီ ဒူအီ ဒွန် အီ။

11 တဲး ဘော ဂါင်ဟြာဝ် ဘော ကာဒါယ် ခူယ် ဒါခိုယ်။ ဘော အိုမ် နမ်မုက်ဆာရာ ဘော ဒုဝ် ဆတ်ဒါဝါ အီ ကွယ် ခဲင် အိုမ် တီ၊ တဲး ဂေ ဒီငိုန့် ဟမ် တာင်။

12 ဘော ဒူင် နာ ဘော မျုဝ် အီ ကွယ် ခဲင် ဒူင် နာ ဒွန် မျုဝ်၊ တဲး ဂေ ဘော ခူယ် ဒါခိုယ်။ ဒေါ အန် တီ ဘော ဟေ ဂေ ဟြင် အီ ကွယ် ခဲင် ပြဲ၊ ဂေ ဒီ ဘော ဒါခိုယ် ပီ ဒူအီ အီ တဝ်း မှုဝ် ဒါခိုယ်၊ အိူပ် ဇဝ်ဖြာ။

13 ဂေ ဒီ တဝ်း မှုဝ် ဒီ ဇဝ်ဖြာ ကူပ် ဒီ တး အန် ဇဝ်။ အန် ဒီ တး တဲး အန် ပွိုန် ဒီ ဆုင်ဖျာတ် အာမူ ဒူအီ ဒဲင် ကာဒါယ် နီ။ အန် ဇဝ် ဒီ ဆုင်ဖျာတ် ဆိူဝ် ဆိူဝ်၊ မှာန် မှာန် ဒီ ဒူအီ အီ ကွယ် ဒဲင် ကာဒါယ် နီ ဒွန် အီ။