1 ဇဝ်ဖြာ ဟဲ့ ဒဲ မိူင် အီ မုး ဒူင် ကွယ် အန်။ အန် ဟဲ့ ဒဲ မိူင် တီ ဒဲင် နွန် ဘွတ်။

2 အန် ဇဝ် ဘော ရွက့် မိူင် ဇီအူန် တီ လွှိုမ် ဒွန် ပ့လုဝ့် အီ ကွယ် ခဲင် မိူင် အီဆာရေလ။

3 အီ ဟဝ် ဒီ ဘော ကာလာင် နာ မွှိုမ် ဘဲန် မျုဝ် ဘဲန် မျုဝ် လွင် မိူင် တီ အီ မုး ဒူင် ကွယ် ဇဝ်ဖြာ။

4 ဇဝ်ဖြာ ဘော တဝ်း၊ “ပန် ဒီ ဒဲမ် အုဝ် ဇာရာင် ဂေ ဒူအီ အီ ထူမ် ဂြုဝ်း အုဝ်၊ အုဝ် ဒီ ဘော ဒဲမ် စိူဝ် ဒူအီ ခဲင် မိူင် အဲဂိုပ် ဘော ခဲင် မိူင် ဘာဘဲ။ ခဲင် ဇာရာင် တီ န့ ဒီ မိုဝ်း ဘော ဒူအီ ဖီလီထီ၊ ဒူအီ ခဲင် မိူင် ထူရုဝ် ဘော ဒူအီ ခဲင် မိူင် ကူဆာ အီ စိူဝ် ဘော မိူင် အေထီအူပ်။ ဂေ ဒူအီ ဇိုဝ် တီ၊ အုဝ် ဒီ ဒဲမ် အုန်။”

5 အီ ဟဝ် ဒီ ဘော ကာလာင် လွင် မိူင် ဇီအူန် တီ တဝ်း၊ “ခဲ့ ကွယ် ဒူအီ ဇိုဝ် တီ၊ ဂေ မုး တူတ့် ဒူအီ အီ ဂွိုတ် တး ခဲင် မိူင် တီ။ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဘူင် တဲး မိူင် တီ ကွယ် ဆီချာ။”

6 ဇဝ်ဖြာ ဒီ ဘော ဒဲမ် တူတ့် ခဲင် ဇာရာင် အန်။ ခဲ့ ကွယ် ဒူအီ ဂေ တီ၊ အန် တဲး ဂေ ဘဲန် တူတ့် ဒူအီ အီ ဂွိုတ် လေး ခဲင် မိူင် ယေရူဆာလဲမ်။

7 ဂေ ဒီ ဘော တဝ်း မှုဝ် ဘော ဂါ။ ဂေ ဒီ တဝ်း၊ “ခဲင် မိူင် ဇီအူန် တီ၊ အေ ဟဲ့ ပွိုန် တူတ့် ဒွန် မျုဝ်၊ အီ ဘွတ် အီ မွှိုမ်။”