1 တဲး အေ တဝ်း မှုဝ် ဒီ ဇဝ်ဖြာ။ အန် ဇဝ် ဘော မုး အီ တဲး ပ့လူမ် တဲး ဟဲန့် ဒီ အေ။ တဲး အေ တဝ်း မှုဝ် ဒါခိုယ် ဒီ ဇဝ်ဖြာ ပီ ကြိုပ် အာကူပ်။

2 တဲး အေ တဝ်း မှုဝ် အီ အိူပ် အန် ဇဝ်။ တဲး အေ က်ု ဂြိုင် ဒီတဲတ်၊ ဘး ဒိင် ဒွန် မျုဝ် အီ ဟမ် ဒါခိုယ်။

3 တဲး အေ ဘုတ် ဝဝ် ဒေါ မုး ဆီငဲ ဘ့လွယ် တာင်၊ အီ မုး ဆီငဲ မာဂျီန် ကာမာယ် ဘော ဆီငဲ မာဂျီန် ကာလင်။

4 န့ ဘော မုး ဟိတ် ဂေ ဒူအီ အီဆာရေလ ပဲ့ ဟဲ့ ဒမ် အုန် ဇဝ်ဖြာ ဒီ အာကူပ်။

5 အန် ဇဝ် ဟဲ့ စ်ု ဂေ လှုက်လှာန် အာယုဝ် ဒူပ် ဟိတ် တီ ဒေါ ကာဂုဝ်း အန် ဒီ ဒူအီ ခဲင် မိူင် အဲဂိုပ်။ ဒေါ အန် တီ အုဝ် ဟဲ့ ယိုဝ် ဂြုဝ်း ဒူအီ ပီ တူ နပ် အုဝ်။

6 အန် ဇဝ် မိူဝ် ဟဲ့ တဝ်း၊ “အုဝ် ဟဲ့ ဒိုဝ်း ဝဲန် ပီ လုဝ် ခမ် ဘေ၊ အီ ပီ ကြုဝ် စန် အီ ကွယ် ဒဲင် ယ ဘေ။ ဒဲ ဘေ မိူဝ်၊ အာဝ် ဟူ လုဝ် စုဝ့် ခွန် အီ ဟပ် မာဝ်။

7 ဒေါ ဇမ် ဘေ ဒုက် တီ၊ ဘေ ဟဲ့ ဒဲ့ အုဝ်။ ဟဲ့ ဟွတ့်၊ အုဝ် ဟဲ့ ဒိူတ် လေး ဘေ။ အုဝ် ဟဲ့ အိုဝ် ဂြုဝ်း ဘေ ဒေါ ကွယ် အုဝ် ခဲင် န့အု ဘော ဟမ် ကာနမ်။ အုဝ် ဟဲ့ ထေဝ် နဝ်း ဘေ ဒေါ ကွယ် ဘေ ခူပ် အိုမ် မေရီဘာ တွိုန်။

8 အိုယ် ဘေ ဒူအီ ပီ အိုပ် အုဝ်၊ တဲး ဘေ ထူမ် ဂြုဝ်း အုဝ်။ အုဝ် ဒီ ဒွါ ဆာဒိက် ဒီ ဘေ။ အိုယ် ဘေ ဒူအီ အီဆာရေလ၊ ကွဲ့ တဲး ဘေ ဝဲန် ဂြုဝ်း အုဝ်။

9 ကွဲ့ တဲး ဘေ အုန် အာရိုပ် ဇဝ်ဖြာ ပီ ကြိုပ် အီ ဟဝ်၊ ကွဲ့ တဲး န့ ကွယ် ဒူင် ကွယ် ဘေ။ ကွဲ့ တဲး ဘေ ကြိုပ် ဇိုဝ် တီ ဒေါ မှဝ်။

10 အုဝ် အီ မုး ဇဝ်ဖြာ ပီ ကြိုပ် ဘေ၊ အုဝ် အီ ဒိုဝ်း လေး ဘေ ခဲင် မိူင် အဲဂိုပ်။ တဲး ဘေ ဘိုင် အုဝ်၊ အုဝ် ဒီ ဝီ ဒွါ တူတ့် ဒွန် မျုဝ် ပီ လုဝ် ဘေ၊ တဲး န့ ပီ ဂွန် မာဆိမ် ဟဲ့ အာင် မူတ့်၊ တဲး မာ အန် ဟပ် အန် ဟူမ်။

11 န့ ယီ မုး ဒူအီ အီ ကြိုပ် အုဝ်၊ ဂေ တူ ထူမ် ဂြုဝ်း အုဝ်။ ဂေ ဒူအီ အီဆာရေလ တူ ဆီ ယူမ် အုဝ်။

12 ခုဝ်၊ အုဝ် ဟဲ့ တဲး ဂေ ဒူပ် နဝ်း ဒိူဝ် ဂေ တီ၊ တဲး ဂေ ဘူင် ပီ ခြာမ် ဂေ။

13-14 အုဝ် ဆီ တဲး ဒူအီ အာမျုဝ် အုဝ် ထူမ် ဂြုဝ်း အုဝ်။ ဆေ ဂေ ခမ် ဒီ ဘူင် မီ ခဲ့ တီ၊ အုဝ် ဒီ တး၊ ဟုဝ် တဝ် ရန်ဆူ ဂေ ခြန် ခြန်။ ဆေ ဂေ ခမ် ဒီ ဂူမ် အုဝ်၊ အုဝ် ဒီ အွင် ဒီ ပဲ ရန်ဆူ ဂေ။

15 ပန် တီ ဂေ အီ ဇွင့် ဇဝ်ဖြာ၊ ဂေ ဒီ ဝီ ယုဝ် အန်၊ ဝီ တး ခြိုပ်ခြဝ် ဒီ အာတ့် အန်။ အန် ဇဝ် ဒီ ဒမ် မှာပ် ဒီ ဂေ၊ တဲး ဂေ ခမ် ဆေဆေ။

16 န့ ယီ မုး ဘေ၊ ဘေ ဒီ ပွိုန် ဒီ ဟူမ် ဘူမ် အီ ဆီငဲး ကာဆဝ်။ အုဝ် ဒီ ဒွါ ဘော ငါမ် မာဖျီန် အီ ကွယ် ခဲင် ပြဲ၊ တဲး ဘေ ပွိုန် ဒီ ဟူမ် ခဲ့ ပီ ဆီ ဟူမ် ဘေ။”