1 အိုယ် မဲ ဇဝ်ဖြာ၊ မဲ ဇဝ် ဟဲ့ ရွက့် ကာဝေ ဒူအီ ခဲင် မိူင် ပီ အိုပ် မဲ။ မဲ ဟဲ့ တဲး ဒူအီ အီဆာရေလ ဝီ ပွိုန် တူတ့် ဒွန် မျုဝ် ပဲ့ ဟဲ့ ဒွိုမ် စှိုမ် ဂေ။

2 မဲ ဇဝ် ဟဲ့ ဂဝ်း ဝဲန် မှာပ် ဂေ ဒူအီ ပီ အိုပ် မဲ။ ခဲ့ ပီ လုတ့် ဂေ ဒွန် မျုဝ်၊ မဲ ဇဝ် ဟဲ့ ဟွတ့် ခ့ဝါင် ဒီ ဂေ။

3 ခဲ့ ပီ ဒွိုမ် ရူ မဲ၊ မဲ ဇဝ် ဟဲ့ ဟွတ့် ဝဲန် တူတ့်။ နဝ်း ရူ ကာဆဝ် မဲ၊ မဲ ဟဲ့ တဲး န့ ဝီ ယေန်။

4 အိုယ် မဲ ဇဝ်ဖြာ၊ မဲ မုး ဇဝ်ဖြာ အီ ချွတ် ယေ။ ယေ မှာန့်၊ တဲး မဲ ဇဝ် ဝီ စွယ် ယေ။ ခဲ့ ရူ မဲ ဇဝ် ဒီ ယေ၊ မှာန့်၊ တဲး န့ ဟြာယ်။

5 မဲ ဇဝ် ဆီ ရူ ဒီ ယေ ဆေဆေ။း မဲ တူ ဆီ တဲး နဝ်း ရူ တီ ယေန် ဒေါ မှဝ်။း

6 မဲ ဇဝ် တူ ဆီ တဲး ယေ ဝီ မိုဝ်း ပ့လူမ် မိုဝ်း ဟဲန့်၊ တဲး ယေ ပွိုန် ဒီ ဝီ ဘျုဝ် ဒါခိုယ် ဒူပ် မဲ ဇဝ်။း

7 အိုယ် မဲ ဇဝ်ဖြာ၊ ယေ မှာန့်၊ တဲး ယေ ယိုဝ် နဝ်း ရွက့် နဝ်း ကာဝေ မဲ ဇဝ် ဒီ ယေ၊ တဲး န့ ဘော ချွတ် ယေ။

8 အုဝ် ဒီ ထူမ် ဂြုဝ်း ပီ ကာလာင် ဇဝ်ဖြာ အီ မုး ဒါ ကာညာ အီ အိုပ် အုဝ်။ အန် ဇဝ် တဝ်း ဒီ တဲး န့ ဝီ ဒါခိုယ် ဒီ ဒူအီ ပီ အိုပ် အန်၊ အီ ဆီငါ ဘွတ်။ ဆေ ဂေ ဘိုင် ဆီချာ အန် ဇဝ်၊ တူ ဝီ ဘ့လိူင် ဂြုဝ်း အန်၊ အန် ဇဝ် ဒီ ဘူင် ပါယ် တီ။

9 ဇဝ်ဖြာ ဒီ ဘော စွယ် ဘော ချွတ် အာခ်ု မှာန် ဂေ အီ ရုဝ်ဆေ အန်။ အန် ဇဝ် ဒီ ဘော တဲး အာဖုင် ဒင်ခုဝ် အန် ကွယ် ရိုမ် ဒူပ် ဂေ။

10 ပါယ် တီ၊ ဇဝ်ဖြာ အီ ရွက့် ဆေဆေ ဘော ဒူအီ အီ မိုဝ်း နဝ်း မှာန်၊ ဂေ ဒီ လာယ် ကာတုန့်။ ဘော ဂေ အီ မိုဝ်း နဝ်း ဆိူဝ်၊ ဂေ ဒီ ပွိုန် နဝ်း ဂတ် ဂျီတ် ပီ ဒွါ ဇဝ်ဖြာ။

11 ပါယ် တီ၊ ဇဝ်ဖြာ ဒီ ဘော ယိုဝ် နဝ်း ဆိူဝ် နဝ်း မှာန် ဂေ ဒူအီ အီ ကွယ် ဒဲင် ကာဒါယ်။ ဟဲ့ ဟွတ့်၊ ဇဝ်ဖြာ ဒီ ဝီ ဒွါ လူင် နာ မုး နာ မှာန် အီ ကွယ် ဒီ အန်။

12 န့ မှာန် အာခါခ်ု၊ ဇဝ်ဖြာ ဒီ ဒွါ နာ ဘွတ် နာ မွှိုမ် ဒီ အေ။ အန် ဒီ တဲး ကာဒါယ် မိုဝ်း ဘ့လေ ဘွတ် ဘ့လေ မွှိုမ်။

13 ဇဝ်ဖြာ တဲး နာ မုး နာ မှာန် အန် ယဲတ့် ဒီ အာတ့်။ ဟဲ့ ဟွတ့်၊ အန် ဒီ တး ဒူင် ကွယ် ဒူအီ၊ တဲး န့ ပီ အန် ယး န့တေန့် အန်။