1 အိုယ် မဲ ဇဝ်ဖြာ အီ အိုပ် ဒူအီ အီဆာရေလ၊ မဲ ပီ ဒူအီ အီ ဟျီင် မာဘူ၊ တဲး မဲ ထူမ် ဂြုဝ်း ယေ။ မဲ ဇဝ် ဟဲ့ ယဲတ့် လှုက်လှာန် အာယုဝ်၊ တဲး န့ ပီ ဒူအီ အီ ဟျီင် မာဘူ ယဲတ့် မာဘူ အန်။ မဲ ဇဝ် အီ ကွယ် ကာတဲ အာမူ အာမာတ် အီ စိူဝ် ခေရုပ်၊ တဲး အာရူင် ဘ့လာင် မဲ ဇဝ် လိုဝ်း။

2 ဂေ ခြိုဝ် အာအေဖာရိမ်၊ အာဘေန်ယာမ် ဘော အာမာနာဆေ၊ တဲး ဂေ ယိုဝ် အာဖုင် ဒင်ခုဝ် မဲ ဇဝ်။ တဲး မဲ ဘျ ပွုန် မဲ၊ တဲး မဲ တး စွယ် ယေ။

3 အိုယ် မဲ ဇဝ်ဖြာ၊ တဲး မဲ ဇဝ် စွယ် ယေ၊ တဲး ယေ ဝီ မိုဝ်း ပ့လူမ်၊ တဲး ယေ ဝီ ယိုဝ် ဂုင် ဂေဇူ မဲ၊ တဲး မဲ ဝီ ချွတ် ယေ။

4 အိုယ် မဲ ဇဝ်ဖြာ အီ အိုပ် တူတ့် မျုဝ် အီ မိုဝ်း ပွုန်၊ ပန် မှဝ် မဲ ဇဝ် ဒီ ဝဲန် နဝ်း ရူ မဲ။း ပန် မှဝ် မဲ ဒီ ဝီ ထူမ် ပီ ဆာခိုဝ် ဂေ ဒူအီ အာမျုဝ် မဲ။း

5 န့ ပီ မဲ ဇဝ် ဟဲ့ တဲး ဂေ ဒျီင် အိုမ် ငါယ် ဂေ၊ တဲး န့ ကာဒါင် ပီ ဒီ ဟူမ် ဂေ။ မဲ ဇဝ် ဟဲ့ တဲး ဂေ ခမ် ဒုက် ကိူန် ကာဆဝ်။

6 မဲ ဇဝ် ဟဲ့ တဲး ဂေ အီ ကွယ် ခူပ် ယေ၊ ဝီ ကာဂုဝ်း မိူင် ယေ။ ဂေ ရန်ဆူ ယေ ဘော ကာညး နဲန ယေ။

7 အိုယ် မဲ ဇဝ်ဖြာ အီ အိုပ် တူတ့် မျုဝ် အီ မိုဝ်း ပွုန်၊ ယေ မှာန့်၊ တဲး မဲ ဇဝ် စွယ် ယေ၊ တဲး ယေ ဝီ မိုဝ်း ပ့လူမ်၊ တဲး ယေ ဝီ ယိုဝ် ဂုင် ဂေဇူ မဲ၊ တဲး မဲ ဝီ ချွတ် ယေ။

8 မဲ ဇဝ် ဟဲ့ တဲး ဒူအီ အီဆာရေလ လေး ခဲင် မိူင် အဲဂိုပ်။ န့ ပီ မဲ ဟဲ့ ရိုတ့် လေး ဟေ မာငုန်။ မဲ ဝီ ဟုဝ် တဝ် ဂေ ဒူအီ အာမျုဝ် ဟဝ်၊ ဘော ဝီ ဆမ် ဟေ မာငုန် ခဲင် မိူင် နီ။

9 န့ ပီ မဲ ဇဝ် ဟဲ့ ဒုဝ်း ပြဲ ဘော လုဝ့် ကာဒါယ်၊ တဲး န့ ပွိုန် ဆမ်၊ တဲး ရျီး ဟေ မာငုန် ပွိုန် ဒီ ဟာဝ် လိုက်၊ တဲး န့ ဘော ဘြဲ ကာလတ့် ဘော မိူင်။

10 ဒီ နွန် ဒွန် နွန် ဘော မိုဝ်း ယာပ် ဟေ တီ။ ရာ အန် ဘော ဇမ် ဒူင် ကွယ် ဟေ အာရိတ် အီ တာင် ကာဆဝ်၊ အီ ကွယ် နာ ကွာ။

11 န့ ဘော ပီ ရာ အန် ဘော ဘြဲ ဟာဝ် ဒွန် ဘ့လာက်၊ ကော ဇမ် အိုမ် နမ်မုက်ဆာရာ။ ကာဒဲ့ အန် ကော ဇမ် ဘ့လဲင် အိုမ် အူဖာရာတ်။

12 အိုယ် ဇဝ်ဖြာ၊ မှဝ် န့ ပါယ် ပီ ဝီ ပျာတ့် ဝဲန် မဲ လူင့် မာန် မာငုန် တီ။း မှဝ် န့ ပါယ် ပီ ခ့ဝါင် မဲ ဂေ အီ ဟဝ် တး ဘေတ့် ဘ့လေ အန်။း

13 မာလေတ့် ပြဲ ဟဲ့ ဟွတ့် ကုန် န့ရိုတ့် ရျီး အန်။ ခဲ့ ကွယ် မာဒုဝ် ပြဲ ဟဲ့ ဟွတ့် ဟူမ် တူတ့် ဘ့လေ အန်။

14 အိုယ် မဲ ဇဝ်ဖြာ အီ အိုပ် တူတ့် မျုဝ် အီ မိုဝ်း ပွုန်၊ ယေ မှာန့်၊ တဲး မဲ ဝီ တး ဒူင် ကွယ် ယေ။ မဲ ဇဝ် အီ ကွယ် ခဲင် ဂါင်ဟြာဝ်၊ တဲး မဲ ဘော ယွတ် လူင် ယေ၊ တဲး မဲ ဘ်ု ယေ ဒူအီ အာမျုဝ် မဲ အီ ပီ ဟေ မာငုန် တီ။

15 တဲး မဲ ဇဝ် ဘော တး ယွတ် လိုမ်လာ ဟေ မာငုန် ပီ ဆမ် အုန် မဲ ဇဝ်။ တဲး မဲ ယွတ် မဲန် ယေ ပီ ဂွန် အီမာယ် ပီ ဟျီင် မဲ။

16 န့ ပီ ဂေ ရန်ဆူ ယေ ဟဲ့ ဂ်ု ကေး ဟေ မာငုန် တီ၊ ဝီ ဒုဝ့် ခဲင် ငဝ်။ ဆေ မဲ ဇဝ် ယီ အေး ဂေ၊ ဂေ ဒီ ဘော စှိုမ်။

17 တဲး မဲ ဇဝ် ဘ်ု ရိတ် ဒူအီ ပီ ရဝ်း မဲ။ အီ မုး ဂွန် ဒူအီ ပဲ့ ဟဲ့ တဲး မဲ ဇဝ် ဘဲန် ဒူအီ အာမျုဝ် မဲ။

18 ပန် တီ ယေ မိူဝ် တူ ဝီ ကာဂဝ်း ကာယဝ်း ဒီ မဲ။ ယေ မှာန့်၊ တဲး ယေ ဝီ မိုဝ်း ပ့လူမ် ကာမာယ်။ ယေ ဒီ ဘော အိူပ် ဘော ကြိုပ် မဲ ဇဝ်။

19 အိုယ် မဲ ဇဝ်ဖြာ အီ အိုပ် တူတ့် မျုဝ် အီ မိုဝ်း ပွုန်၊ ယေ မှာန့်၊ တဲး မဲ စွယ် ယေ၊ တဲး ယေ ဝီ မိုဝ်း ပ့လူမ်၊ တဲး ယေ ဘော ယိုဝ် ဂုင် ဂေဇူ မဲ ဇဝ်၊ တဲး န့ ဘော ချွတ် ယေ။