1 အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်။ အုဝ် ရွက့် ကာဆဝ် ဒူင် ကွယ် မဲ ဇဝ်။

2 နဝ်း ဖွိုမ် အုဝ် ဟဲ့ ဒီကေန် ဟုဝ် မဲ ဇဝ်ဖြာ။ ဘော ဒုဝ် ဘော နဝ်း အုဝ် ဒီ တဝ်း မှုဝ် ဒါခိုယ် အီ အိူပ် မဲ ဇဝ်၊ အီ မုး ဇဝ်ဖြာ အီ အိမ်။

3 အိုယ် မဲ ဇဝ်ဖြာ၊ မဲ မုး ဇဝ်ဖြာ အီ အိုပ် အုဝ်။ မဲ မုး ဘော ဇဝ်ဖြာ ပီ ကြိုပ် အုဝ်။ မာဆီလဝ်း ဘော ပွိုန် ဘူင် ဒူင် ဒီ ကွယ် ဂေ ဒီ ဒူင် ကွယ် မဲ။ မာလေဝ် ဘော ဘူင် ကာဟုန် ဂေ ဒဲင် ကာစှူင့် လှူ ဒီ မဲ ဇဝ်၊ တဲး ဂွန် ဂေ ပွိုန် ဒီ ကွယ်။

4 ပါယ် တီ၊ ဘော ဂေ အီ ကွယ် ခဲင် ဟုဝ် ဘွတ် မဲ ဇဝ် တီ၊ ဂေ ဟဲ့ ဘျုဝ် ဒါခိုယ်။ ဂေ ဘော တဝ်း မှုဝ် အီ အိူပ် မဲ ဇဝ်ဖြာ ဆေဆေ။

5 ဂေ အီ ဘိုင် မဲ ဇဝ်၊ မဲ ဒီ ဒွါ ပ့လူမ် ဒွါ ဟဲန့် ဒီ ဂေ။ ဂေ ဟဲ့ ဒါခိုယ်။ ဂေ ဘော မိုဝ်း နဝ်း ဆီ ဟာဝ် ဒူပ် န့တေန့် အီ ဟာဝ် ဇမ် ဒီ နွန် ဇီအူန်။

6 ဒေါ ဟာဝ် ဂေ ဒူပ် န့တေန့်၊ ဂေ ပီ ဘော ကာလုဝ်း ဒီလယ့် ဟဲန့်၊ ယီ ပီ ဂေ ဟာဝ် ခဲင် ပြဲ ဒူပ် ဘ့လဲင် အီ မိုဝ်း အိုမ် ကိူန်။ န့ ဘော ပီ ဂ့လာယ် ကာမာယ် ဟဲ့ စုဝ်း၊ တဲး န့ ဂတ် ဂျီတ်။

7 ဂေ ပီ ဘော ဟာဝ် တူင့် ခဲ့ မှဝ်၊ ဂေ ယီ ဝဲ မိုဝ်း ပ့လူမ် မိုဝ်း ဟဲန့် ကာပွါ။ ဂေ ဒွန် အီ ဒီ ဘော ယိုဝ် ဇဝ်ဖြာ အီ ကွယ် ဒဲင် နွန် ဇီအူန်။

8 အိုယ် မဲ ဇဝ်ဖြာ အီ အိုပ် တူတ့် အီ မိုဝ်း ပွုန်၊ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်။ မဲ ဇဝ် အီ မုး ဇဝ်ဖြာ ပီ ကြိုပ် အာကူပ်၊ တဲး ဂြုဝ်း ပီ မှာန့် အုဝ် လိုဝ်း ဒီ မဲ။

9 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ယွတ် စွယ် ခုန်ဒီခမ် ပဲ့ ဟဲ့ ရဝ်း မဲ ဇဝ်။

10 ဆေ ယေ ကွယ် ခဲင် ဟုဝ် မဲ ဇဝ် အာဒါ အူ ဆီငဲ၊ န့ မွှိုမ် လွှိုမ် ကွယ် ယေ နာ တေတ့် နာ တ အူ ဟြဲန့် ဆီငဲ။ အုဝ် ဘော အိုင် ဒီ ဘ်ု မာလုဝ်း ဟုဝ် မဲ ဇဝ်၊ လွှိုမ် အိုင် အုဝ် ဒီ ကွယ် ခဲင် ကာင် ဂေ ဒူအီ မိူက် ဒူအီ ဟာယ်။

11 ဇဝ်ဖြာ ဘော မုး ဒါ ကာညာ အီ အိုပ် ယေ ဘော ဘ်ု ယေ။ အန် ဘော နပ် ဒီ ဂေဇူ ယေ ဘော တဲး ယေ မိုဝ်း ဆာရေ။ ဆေ န့ ဘော မိုဝ်း နာ ဘွတ် နာ မွှိုမ်၊ အန် ဇဝ် မိူဝ် တူ ဂြူပ် အုန် ဒီ အန်။ အန် ဒွါ တူတ့် ဒီ ဂေ အီ မိုဝ်း နဝ်း ဆိူဝ် နဝ်း မှာန်၊ တူ တဲး အီ ပွိုန် ကာလာင် နာ တူ မွှိုမ် လွင် အန်။

12 အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ ဂေ အီ ဘိုင် မဲ ဇဝ်၊ ဂေ ဒီ ဘျုဝ် ဒါခိုယ်။