1 အိုယ် မဲ ဇဝ်ဖြာ၊ အုဝ် မှာန့်၊ ကွဲ့ တဲး မဲ ဇဝ် ကွယ် နှိမ် ပါယ် တီ။ ကွဲ့ တဲး မဲ ကွယ်၊ တူ တဝ်း မာဆေ။

2 တဲး မဲ ဇဝ် ဘော ယွတ် ခဲ့ ဟဲ့ ဆီနန် ဆီနိူင် ရန်ဆူ မဲ။ ဂေ အီ ဇွင့် မဲ ဇဝ်၊ ဂေ ဘော ပီကျ ဂေ၊ တဝ်း ဒီ ကာခဲန့် ဒီ မဲ ဇဝ်။

3 ဂေ ခြာမ် ဒီ ပီလွှက့် ဒီ ဒူအီ ပီ အိုပ် မဲ ဇဝ်။ ဂေ ဘော ခြာမ် ဒီ ဘူင် ကာဘး ဒီ ဒူအီ ပီ ရွက့် မဲ ဇဝ်။

4 ဂေ ဘော တဝ်း၊ “တး တး အေ၊ တဲး အေ ဒိုဝ်း ဝဲန် ဂေ။ ကွဲ့ တဲး န့ ဆီ မိုဝ်း အီ နမ်လှုဝ်း ဒူအီ အီဆာရေလ ဒေါ မှဝ်။”

5 ဂေ ဟဲ့ ဘဲန် အူ နဝ်း၊ ဟဲ့ လာယ် ဖြူမ် ဒီ ဘဲန် ရန်ဆူ မဲ ဇဝ်။

6 န့ မုး ဒူအီ အေဒူမ်၊ ဒူအီ အာမျုဝ် အာဆာမာန်၊ ဒူအီ မုဝ်အာပ်၊ ဒူအီ အာမျုဝ် ဟာကာရာ၊

7 ဒူအီ အာမျုဝ် ကေပါလာ၊ ဒူအီ အမ်မူန်၊ ဒူအီ အာမာလေက်၊ ဒူအီ ဖီလီထီ ဘော ဂေ ဒူအီ ခဲင် မိူင် ထူရုဝ်။

8 ဘော ဂေ ဒူအီ အာဆူရာ ဟဲ့ ဟာဝ် ရိုမ် ဒူပ် ဂေ၊ တဲး ဂေ စွယ် ဂေ ဒူအီ အီ မုး လှာန် အာလူတ် တွိုန်။

9 ယေ မှာန့်၊ တဲး မဲ ဇဝ် ဘူင် ဒီ ဂေ၊ တဲး န့ ပီ ပီ ဒွိုမ် ဘူင် မဲ ဒီ ဒူအီ မီဒီအာန် ဘော ဒီ ဘုဝ် တာင် အီ စိူဝ် အာဆီဆာလ ဂါယ် ခုန်ဒီခမ် အာယာဖိန် ဒေါ ကွယ် ဂေ ခူပ် ဘ့လဲင် အိုမ် ကီဆူန် တွိုန်။

10 မဲ ဇဝ် ဟဲ့ ဘူင် တဲး ဂေ ယမ် ဒီ ဒူင် စိူဝ် အိန်တောလ တွိုန်၊ တဲး ဒုဝ် ယမ် ဂေ တီ ဝီ အမ် လာတ့်၊ ဘဲန် တူတ့် ဖုန် ကာဒါယ်။

11 တဲး မဲ ဇဝ် ဘူင် ဒီ ဂေ ဒါ တာင် အီ ယဲတ့် ဂေ၊ တဲး န့ ပီ အာအောရာဖ ဂါယ် အာဇေဖ တွိုန်။ တဲး မဲ ကာဂုဝ်း ဒီ အာမူ အာမာတ် ဂေ၊ တဲး န့ ပီ ဒေါ ကာဂုဝ်း မဲ ဒီ ခုန်ဒီခမ် အာစေဖာဟာ ဂါယ် အာစာလာမုန် အီ ဟဲ့ ဟွတ့် ယမ် တွိုန်။

12 ဒူအီ ဂေ တီ၊ ဂေ ဟဲ့ ဒွိုမ် တဝ်း၊ “တဲး အေ ဒိုဝ်း ကာဒါယ် ပီ အိုပ် ဇဝ်ဖြာ ဒီ အေ။”

13 အိုယ် မဲ ဇဝ်ဖြာ၊ တဲး မဲ ဇဝ် ဘြတ် ဝဲန် ဂေ၊ တဲး န့ ပီ အီ ဘြတ် ဝဲန် ကာပုး ဂေ ဒျီပ် ငှုဝ် ပီ ဘုတ် ခုန်။

14 တဲး ဂေ စှိုမ် ပီ ငဝ် ကာဆိုမ် ပြဲ။ တဲး န့ ဘော ပီ ပ့လဲ့ ငဝ် ပီ ဒုဝ့် အီ မာန် ဟြွိုမ်။

15 တဲး မဲ ဇဝ် ဘော ညွန် ဂေ ပီ ခုန် တာင် တး ဘုတ် ဂေ။ တဲး ဂေ ဘော ယုဝ် ကာဆဝ် ပီ ပီ ယုဝ် ဂေ ခုန် လာင်။

16 တဲး မဲ ဇဝ် ဘူင် တဲး ဂေ ကော လုဝ် ဆာယ် အီ၊ တဲး ဂေ ကော ဝီ လှုဝ်း မဲ ဇဝ်။

17 တဲး ဂေ ဇမ် ဒုက် တာင် ဘော ယုဝ် ဆေဆေ။ တဲး ဂေ ဘော ယမ်၊ စှိုမ် ဆာရေ။

18 အိုယ် မဲ ဇဝ်ဖြာ ဘွတ်၊ တဲး ဂေ ဘော နပ်၊ မဲ မုး အန် ဇဝ်။ မဲ ဇဝ် မုး ဇဝ်ဖြာ အူ ကာဒင် အီ အိုပ် တူတ့် ဒွန် မျုဝ်။ အာဝ် ဟူ မိုဝ်း ပေါ အူ ကာဒင်။