1 အိုယ် မဲ ဇဝ်ဖြာ၊ တဲး မဲ ထူမ် ဂြုဝ်း ပီ ဆာခိုဝ် အုဝ်၊ အီ မုး ဒူအီ ဂိန် ဒူအီ ဖ့လာန်။

2 တဲး မဲ ဇဝ် ဘ်ု ရိတ် အာဆာက် အုဝ်၊ ကွဲ့ တဲး အုဝ် ယမ်။ ခုဝ်၊ အုဝ် ဟဲ့ ဘိုင် မဲ။ မဲ ဇဝ်ဖြာ ပီ ကြိုပ် အုဝ်၊ တဲး မဲ ချွတ် အုဝ်။

3 အုဝ် မှာန့်၊ တဲး မဲ ဇဝ် ဂေဇူ အုဝ်။ ခုဝ်၊ အုဝ် ဟဲ့ ဆာခိုဝ် ဒီ မဲ ဒွင် ဝန်။

4 အုဝ် မှာန့်၊ တဲး မဲ တဲး နဝ်း အုဝ် ဝီ ဒါခိုယ်။ ခုဝ်၊ နဝ်း အုဝ် ဟဲ့ လှုဝ်း မီ မဲ။

5 မဲ ဇဝ်၊ မဲ မိုဝ်း နဝ်း မွှိုမ်၊ နဝ်း ကာဝေ အီ။ မဲ မိူဝ် ရွက့် ကာဆဝ် ဒွန် အီ အီ ဆာခိုဝ် ဒီ မဲ။

6 မဲ ဇဝ်ဖြာ၊ အုဝ် မှာန့်၊ တဲး မဲ ထူမ် ဂြုဝ်း ပီ ဆာခိုဝ် အုဝ်၊ တဲး မဲ ဇဝ် ဂေဇူ အုဝ်။

7 ပန် ဒီ ဇမ် အုဝ် ဒုက် တာင်၊ အုဝ် ဒီ ဆာခိုဝ် ဒီ မဲ။ မဲ ဇဝ် ဒီ ဘော ထူမ် ဂြုဝ်း ပီ ဆာခိုဝ် အုဝ်။

8 ခဲ့ ကွယ် ဇဝ် ပီ ကြိုပ် ဒူအီ ဟဝ်၊ အာဝ် မိုဝ်း အီ ပီ မဲ ဇဝ်။ ပီ ဘူင် ဂေ အာဝ် ပီ ပီ ဘူင် မဲ ဇဝ်။

9 မဲ ဇဝ်ဖြာ မဲ ဟဲ့ ဖာန် ဘ့လေး ဂေ အာမျုဝ် ဒူအီ ဒွန် မျုဝ်၊ တဲး ဂေ ဘောကာဂ့လျီတ် တး ကြိုပ် မဲ ဇဝ်။ ဂေ ဒီ ဘော အိူပ် မဲ ဇဝ်။

10 ခုဝ်၊ န့ မုး မဲ ဇဝ်ဖြာ အီ တာင်။ န့ မုး မဲ ဇဝ်ဖြာ အီ ဘူင် နာ မွှိုမ် အာမ် ကာဆဝ်။ န့ မုး မီ မဲ ဇဝ် အူ ကာဒင် အီ မုး ဇဝ်ဖြာ အာခါခ်ု။

11 တဲး မဲ ဇဝ်ဖြာ ဝီ မာနုဝ် အုဝ် လွင် ပီ အိုင် မဲ၊ တဲး အုဝ် ပွိုန် ဒီ ဘူင် နာ မုး နာ မှာန်။ မဲ တဲး အုဝ် မိုဝ်း နဝ်း ဆီ ဒူပ် မီ မဲ။ တဲး အုဝ် ရုဝ်ဆေ မဲ။

12 ဘော နဝ်း ဘော ဖွိုမ် အုဝ် ဘော တူတ့် ဒီ အိူပ် မဲ ဇဝ်။ အုဝ် ဒီ အိူပ် မျုက် မဲ ဇဝ် ဆေဆေ။

13 ခုဝ်၊ မဲ ရွက့် ကာဆဝ် အုဝ်။ မဲ မိူဝ် ဟဲ့ ချွတ် လေး အုဝ် ခဲင် မိူင် မာရာန။

14 အိုယ် မဲ ဇဝ်ဖြာ၊ န့ မိုဝ်း ဒူအီ ပီခိုက် ဂေ၊ ဂေ ဟဲ့ ဘူင် ကာဘး ဒီ အုဝ်။ ဖိုင် ဂေ ဒူအီ အီ ဟာယ် ကာဆဝ်၊ ဂေ ဟဲ့ ခြာမ် ဒီ ငဝ်း ယမ် အုဝ်။ ဂေ မုး ဒူအီ ယီ တူ ရုဝ်ဆေ မဲ ဇဝ်။

15 န့ ယီ မုး မဲ ဇဝ်၊ မဲ မုး ဇဝ်ဖြာ အီ ရွက့် ကာဝေ ယေ။ မဲ ဂေဇူ ယေ၊ မဲ တူ ငှိုယ် ရူ။ မဲ ဘော မိုဝ်း နဝ်း မှာန် ဆေဆေ။

16 တဲး မဲ ဇဝ် ယွတ် အုဝ်၊ ကာဝေ အုဝ်။ တဲး မဲ ဒွါ ပ့လူမ် ဒွါ ဟဲန့် ဒီ အုဝ် အီ မုး ဒဲစေန့် မဲ။ တဲး မဲ ချွတ် အုဝ်။

17 တဲး မဲ ဘူင် နာ မွှိုမ် ဒီ အုဝ်၊ တဲး ရန်ဆူ အုဝ် ယိုဝ် လွင် အန် တီ၊ တဲး ဂေ ဝီ ဆာယ် အီ။ ခုဝ်၊ မဲ ဇဝ် ဟဲ့ စွယ် အုဝ်၊ ဟဲ့ တဲး နဝ်း အုဝ် ဝီ ဒါခိုယ်။