ခါန် 88
ပီ ဆာခိုဝ် ဒူအီ အီ ဟဲ့ ရိန် ဒီ ယမ်
ဂေ ဒူအီ ခြိုဝ် အာခုဝ်ရာ ဟဲ့ ဒဲမ် မှုဝ် နီ။ တဲး ဒါ အီ ယဲတ့် ဂေ အီ တဝ်း မှုဝ် နပ်၊ လုဝ် ဒူပ် မဲင် အီ စိူဝ် မာဟာလာတ် လေနူတ်။ န့ ဒူပ် မှုဝ် ပီ ဒွိုမ် တဝ်း အာဟေမာန် အီ မုး ဒူအီ အာမျုဝ် အာဟေစာရာ။
1 အိုယ် မဲ ဇဝ်ဖြာ၊ မဲ မုး ဇဝ်ဖြာ အီ ချွတ် အုဝ်။ ဒွင် ခိူန် ဒွင် ဝန် အုဝ် ယာမ်၊ ဆာခိုဝ် ဒီ မဲ။
2 အုဝ် မှာန့်၊ တဲး မဲ ထူမ် ဂြုဝ်း ပီ ဆာခိုဝ် အုဝ် တီ၊ တဲး မဲ ဇဝ် ဘော ဒွါ ပီ မှာန့် အုဝ်။
3 ခုဝ်၊ န့ ဟဲ့ ဒုက် ကာဆဝ် ဒီ နဝ်း အုဝ်၊ အုဝ် ဟဲ့ ရိန် ဒီ ယမ်။
4 ဘော ဂေ ဒူအီ ဟဝ်၊ ဂေ ထာင် အုဝ် အာဝ် ဟူ လွတ် ယမ်။ အုဝ် မိူဝ် အာဝ် ဟူ မိုဝ်း ပ့လူမ် ဂေ ဟဲန့်။
5 အုဝ် ပီ ဂေ ဒါ ဆိုက် အီ ဟဲ့ ဟွတ့် ယမ်၊ ဟဲ့ ဟွတ့် ဝဲန် ခဲင် ကာဒဝ် ဘာရေဝ်။ အုဝ် ဘော ပီ ဒူအီ ပဲ့ ဟဲ့ ပိဝ် ဟဲ့ ဝဲန် မဲ ဇဝ်။
6 န့ ဘော ပီ မဲ ဇဝ် ဟဲ့ ဘျွာ လူင် အုဝ် ခဲင် ကာဒဝ် ဘာရေဝ် အီ အပ် ဝွင့် အီ လိုက် ကာဆဝ်။
7 မဲ ဇဝ် ဟဲ့ ဒမ် ကာဆဝ် မှာပ် ဒီ အုဝ်။ န့ ပီ အုဝ် ဟဲ့ ကွယ် ကာဒမ် အိုမ်။
8 မဲ ဇဝ် ဟဲ့ ဘူင် တဲး အုဝ် လာယ် ကာဂဝ်း ဒီ ဂိုက် အုဝ်၊ တဲး ဂေ ဝီ ဇွင့် ဝီ ကာအိး အုဝ်။ န့ ဘော ပီ အုဝ် ဟဲ့ ကွယ် ခဲင် ကာပိုမ်၊ အာဝ် ဟူ ပွိုန် လွတ်။
9 ငါယ် အုဝ် မိူဝ် ဟဲ့ ဟွတ့် မုဝ် ကူပ် ဟဲ့ ဒုက် ကာဆဝ် အုဝ်။ အိုယ် မဲ ဇဝ်ဖြာ၊ အုဝ် ဆာခိုဝ် ဒီ မဲ ဒွန် ဆီငဲ။ အုဝ် ကြိုပ် မဲ ဆေဆေ။
10 မဲ ဇဝ်၊ ဆေ မဲ ဘူင် အီ မွှိုမ် အာမ် ကာဆဝ်၊ ဂေ ဒူအီ ယမ် တူ ပွိုန် ယိုဝ်။ ဂေ မိူဝ် တူ ပွိုန် ဝီ ယိတ့် ဝီ အိူပ် မဲ ဇဝ်။
11 ခဲင် ဘာရေဝ် ဂေ တူ နပ် ဒီ ကာလာင် လွင် နဝ်း ရွက့် ကာဝေ မဲ ဇဝ်။ ဂေ အီ ဟဲ့ လိုဝ် ဟဲ့ စှိုမ်၊ ဂေ တူ နပ် ဒီ ဝီ ဒါင် ဂုင် ဂေဇူ ဒီ မဲ ဇဝ်။
12 ခဲင် ဒူင် အပ် ဝွင့်၊ အာဝ် ပွိုန် ယိုဝ် အီ မွှိုမ် အာမ် ပီ ဘူင် မဲ ဇဝ်။ ခဲင် မိူင် မာရာန အာဝ် ပွိုန် ယိုဝ် နာ ဘွတ် နာ မွှိုမ် ပီ ဘူင် မဲ။
13 အိုယ် မဲ ဇဝ်ဖြာ၊ အုဝ် ယီ ဆာခိုဝ် မှာန့်၊ တဲး မဲ ဇဝ် စွယ် အုဝ်။ ဒွန် ဆိန့်ဝး အုဝ် ဆာခိုဝ် ဒီ မဲ ဇဝ်။
14 မဲ ဇဝ်ဖြာ၊ မှဝ် န့ ပါယ် ပီ ဝဲန် မဲ ဇဝ် ဒီ အုဝ်။း မှဝ် န့ ပါယ် ပီ တူ ယွတ် မဲန် မဲ ဒီ အုဝ်။း
15 အုဝ် ဟဲ့ ခမ် ဒုက် ဟဲ့ ရိန် ဒီ ယမ် ဆိန့် ဒေါ နှိုမ် အုဝ်။ အုဝ် ဟဲ့ ကာဒုး ဒုက် အီ ညှာပ် ကာဆဝ်၊ အာဝ် ဟူ ပဲ ခမ် ဒီ ဒူင့်။
16 ဒုက် ပဲ့ ဟဲ့ တဲး မဲ ဇဝ် အုဝ် ခမ် တီ၊ ဟဲ့ ဟွတ့် ပ့လိုက် တူတ့် အုဝ်။ အီ တူ မွှိုမ် ပဲ့ ဟဲ့ ဘူင် မဲ ဇဝ် တီ၊ ဟဲ့ ပျာတ့် နဝ်း အုဝ်။
17 ဒွန် ဆီငဲ အီ တူ မွှိုမ် တီ ဘော ကွယ် ရူပ် အုဝ်။ န့ ပီ အိုမ် ဟဲ့ မ့ပုန် ဒူင် ကွယ် အုဝ်။ န့ ပီ ဂေ ဟဲ့ ဟွတ့် မှေတ့် ခြွင့် အုဝ်၊ ကွဲ့ တဲး အုဝ် ပွိုန် ဒီ လွတ်။
18 ခဲ့ ကွယ် ဂိုက် အီ ကာလဝ့် ဒီ အုဝ်၊ ဘော ဂေ ဒူအီ ပီ ရွက့် အုဝ်၊ မဲ ဇဝ် ဟဲ့ တဲး ဂေ ဝီ ကာဂဝ်း ဒီ အုဝ်။ န့ ပီ၊ အုဝ် ဟဲ့ ကွယ် ခဲင် အပ် ဝွင့် ဆေဆေ။