1 တး တး၊ တဲး အေ တဝ်း မှုဝ်၊ အိူပ် ဇဝ်ဖြာ။ တဲး အေ တဝ်း မှုဝ် ဒါခိုယ် ဒီ ဇဝ်ဖြာ အီ ချွတ် အေ။

2 တဲး အေ ဟာဝ် ဒူင် ကွယ် ဇဝ်ဖြာ၊ တဲး အေ ဒါင် ဂုင် ဂေဇူ ဒီ ဇဝ်ဖြာ။ တဲး အေ တဝ်း မှုဝ် ဒါခိုယ် ဘော အိူပ် ဇဝ်ဖြာ။

3 ခုဝ်၊ ဇဝ်ဖြာ မုး ဇဝ်ဖြာ အီ ဘွတ် မျာတ်။ အန် ဘော မုး ခုန်ဒီခမ် အီ တာင် လွှိုမ် ဂေ ဇဝ် ပီ ကြိုပ် အီ ဟဝ် ဘောကာဂ့လျီတ်။

4 အန် ဇဝ် ဘော မုး အီ အိုပ် ဘော ကာဒဝ် ဟူလဝ် အီ လိုက် ကာဆဝ်၊ ဘော ကာဒဲ့ နွန် အီ စာ ကာဆဝ်။

5 အိုမ် နမ်မုက်ဆာရာ၊ န့ ဘော မုး ကြုဝ် ဇဝ်ဖြာ။ ခုဝ်၊ အန် ဟဲ့ ဘူင် တဲး န့ မိုဝ်း။ အန် မိူဝ် ဟဲ့ ဖာန် ဘ့လေး ဘော ကာဒါယ်။

6 တဲး အေ တး မုတ် ဂိုပ် ကြိုပ် အန် ဇဝ်။ တဲး အေ တး ခြိုပ်ခြဝ် ဒီ အာတ့် ဇဝ်ဖြာ အီ ဖာန် ဘ့လေး ဘော အေ ဒူအီ။

7 အန် ဇဝ် မုး ဇဝ်ဖြာ ပီ ကြိုပ် အေ။ အေ ဘော ပီ မာဘူ ပီ ဟျီင် လိုမ်လာ အန် ဇဝ်။ အာတိုဝ် နီ၊ တဲး ဘေ ထူမ် ဂြုဝ်း အန် ဇဝ်၊

8 ကွဲ့ တဲး နဝ်း ဘေ ဒိူဝ် ပီ ဒါ ဒါ ဘေ ဒေါ ကွယ် ဂေ ဒီ နွန် မေရီဘာ တွိုန်။ ကွဲ့ တဲး ဘေ ပီ ဒါ ဒါ ဘေ ဒေါ ကွယ် ဂေ ခဲင် ပြဲ ကာဟဝ်း အီ စိူဝ် မာဆာ တွိုန်။

9 ဒေါ အန် တီ ဂေ ဟဲ့ ထေဝ် နဝ်း အုဝ်။ ဂေ ပီ ဘော ဟဲ့ ယိုဝ် ပီ ဘူင် အုဝ် မိူဝ်၊ ဂေ နဲ့ ဘူင် တဲး အုဝ် စာဝ်။

10 ဂေ ဟဲ့ ဘူင် တဲး အုဝ် ကာအိး စုဝ် ဂေ အာဒါ ဖွုန် ဂိုဝ် ဆီနမ်။ အုဝ် မိူဝ် တဝ်း၊ “ဂေ မိုဝ်း နဝ်း ဆီ ဝး အုဝ်။ ဂေ ဟဲ့ ဝဲန် တူတ့် ဂြုဝ်း ပီ ကာလာင် အုဝ် ဒီ ဂေ။”

11 ကူပ် ပါယ် တီ၊ အုဝ် ရူ စာဝ် ဘော ဒိူင် တဝ်း၊ “စုဝ် ဂေ တီ တူ ပွိုန် ဒီ လိုပ် ဇမ် ခဲင် မိူင် ပီ ဒီ အာပ် အုဝ် ဒီ ဂေ၊ ကွဲ့ တဲး ဂေ ပွိုန် ဒီ ကွယ် နှိမ် ဒေါ မှဝ်။”