1 အိုယ် မဲ ဇဝ်ဖြာ၊ ဆေဆေ အုဝ် ဒီ တဝ်း မှုဝ် လွင် နဝ်း ရွက့် မဲ ဇဝ်။ အုဝ် ဒီ ဘော ကာလာင် ဒီ ဂေ ဒွန် စုဝ် ဒွန် ဘာန် လွင် မဲ ဇဝ် မိုဝ်း နဝ်း မှာန် နဝ်း မွှိုမ် ဆေဆေ။

2 အုဝ် ဒီ တဲး အီ နပ်၊ မဲ ဇဝ် မိုဝ်း နဝ်း ရွက့် ကာဝေ ဆေဆေ။ နဝ်း မှာန် နဝ်း မွှိုမ် မဲ ဇဝ် တူ ဘျွင် ဒေါ မှဝ်။ န့ ဒီ ကွယ် ခဲင် ဂါင်ဟြာဝ် ဆေဆေ။

3 မဲ ဇဝ် ဟဲ့ တဝ်း၊ “အုဝ် ဟဲ့ ဒွါ ကာဒိက် ဆတ်ဇာ ဒီ ဒူအီ ပီ ရဝ်း အုဝ်၊ အုဝ် ဟဲ့ ကာဆဲန့် ဒီ အာဒါဝိတ် တဝ်း၊

4 ‘အုဝ် ဒီ တဲး ခြိုဝ် မဲ ဘဲန် ခုန်ဒီခမ် ဆေဆေ။ အုဝ် ဒီ တဲး ခြိုဝ် မဲ ဘဲန် ဒါ တာင် အီ အိုပ် ဒွန် စုဝ် ဒွန် ဘာန်။’”

5 အိုယ် မဲ ဇဝ်ဖြာ၊ ဂေ အီ ကွယ် ခဲင် ဂါင်ဟြာဝ်၊ ဂေ ဒီ တဝ်း မှုဝ် အီ အိူပ် ပဲ့ ဟဲ့ ဘူင် မဲ အီ မွှိုမ် အာမ် ကာဆဝ်။ ဂေ ဒီ အိူပ် နဝ်း မဲ အီ မှာန် အီ မွှိုမ် ဆေဆေ။ တဲး ဘော ဂေ အီ ဘွတ် အီ ကွယ် ရိုမ် ဝီ ထူမ်။

6 ခုဝ်၊ ခဲ့ ကွယ် မျုဝ် အီ ကွယ် ခဲင် ဂါင်ဟြာဝ်၊ အာဝ် မိုဝ်း အီ ပီ မဲ ဇဝ်ဖြာ။ ခဲ့ ကွယ် ဂေ အာမူ အာမာတ် ခဲင် ဂါင်ဟြာဝ်၊ အာဝ် မိုဝ်း အီ ကာရမ် မဲ ဇဝ်ဖြာ။

7 ဖိုင် ဂေ အီ ဆီငါ ဘွတ်၊ အီ ကွယ် ခဲင် ဂါင်ဟြာဝ်၊ ဂေ ဘော ယုဝ် ဇဝ်ဖြာ။ အာဖုင် ဒင်ခုဝ် အန် ဇဝ် ဟဲ့ တာင် လွှိုမ် တူတ့် ဒွန် မျုဝ် အီ ကွယ် ခူပ် အန်။

8 အိုယ် မဲ ဇဝ်ဖြာ အီ အိုပ် တူတ့် မျုဝ် အီ မိုဝ်း ပွုန်၊ အာဝ် မိုဝ်း အာဆေ အီ ပီ မဲ ဇဝ်။ ပွုန် မဲ ဇဝ် ဟဲ့ တာင် ကာဆဝ်။ ဘော နဝ်း မဲ အီ မှာန် အီ မွှိုမ် ဆေဆေ၊ န့ ဟဲ့ လိုဝ်း ဒွန် ဘ့လာက်။

9 အိုမ် နမ်မုက်ဆာရာ အီ ဒီငိုန့် ကာဆဝ်၊ မဲ ဇဝ် အိုပ် တူတ့်။ ဒေါ ဟဲ့ ဆီလွယ် ကာဆဝ် မာ အိုမ်၊ မဲ ဇဝ် နပ် ဒီ ဘူင် တဲး န့ ဝီ ယေန် ဝီ နှိမ်။

10 န့ ဘော မိုဝ်း မာကြာယ် အီ စိူဝ် ရာဟာပ် အီ ကွယ် ခဲင် အိုမ်၊ မဲ ဇဝ် ဘော ကာဘက် မဲင် အန် တဲး အန် ယမ်။ မဲ ဇဝ် ဘော တဲး ပွုန် မဲ ကာဂုဝ်း ပဲ ဂေ ရန်ဆူ မဲ။

11 ဘော ဂါင်ဟြာဝ် ဘော ကာဒါယ် မုး တူတ့် ကြုဝ် မဲ ဇဝ်။ န့ ဘော မုး မဲ ဇဝ် အီ ဖာန် ဘ့လေး ဘော ကာဒါယ် ဘော အီ ကွယ် ဒဲင် ကာဒါယ် ဒွန် မျုဝ်။

12 မဲ ဇဝ် ဟဲ့ ဖာန် ဘ့လေး၊ တဲး န့ မိုဝ်း နာ တေတ့် နာ ကွာ။ နွန် ထာဘောရာ ဂါယ် နွန် ဟေရာမူန် ဟဲ့ ကွယ် ဒါခိုယ်။ န့ ပီ ဂေ တဝ်း မှုဝ်၊ အိူပ် မဲ ဇဝ်။

13 ပွုန် မဲ ဇဝ် ဟဲ့ တာင် ကာဆဝ်။ မဲ မိုဝ်း ပ့လူမ် ဘော ဟဲန့် အီ တာင် လွှိုမ် တူတ့်။

14 ဒဲင် ကာဒါယ် ပီ အိုပ် မဲ ဇဝ်၊ မဲ ဘူင် နာ ဆိူဝ် နာ မှာန် ဆေဆေ။ န့ ပီ အီ မှာန် အီ မွှိုမ် ဟဲ့ ဘဲန် စေန့် မာလာင် ဒူင် တုတ့် မဲ။ မဲ ဘော ဟာဝ် နာ မှဝ်၊ န့ ဘော ပီ နဝ်း မဲ အီ ရွက့် ကာဝေ ဆေဆေ ဟဲ့ ယဲတ့် ဒီ အာတ့် မဲ ဇဝ်။

15 ဂေ အီ တဝ်း မှုဝ် ဘော အိူပ် မဲ ဇဝ် ဘော ဂေ အီ ကွယ် ခဲင် ဘ့လာင် မဲ ဇဝ်၊ ဂေ ဒီ ဘျုဝ် ဒါခိုယ်။

16 ကူပ် မဲ ဇဝ် ဂေ ဟဲ့ ဒါခိုယ် ဒွန် ဆီငဲ။ ဂေ ဘော အိူပ် မဲ ဇဝ် ကူပ် မိုဝ်း မဲ နဝ်း ဆိူဝ် နဝ်း မှာန်။

17 မဲ ဇဝ် ဟဲ့ တဲး ဂေ မိုဝ်း အာဖုင် ဂေ ဟဲန့်။ ကူပ် ရွက့် ကာဝေ မဲ ဇဝ် ဒီ ယေ၊ မဲ တဲး ယေ ကာဂုဝ်း အွင် ရန်ဆူ ယေ။

18 မဲ ဇဝ်ဖြာ ဟဲ့ ရဝ်း အီ ဒီ ဂွင့် အီ ဒီ ရဲ ယေ။ မဲ ဇဝ်ဖြာ အီ ဘွတ် အီ အိုပ် ဒူအီ အီဆာရေလ၊ မဲ ဟဲ့ ရဝ်း ခုန်ဒီခမ် ဒွါ ဒီ ယေ။

19 ဒေါ မွိုန် မဲ ဇဝ် ဟဲ့ ဒွိုမ် ကာပ့လုး ဒီ ဂေ ဒူအီ အီ ဒူပ် ဆီချာ မဲ ဇဝ်။ မဲ ဟဲ့ တဝ်း ဒီ ဂေ၊ “အုဝ် ဟဲ့ ဒွါ ပ့လူမ် ဒီ ဒူအီ အီ ကျ ဒီ ကာဂုဝ်း။ အုဝ် ဟဲ့ မျုက် ကာညူမ် အူ ဝီ ကာတဲ ဂေ ဒူအီ ကိူန်၊ တဲး အန် နပ် ဒီ ကာဂုဝ်း။

20 အုဝ် ဟဲ့ ယိုဝ် အာဒါဝိတ်။ အုဝ် ဘော ဒိုဝ်း နာမန် အီ ဘွတ်၊ ဖဝ်း ဒဲင် ဂိန့် အန်၊ တဲး အန် ဘဲန် ခုန်ဒီခမ်။

21 အုဝ် ဒီ ဘော ကွယ် ရိုမ် ဒူပ် အန် ဆေဆေ။ အုဝ် ဒီ တဲး ပ့လူမ် တဲး ဟဲန့် ဒီ အန်။

22 ခဲ့ ကွယ် ဂေ ရန်ဆူ အန်၊ အာဝ် မိုဝ်း အာဆေ အီ နပ် ဒီ ပဲ အန်။ ခဲ့ ကွယ် ဂေ ဒူအီ ဟာယ် မိူဝ်၊ အာဝ် မိုဝ်း အာဆေ အီ ပွိုန် ဒီ ခါနှာပ် အန်။

23 အုဝ် ဒီ မး ခဲ့ ကွယ် ဂေ ရန်ဆူ အန် တီ အာတ့် တး ဇမ် ဂေ ဒူင် ကွယ် အန်။ အုဝ် ဒီ ပျာတ့် ဂေ အီ ဇွင့် အန်။

24 အုဝ် ဒီ ရွက့် ကာဝေ အန် ဆေဆေ။ အုဝ် ဒီ တဲး အန် ကာဂုဝ်း ဒီ ဒါ ဆိုက် ဘော အွင် ဆေဆေ။

25 အုဝ် ဒီ ဘော ပီဝဝ်း မာန် မိူင် အန်၊ တဲး မိူင် ပီ အိုပ် အန် စုး ဒီ အိုမ် နမ်မုက်ဆာရာ၊ တဲး န့ ကော ဝီ ဇမ် ဒီ ဘ့လဲင် အိုမ် အူဖာရာတ်။

26 အန် ဒီ ဘော တဝ်း ဒီ အုဝ်၊ ‘မဲ ဇဝ်ဖြာ၊ မဲ မုး ဂုန့် အုဝ်။ မဲ ဇဝ်၊ မဲ ဟဲ့ ပီ ဒါအာင် မာဝ် ဒူင် ဘိုင် အုဝ်။ မဲ ဇဝ် ဘော မုး အီ ချွတ် အုဝ်။’

27 အုဝ် ဒီ ဘော တဲး အန် ပီ ဂွန် ဂိန့်။ တဲး အန် ဘဲန် ခုန်ဒီခမ် တာင် လွှိုမ် ခုန်ဒီခမ် အီ ကွယ် ဒဲင် ကာဒါယ် နီ။

28 အုဝ် ဒီ ရွက့် အန် ဆေဆေ။ အုဝ် ဒီ ဘော လှုဝ်း ဂြုဝ်း ပီ ကာဆဲန့် အုဝ် ဒီ အန် ဆေဆေ၊ တူ တဲး န့ လိုဝ် ဒေါ မှဝ်။

29 အုဝ် ဒီ တဲး လှုက်လှာန် အန် ဘဲန် ခုန်ဒီခမ် ဆေဆေ၊ တဲး န့ လှေန့် ပီ ဂါင်ဟြာဝ် အီ ကွယ် လှေန့်။

30 မာလဲ၊ ဆေ ဂေ လှုက်လှာန် အန် ဘော ဝဲန် ဂြုဝ်း ပီ ကာလာင် အုဝ်၊ ဆေ ဂေ အာဝ် ဟူ ဒူပ် အာကျာမ် အာငျာန် ပီ တဝ်း အုဝ်၊

31 ဆေ ဂေ မိူဝ် တူ ရုဝ်ဆေ ဂြုဝ်း ပီ ကာလာင် အုဝ် ဘော တူ ဘူင် ဒူပ် ပီ စ်ု အုဝ်၊

32 အုဝ် ဒီ ဘော ဒိုဝ်း မ့ဖျီ့ ရေဝ်၊ ဆီဘျြီ့ ဂေ။ အုဝ် ဒီ မာနုဝ် ဂေ ပါယ် တီ၊ တဲး ဂေ ဝီ ခမ် မှာပ် ဂေ။

33 အုဝ် ယီ ဒီ ရွက့် အာဒါဝိတ် ဆေဆေ။ ဘော နာ မှာန် နာ မွှိုမ် ပီ ဘူင် အုဝ် ဒီ အန်၊ အုဝ် တူ တဲး န့ လိုဝ်။

34 အုဝ် မိူဝ် တူ ဘူင် တဲး ဂြုဝ်း ပီ ကာဆဲန့် အုဝ် လိုဝ်။ အုဝ် တူ ဝီ ဘျွင် ဂြုဝ်း ပဲ့ ဟဲ့ ဒွိုမ် ကာလာင် အုဝ်။

35 အုဝ် ဟဲ့ ဒိူင် ကာဆဲန့် ဒီ အာဒါဝိတ် အူ ဇေန့် တီ၊ တဲး န့ ဘော ဘဲန် ဆေဆေ။ အုဝ် မိူဝ် တူ ကာလုဝ် အန် ဒေါ မှဝ်။ ခုဝ်၊ အုဝ် ဟဲ့ ဘွတ် ကာဆဝ်။

36 အုဝ် ဟဲ့ တဝ်း၊ အုဝ် ဒီ တဲး လှုက်လှာန် အာဒါဝိတ် ဘဲန် ခုန်ဒီခမ် ဆေဆေ၊ တဲး န့ ကော လှေန့် ပီ ဆီငဲ ဒီ ကွယ် လှေန့် ခဲင် ဂါင်ဟြာဝ်။

37 မိူင် အန် ဒီ ကွယ် ဆေဆေ၊ ပီ မာဂျီန် အီ ဘ့လာင် ခဲင် ဘ့လေန့် ကွယ် ဆေဆေ။” ခဲ့ တီ မဲ ဇဝ်ဖြာ ဟဲ့ ကာလာင် ဒီ ဂေ အီ ကွယ် ဒေါ မွိုန်။

38 မာလဲ၊ ဒေါ တီ နီ မဲ ဇဝ် ဟဲ့ ဟွတ့် ဝီ ရူ ဒီ ဒူအီ ပီ ရဝ်း မဲ တီ။ မဲ ဟဲ့ ဟွတ့် ဘ့လေး ဝဲန် အန်။

39 ဂြုဝ်း ပီ ကာဆဲန့် မဲ ဒီ ဒဲစေန့် မဲ၊ န့ ပီ၊ မဲ ဟဲ့ ဟွတ့် တဲး န့ လိုဝ်။ န့ ပီ မဲ ဇဝ် ဟဲ့ ဟွတ့် ဝဲန် မင်ဂိုမ် အန်၊ ဝီ ညဲတ့် ခဲင် ကာပုး။

40 မဲ ဇဝ် ဟဲ့ ဟွတ့် ပျာတ့် တူတ့် ရဲင် မိူင် တီ။ ဘော ဒူင် ချြီင် ဂေ ဒါ ဆိုက် အန်၊ မဲ ဟဲ့ ဟွတ့် ပျာတ့် လိုဝ် တူတ့်။

41 ဂေ အီ ဟဝ်၊ အီ ဝဝ့် ဟာဝ် ခူပ် အန်၊ ဂေ ဟဲ့ ပြာ ကြုဝ်ကြာမ် အန်။ ဂေ အီ ကွယ် ကာတတ် အန် ဘော ကာညး အန်၊ နဲန အန်။

42 မဲ ဇဝ် ဟဲ့ ဝီ ခ့ဝါင် တဲး ဂေ ရန်ဆူ အန် ဘောကာဂ့လျီတ် ဝီ ပဲ အန်၊ တဲး ဂေ ဝီ ခူယ် ကာဆဝ်။

43 မဲ ဇဝ် ဟဲ့ ဘူင် တဲး ဘ့လာ မာပွါ့ လာင် အန် ဝိုဝ်း တူတ့်။ မဲ တူ စွယ် အန် ဒေါ ကာဂုဝ်း အန် ဒီ ရန်ဆူ အန်။

44 မဲ ဇဝ် ဟဲ့ ဘူင် တဲး အာဖုင် ဆာရေ အန် ဟြာယ် တူတ့်။ န့ ဘော ပီ မဲ ဇဝ် ဟဲ့ ဘျွာ စုဝ်း မာလာင် အန် ဒဲင် ကာဒါယ်။

45 မဲ ဇဝ် ဟဲ့ ဘူင် တဲး အန် စေဝ် ကတ်။ မဲ ဟဲ့ ဘူင် တဲး အန် ကော ဝီ ဆာယ် အီ ဟဝ်။

46 အိုယ် မဲ ဇဝ်ဖြာ၊ မဲ ဒီ ဘူင် ဟာဝ် ဇိုဝ် တီ လှေန့် ခဲ့ မှဝ်။း မဲ ဆီ ချြီင် မဲ ဆေဆေ ပါယ် တီ။း နဝ်း ရူ မဲ အီ ကာဟွာ့ ပီ ငဝ်၊ မဲ ဆီ အုန် ဆေဆေ။း

47 အုဝ် မှာန့်၊ တဲး မဲ ဇဝ် ဝီ လှုဝ်း လွင် တူ တူင့် အာဆာက် အုဝ်။ ဒူအီ ပဲ့ ဟဲ့ ဖာန် ဘ့လေး မဲ ဂေ နီ၊ အာဝ် မိုဝ်း ဒီခုဝ်။

48 အာဝ် မိုဝ်း အာဆေ အီ တူ လုဝ် ယမ်။ အာဝ် မိုဝ်း အာဆေ အီ ပွိုန် ချွတ် ဒုဝ် ဘြိမ် အန်၊ ကွဲ့ တဲး အန် ဇမ် မိူင် မာရာန။

49 အိုယ် မဲ ဇဝ်ဖြာ၊ နဝ်း ရွက့် ပီ ဒွိုမ် ဒွါ မဲ ဒီ ယေ၊ အာဝ် ဟူ ပွိုန် ယိုဝ်။ ဘော ကာဒိက် ဆတ်ဇာ ပီ ဒွိုမ် ဒွါ မဲ ဒီ အာဒါဝိတ်၊ န့ နှဲန် မဲ ဟဲ့ ဝီ ပိဝ် တူတ့်။

50 မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ဝီ လှုဝ်း ခဲ့ ခမ် ဒဲစေန့် မဲ နီ ပီ နဲန အီ ဟဝ်။ တဲး မဲ ဇဝ် လှုဝ်း ဘော ပဲ့ ဟဲ့ ကာယွင့် ဂေ ဒူအီ အာမျုဝ် ဟဝ် ဒီ အုဝ်။

51 ဂေ ရန်ဆူ မဲ ဇဝ် ဟဲ့ နဲန ခုန်ဒီခမ် ပဲ့ ဟဲ့ ရဝ်း မဲ။ အန် ဟာဝ် နာ မှဝ် မိူဝ်၊ ဂေ ဘော ဒူပ် ဒီ ကာလာင် စာဝ် အန်။ တဲး မဲ လှုဝ်း ဇိုဝ် တီ ဒွန် မျုဝ်။

52 တဲး အေ အိူပ် ဇဝ်ဖြာ ဆေဆေ။ ဆာတူ ဆာတူ။