1 အိုယ် မဲ ဇဝ်ဖြာ၊ မဲ အီ ပွိုန် ဒမ် မှာပ် ဒီ အီ။ အုဝ် မှာန့်၊ တဲး မဲ ဇဝ် ဘျ ပွုန် မဲ။

2 မဲ ဇဝ်ဖြာ မုး အီ ဆုင်ဖျာတ် ဒါရာ ဒီ ဒူအီ အီ ကွယ် ဒဲင် ကာဒါယ် နီ။ တဲး မဲ ဇဝ် ဝီ ဘူင် ဝျီ့ ဒီ ဂေ ဒူအီ အီ ပီခိုက် ခဲ့ ကာအာပ် ခမ် ဂေ။

3 အိုယ် မဲ ဇဝ်ဖြာ၊ ဂေ ဒူအီ မိူက် ဒူအီ ဟာယ်၊ ဂေ ဒါခိုယ် ကူပ် ပီ ဘူင် ဂေ။ ကွဲ့ ဟူ တဲး ဂေ ခူယ် ပါယ် တီ။

4 ဒူအီ တူ မွှိုမ် ဂေ တီ၊ ဂေ ဘော ပီခိုက် ကာဆဝ် နဝ်း ဂေ။ ခဲ့ ပီ ကာလာင် ဂေ ဒွန် မျုဝ် ဂေ ဆီ တဲး အီ အိူပ် ဂေ။

5 ဂေ ဟဲ့ ပျာတ့် ဒူအီ ပီ အိုပ် မဲ ဇဝ်။ ဂေ ဘော ခါနှာပ် ဒူအီ အာမျုဝ် မဲ ဇဝ်။

6 ဂေ ဟဲ့ ငဝ်း ယမ် ယာ ဆီပြး ဘော ခဲတ့် အီ တး ကွယ် ခဲင် မိူင် ယေ။ ဘော ဂွန် ဆီပြး ဂေ ဟဲ့ ငဝ်း ယမ်။

7 ဂေ ဘော ကာမွုန် တဝ်း၊ “ဇဝ်ဖြာ တူ ယိုဝ် ပီ ဘူင် အေ။ ဇဝ်ဖြာ ပီ ကြိုပ် အေ ဒူအီ အီဆာရေလ၊ အန် တူ ဒိုဝ်း ဒီ ထူမ်။”

8 ဘေ အီ မုး ဒူအီ ရိုဝ် အီ ကွယ် ကာတဲ ဒူအီ ဟဝ်၊ တဲး ဘေ လှုဝ်း၊ တဲး ဘေ ဇေန့်ဇာ။ ဘေ အီ မုး ဒူအီ တူ လွှက့်၊ တဲး ဘေ မိုဝ်း အာငျာန်။

9 ဘေ ထာင်၊ ဇဝ်ဖြာ အီ ဘူင် တဲး ဒူအီ မိုဝ်း ဟျုဝ့် ။ ဒုဝ် အန် ယီ တူ ဝီ နပ် ဒီ ထူမ်။ ဘေ ဘော ထာင်၊ အန် ဇဝ် ဟဲ့ ဘူင် တဲး ဒူအီ မိုဝ်း ငါယ်။ ဒုဝ် အန် ယီ တူ ဝီ နပ် ဒီ ယိုဝ်။

10 ဘေ ထာင်၊ အန် ဇဝ် အီ အိုပ် တူတ့် ဒူအီ၊ အန် တူ ဒီ ဒမ် မှာပ် ဘေ။ ဘေ ဘော ထာင်၊ အန် ဇဝ် အီ မာနုဝ် ဒူအီ ဟဝ်၊ အန် တူ မိုဝ်း အာငျာန်။

11 ဇဝ်ဖြာ ယီ နပ်၊ ပီ ကာဒွါ့ ကာဖာ ဘေ ဒူအီ၊ န့ တူ မိုဝ်း ဒီခုဝ် မာဆေ။

12 အိုယ် မဲ ဇဝ်ဖြာ၊ ဆေ မဲ ဟဲ့ မာနုဝ် ဒူအီ အူ ဝီ၊ ဆေ မဲ ဟဲ့ မာနုဝ် အန် တဲး အန် ဒူပ် ဒါရာ မဲ၊ ဒူအီ ဝီ တီ ဟဲ့ ဒါခိုယ်။

13 ဆေ န့ မိုဝ်း အီ ဇမ် ဒုက်၊ မဲ ဇဝ် ဒီ တဲး ဝီ တီ လွတ် ဒုက် တီ။ မဲ ဒီ တဲး အန် ဒီလှဝ် ဆီချာ၊ တဲး န့ ကော ဇမ် ပန် ဒီ ဒမ် မဲ မှာပ် ဒီ ဂေ ဒူအီ ဟာယ် ဒူအီ မိူက် ဂေ တွိုန်။

14 ဇဝ်ဖြာ မိူဝ် တူ ဝဲန် ဂေ ဒူအီ အီ ဘိုင် အန်။ အန် မိူဝ် တူ ဝဲန် ဂေ ဒူအီ ပီ အိုပ် အန်။

15 ဂေ ဒါ တာင် အီ ဆုင်ဖျာတ် အာမူ အီ၊ ဂေ ဒီ ဝီ ဒူပ် နာ မုး နာ မှာန်။ ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘော ထူမ် ဘော ဒူပ် ပီ ဆုင်ဖျာတ် တီ။

16 န့ ယီ မုး အုဝ်၊ အာဝ် မိုဝ်း အာဆေ အီ ဟဲ့ တး ကွယ် ဘ့လာက် အုဝ်။ အာဝ် မိုဝ်း အာဆေ အီ ဟဲ့ ရဲ ဂေ ဒူအီ ဟာယ် ဒူအီ မိူက်။

17 ဆေ ဇဝ်ဖြာ တူ စွယ် အုဝ်၊ အုဝ် ဒီ ဘော စေဝ် ယမ်၊ စေဝ် လူင် မိူင် မာရာန။

18 ဒေါ တဝ်း အုဝ်၊ “အုဝ် ဟဲ့ ဒီပ့လာတ် ကေး၊” မဲ ဇဝ်ဖြာ ဟဲ့ ရွက့် ကာဝေ အုဝ်၊ ဝီ တဲး အုဝ် ကွယ် ဆီချာ။

19 ဒေါ ကာဖာ ကိူန် အုဝ် ဘဲန် မျုဝ် ဘဲန် မျုဝ်၊ မဲ ဇဝ် ဘော ဝီ လှဝ် နဝ်း အုဝ်၊ တဲး နဝ်း အုဝ် ဝီ ဒါခိုယ်။

20 မဲ ဇဝ် မိူဝ် တူ ဖြူမ် ရိုမ် ဒူပ် ဂေ ဒါ တာင် အီ ဟာယ် အီ မိူက်။ မဲ မိူဝ် တူ အိုင် ဂေ အီ ဘူင် နာ တူ မွှိုမ်၊ ယီ တဝ်း န့ ဒူပ် ဒါရာ။

21 ဂေ ဘော ခြာမ် ဒီ ဘူင် ကာဘး ဒီ ဒူအီ ဘွတ် ဒူအီ မွှိုမ်။ ဂေ ဘော တဝ်း ဒီ ငဝ်း ယမ် ဒူအီ အီ တူ မိုဝ်း မှာပ်။

22 န့ ယီ မုး ဇဝ်ဖြာ အီ ရဲ အီ ဂွင့် အုဝ်။ ဇဝ်ဖြာ ဘော ပီ ဒါအာင် မာဝ် ဒူင် ချြီင် အုဝ်။

23 အန် ဒီ ဘော ဒမ် မှာပ် ဒီ ဂေ ဒူအီ ဟာယ် ဒူအီ မိူက်။ အန် ဇဝ် ဒီ ဘော ဝဲန် ဂေ ကူပ် မှာပ် ပဲ့ ဟဲ့ ဘူင် ဂေ။ ဇဝ်ဖြာ ပီ ကြိုပ် အေ၊ အန် ဒီ ဘော ဘူင် ပါယ် တီ။