1 အိုယ် ဇဝ်ဖြာ၊ ဂေ ဒူအီ အာမျုဝ် ဟဝ် ဟဲ့ ဟွတ့် တး ဇမ် ခဲင် မိူင် ပီ အိုပ် မဲ ဇဝ်။ ဂေ တူ ရုဝ်ဆေ ဟုဝ် မဲ ဇဝ်၊ ဟဲ့ ဘူင် တဲး န့ ချဝ့်။ ဂေ ဟဲ့ ပျာတ့် ဘော မိူင် ယေရူဆာလဲမ်။

2 ဂေ ဟဲ့ ငဝ်း ယမ် ဒဲစေန့် မဲ ဇဝ်၊ ဝီ တဲး မာဆိမ် အီ ကွယ် ခဲင် ဘ့လေန့် ဟူမ်။ ယင် ဂေ ဒူအီ အီ ဆီငါ ဘွတ် တီ ဟဲ့ ဘဲန် ပီ ဒီ ဟူမ် မာဒုဝ် ပြဲ။

3 နှာမ် ဂေ ဒူအီ အာမျုဝ် မဲ ဇဝ် ဟဲ့ ခုင်ခြဝ်း ဒွန် နာ ဒွန် ပ့လုဝ့် ခဲင် မိူင် ယေရူဆာလဲမ်။ န့ ဟဲ့ လှဲ ပီ အိုမ်။ အာဝ် မိုဝ်း အီ ဒိပ် ဒူအီ ယမ် ခေါ အူ ဝီ။

4 ဂေ ဒူအီ အာမျုဝ် ဟဝ် အီ ကွယ် ခူပ် ယေ၊ ဂေ ကာညး ယေ၊ နဲန ယေ။

5 အိုယ် မဲ ဇဝ်ဖြာ၊ မဲ ဒီ ဘော ရူ ဒီ ယေ ဆေဆေ။း ပန် မှဝ် မဲ ဇဝ် ဒီ ဝဲန် နဝ်း ကာဟဝ်း မဲ တီ။း

6 အုဝ် မှာန့်၊ တဲး မဲ ဇဝ် ဘ့လေး နဝ်း ရူ နဝ်း စာဝ် မဲ တီ ဒီ ဂေ ဒူအီ အာမျုဝ် ဟဝ်၊ အီ တူ ဘိုင် မဲ ဇဝ်၊ အီ တူ ဆာခိုဝ် ဂါဝ် ပွုန် မဲ ဇဝ်။

7 ခုဝ်၊ န့ မုး ဂေ အီ ဟဲ့ ငဝ်း ယမ် ဒူအီ မဲ ဇဝ်။ ဂေ ဟဲ့ ပျာတ့် ဘော မာန် မိူင် ပီ အိုပ် မဲ ဇဝ်။

8 မှာပ် ပဲ့ ဟဲ့ ဘူင် ဒါ ဒါ ယေ၊ ကွဲ့ တဲး ယေ ဝီ ခမ်။ ယေ မှာန့်၊ တဲး မဲ ဇဝ် ဝီ စွယ် ဝီ ကာဝေ ယေ ခြန် ခြန် ကူပ် ဟဲ့ ကာဒုး ယေ ဒုက် တာင်။

9 အိုယ် မဲ ဇဝ်ဖြာ၊ မဲ ဇဝ် မုး အီ စွယ် အီ ချွတ် ယေ။ ယေ မှာန့်၊ တဲး မဲ ဇဝ် ချွတ် ယေ ဘော ဂဝ်း ဝဲန် မှာပ် ယေ ဒွန် မျုဝ်၊ တဲး ဒွန် အီ ဝီ အိူပ် မဲ ဇဝ် အီ မိုဝ်း ပွုန် ဘော အာဖုင် ဒင်ခုဝ် တာင် ကာဆဝ်။

10 ကွဲ့ တဲး ဂေ ဒူအီ ဟဝ် ပွိုန် ဒီ တဝ်း၊ “မှဝ် ဇဝ်ဖြာ ဘေ ကွယ်။း” ယေ မှာန့်၊ တဲး ယေ ယိုဝ် မဲ ဇဝ် ဒမ် မှာပ် ဒီ ဂေ ဒူအီ အာမျုဝ် ဟဝ်၊ အီ ဟဲ့ ငဝ်း ယမ် ဒူအီ မဲ ဇဝ် တွိုန်။

11 ယေ မှာန့်၊ တဲး မဲ ဇဝ် ထူမ် ပီ ငှုန် ဂေ အီ ကွယ် ခဲင် ကာပိုမ်။ ဂေ အီ ဟဝ် ဟဲ့ ဟွတ့် ဆုင်ဖျာတ် ဒီ ငဝ်း ယမ် ဂေ။ တဲး ပွုန် မဲ ဇဝ် ယီ ချွတ် ဂေ။

12 တဲး မဲ ဇဝ် ဝီ ဘူင် ဝျီ့ ဒီ ဂေ ဒူအီ အာမျုဝ် ဟဝ် တီ ခဲ့ ဘူင် ဂေ ဒီ ယေ။ တဲး န့ ကော ဝီ လွှိုမ် ဘူ ဘုန်။ တဲး ဂေ ဝီ ခမ် ပဲ့ ဟဲ့ နဲန ဂေ ဒီ မဲ။

13 ပန် တီ ယေ အီ မုး ဒူအီ အာမျုဝ် မဲ ဇဝ်၊ ယေ အီ ပီ မာဘူ ပဲ့ ဟဲ့ ဟျီင် မဲ ဇဝ်၊ ယေ ဒီ အိူပ် မဲ ဇဝ် ဆေဆေ။ ယေ ဒီ ဘော ဒါင် ဂုင် ဂေဇူ ဒီ မဲ ဇဝ် ဒွန် စုဝ် ဒွန် ဘာန်။