1 ခဲ့ ကွယ် ဘေ ဒူအီ ဘောကာဂ့လျီတ်၊ တဲး ဘေ ထူမ် ဂြုဝ်း အုဝ်။ တဲး ဘေ ဘော ဆာဒိက် နဝ်း ဘေ၊ ထူမ် ပီ ကာလာင် အုဝ်။

2 အုဝ် ဒီ ကာလာင် ဂြုဝ်း အီ မိုဝ်း အာငျာန်၊ တဲး ဘေ ထူမ်။ န့ ဘော မုး ဂြုဝ်း အီ တူ လိုဝ်း ဒီ အီ ဆိန့် ဒေါ မွိုန်။

3 န့ မုး ဂြုဝ်း ပဲ့ ဟဲ့ ဒွိုမ် ယိုဝ် အေ၊ ဂြုဝ်း ပီ ဒွိုမ် ခဲ ဂုန့် မာ ဒါ ယာ အေ၊ တဲး အေ ထူမ်။

4 အုဝ် မိူဝ် တူ ချြီင် ဂြုဝ်း တီ၊ အုဝ် ဒီ ကာလာင် ဒီ လှုက်လှာန် အေ။ အုဝ် ဒီ ကာလာင် တဲး ဂေ ပေါ စုဝ် နပ် လွင် ပဲ့ ဟဲ့ ဘူင် အန် ဇဝ် အီ မွှိုမ် အာမ် ကာဆဝ်၊ တဲး ဂေ နပ် ဘော ပွုန် အန် ဘော အီ ကာအာပ် အိူပ် ဒွန် မျုဝ်။

5 အန် ဇဝ် ဟဲ့ ဒွိုမ် ဒွါ ဒါရာ ဒီ ဂေ ဒူအီ အီဆာရေလ။ အန် ဘော ဟဲ့ ကာလာင် အုန် ဒါရာ ဒီ ခြိုဝ် အာကူပ်။ အန် ဇဝ် ဘော ဟဲ့ ဒွိုမ် ကာလာင် ဒီ ဒါ ဒါ အေ၊ တဲး ဂေ ဝီ မာနုဝ် ဘော လှုက်လှာန် ဂေ။

6 အန် ဆီ တဲး ဒူအီ ဘဲန် စုဝ် ဘဲန် စုဝ် နပ် လွင် အန် တီ၊ ဝီ တဲး ဂေ အီ ဒီ ဂွိုတ် ဝါယ် နီ ဝီ ပွိုန် ဒီ ကာလာင် ဟာဝ် ဒီ လှုက်လှာန် ဂေ။

7 ဆေ န့ ပါယ် တီ၊ ဂေ ဒီ ဘော ညှိုမ် ဘိုင် ဇဝ်ဖြာ။ ဂေ မိူဝ် တူ ပိဝ် ပဲ့ ဟဲ့ ဒွိုမ် ဘူင် ဇဝ်ဖြာ။ ဂေ ဒီ ဘော ဒူပ် ဒါရာ ဇဝ်ဖြာ ဆေဆေ။

8 ဂေ လုဝ် ဘူင် ပါယ် တီ၊ ကွဲ့ တဲး ဂေ ပီ ဒါ ဒါ ဂေ အီ ဒိူဝ် ကာဆဝ်၊ အီ နပ် ဒီ ထဲန့်၊ နပ် ဒီ ဘူင် ကာဘး ဒီ ဇဝ်ဖြာ။ ဂေ ဘော မုး ဒူအီ အီ တူ ဒူပ် ဆီချာ ဇဝ်ဖြာ။ နဝ်း ဖွိုမ် ဂေ မိူဝ် တူ ညှိုမ် ဆီချာ ဇဝ်ဖြာ။

9 ဂေ ဒူအီ အေဖာရိမ် ဟဲ့ ဒွိုမ် ဂူင့် အ ဂေ ဘ့လာ၊ ကာဂုဝ်း ဒီ အီ။ ဂေ ယီ ဝီ ကာဒုး ဒီ တဝ် ဒေါ ကာဂုဝ်း ဂေ တီ။

10 ဂေ မိူဝ် တူ ဒူပ် ပဲ့ ဟဲ့ ဒွိုမ် ဒွါ ဂေ ကာဒိက် ဆတ်ဇာ ဒီ ဇဝ်ဖြာ။ ဂေ ဟဲ့ ဝဲန် ဂြုဝ်း ပီ ကာလာင် ဇဝ်ဖြာ ဒီ ဂေ။

11 ဂေ ဟဲ့ ပိဝ် ပဲ့ ဟဲ့ ဒွိုမ် ဘူင် ဇဝ်ဖြာ။ ဂေ ပိဝ် ဘော အီ မွှိုမ် အာမ် ပဲ့ ဟဲ့ ဒွိုမ် ယိုဝ် ဂေ။

12 ဒါ ဒါ ဂေ ဟဲ့ ဒွိုမ် ယိုဝ် အီ မွှိုမ် အာမ် ကာဆဝ် ပဲ့ ဟဲ့ ဘူင် ဇဝ်ဖြာ ဒီ ဂ့လင် စောနာ ခဲင် မိူင် အဲဂိုပ် တွိုန်။

13 ဒေါ အန် တီ ဇဝ်ဖြာ ဟဲ့ ဘူင် တဲး အိုမ် ဒီနှူင် ရေန့် ကာယဝ်း ဘဲန် အာ ဘ့လာက်၊ တဲး ဂေ ပွိုန် ဒီ ကာလုဝ်း ဟာဝ် ဒီ ကာတဲ။ အိုမ် တီ အာဝ် ဟူ လှဲ၊ ဝီ ဘဲန် ပီ ရဲင် စာ။

14 ကာတဲ ဆီငဲ ဇဝ်ဖြာ ဘော ဘူင် တဲး န့ မိုဝ်း န့အု ယဲတ့် ဒီ အာတ့် ဂေ။ ခဲင် မှိုဝ် အန် ဇဝ် ဘော တဲး န့ မိုဝ်း ဘ့လာင် ငဝ် အီ နှဲ န့တေန့် ဒူင် ဒီ ဟာဝ် ဂေ။

15 ဒေါ ကွယ် ဂေ ခဲင် ပြဲ ကာဟဝ်း၊ ဇဝ်ဖြာ ဟဲ့ တဲး မာဝ် ဒး၊ တဲး န့ လေး အိုမ် ကိူန်။

16 အန် ဇဝ် ဟဲ့ ဘူင် တဲး အိုမ် ကိူန် လေး ဒီ ဒါအာင် မာဝ်၊ တဲး န့ ကော လှဲ ပီ အိုမ် ဘ့လဲင် တာင်။

17 ဒေါ ကွယ် ဂေ ခဲင် ပြဲ ကာဟဝ်း တီ၊ ဂေ ယီ ဝဲ ဘူင် မှာပ် ကိူန်၊ ဂေ ဘော ပီရူ ဂေ ဒီ ဇဝ်ဖြာ အီ အိုပ် တူတ့် ဒွန် မျုဝ်။

18 ဂေ ဘော ထေဝ် နဝ်း ဇဝ်ဖြာ။ ဂေ ဘော မှာန့် ပီ ဆီ ဟူမ် ဂေ။

19 ဂေ ကာလာင် ဂြုဝ်း တူ မွှိုမ် လွင် ဇဝ်ဖြာ တဝ်း၊ “မှဝ် ဇဝ်ဖြာ ဒီ ပါယ် ဒီ ဒွါ ပီ ဒီ ဟူမ် ဒီ အေ ခဲင် ပြဲ ကာဟဝ်း နီ။း

20 ဟဲ့ မုး၊ အန် ဇဝ် ဟဲ့ တဲး မာဝ် ဒး တဲး န့ လေး အိုမ် လှဲ ပီ အိုမ် ဘ့လဲင်။ အေ ယီ တူ ထာင် အန် ဒီ ဒွါ ဘော ဘူမ် ဂေ ယင်၊ တဲး အေ ဒူအီ ပီ အိုပ် အန် ဟူမ်။”

21 ခုဝ်၊ ဒေါ ယိုဝ် ဇဝ်ဖြာ ဂြုဝ်း ပီ ကာလာင် ဂေ တီ၊ အန် ဘော ရူ ကာဆဝ် ဒီ ဂေ။ အန် ဇဝ် ဘော တဲး ငဝ် ကာဆိုမ် ဒူအီ အီဆာရေလ။ အန် ဘော ဝဲ ရူ ဒီ ဂေ။

22 ခုဝ်၊ ဂေ တူ ညှိုမ်၊ တူ ရုဝ်ဆေ ဇဝ်ဖြာ။ ဂေ မိူဝ် တူ ညှိုမ်၊ တူ ထာင် ဇဝ်ဖြာ ပွိုန် ချွတ် ဂေ။

23 မာလဲ၊ ဇဝ်ဖြာ ဝီ ကာလာင် ဒီ ဘ့လေန့် နာ ဒဲင်။ အန် ဘော တဲး ဂါင်ဟြာဝ် န့ဝိုဝ်း။

24 ဟဲ့ ဟွတ့်၊ အန် တဲး ပီ ဒီ ဟူမ် စုဝ်း လူင် ပီ ဂ့လာယ်၊ တဲး ဂေ ပွိုန် ဒီ ဟူမ်။ အန် ဒွါ ဒီဂါဝ် အီ လေး ဂါင်ဟြာဝ် ဒီ ဂေ။

25 ဂေ ဘောကာဂ့လျီတ် ဘော ပွိုန် ဒီ ဟူမ် ပီ ဒီ ဟူမ် အာမူ အာမာတ် ဇဝ်ဖြာ။ အန် ဇဝ် ဘော တဲး ဂေ ပွိုန် ဒီ ဟူမ် ခဲ့ လိုပ် ဝတ့် ဂေ။

26 ဇဝ်ဖြာ ဘော ဘူင် တဲး ခုန် တး နာ လေး ဆီငဲ ဘုတ် ခဲင် ဘ့လေန့်၊ န့ ဘော မုး ပွုန် အန် ဇဝ်၊ အီ တဲး ခုန် ဝီ ဘုတ် ဘော နာ တေတ့်။

27 အန် ဘော တဲး မာဆိမ် တး လူင် ဇမ် ဒူင် ကွယ် ဂေ၊ တဲး န့ ကိူန် ပီ ကာပုး၊ ဝီ ဘဲန် ယင် ပီ ဒီ ဟူမ် ဂေ အီ ကိူန် ပီ ကာဟာတ့် အီ ကွယ် ဘာင် အိုမ် နမ်မုက်ဆာရာ။

28 အန် ဇဝ် တဲး မာဆိမ် ဂေ တီ စုဝ်း ဒီ ကာတဲ ဒူင် ချ ဂေ၊ ဘော လူင် ခူပ် ဒူင် ကွယ် ဂေ ဒွန် ပ့လုဝ့်။

29 ဇဝ်ဖြာ ဘော တဲး ဂေ ပွိုန် ဒီ ဟူမ် ယင် တီ၊ တဲး န့ ဒူပ် နဝ်း လာမာက် ဂေ။

30 မာလဲ၊ နဝ်း လောဖ ဂေ ယီ တူ နပ် ဒီ တူတ့်။ ဒေါ ဆီငျာ ဟူမ် ဂေ တီ၊ ယင် ဆီ ကွယ် ခဲင် မူတ့် ဂေ၊

31 ဇဝ်ဖြာ ဘော ရူ ဒီ ဂေ ဒူအီ အီဆာရေလ တီ။ အန် ဘော ငဝ်း ယမ် ဂေ အီ မိုဝ်း ပ့လူမ် မိုဝ်း ဟဲန့် လွှိုမ် အီ ဟဝ်။ အန် ဘော ငဝ်း ဝဲန် ကိူန် ဂေ ကာညူမ် အီ ကွယ် ကာတဲ ဒူအီ အီဆာရေလ။

32 ဂေ ဟဲ့ ယိုဝ် ပါယ် တီ မိူဝ်၊ ဂေ ဝီ ဘူင် ဟာဝ် မှာပ် ပေါ မ့ပွါ။ ဂေ ဟဲ့ ယိုဝ် အီ မွှိုမ် အာမ် ခဲ့ တီ၊ ဂေ တူ ညှိုမ် တူ ဘိုင် ဇဝ်ဖြာ။

33 ပါယ် တီ၊ ဇဝ်ဖြာ ဘူင် တဲး အာဆာက် ဂေ စှိုမ် ဒီလူယ် ဒီလာယ်။ တဲး ဂေ မိုဝ်း ဒုက် မိုဝ်း ညှာပ် ဘဲန် ဆီနမ် ဘဲန် ဆီနမ်။

34 ဒေါ ငဝ်း ဇဝ်ဖြာ ဂေ မင် အီ ကာတဲ ဂေ၊ ဂေ ဝီ လှုဝ်း ဇဝ်ဖြာ။ ဂေ ဝီ ကာပ့လု နဝ်း ဝီ အွန် ဒီ ဆာခိုဝ် ဒီ အန်။

35 ဂေ ဘော ဝီ လှုဝ်း ဇဝ်ဖြာ အီ အိုပ် တူတ့် ဒွန် မျုဝ်။ ဂေ လှုဝ်း အန် ဇဝ် အီ ဂွင့် အီ ရဲ ဂေ၊ အီ ချွတ် အီ စွယ် ဂေ။

36 ပန် တီ ဂေ ယီ နပ် ဒီ ညိုင်ရာင်၊ ကာလာင် နာ မွှိုမ် ဒီ ဇဝ်ဖြာ။ ဂေ နပ် ဒီ ကာလုဝ် ဒီ ဇဝ်ဖြာ။

37 နဝ်း ဂေ မိူဝ် တူ ဆိူဝ် တူ မှာန် ဒီ ဇဝ်ဖြာ။ ဂေ မိူဝ် တူ ဘူင် ဒူပ် ပဲ့ ဟဲ့ ဒွိုမ် ကာဆဲန့် ဂေ ဒီ အန် ဇဝ်။

38 ဇဝ်ဖြာ ယီ ဟဲ့ ကာဝေ ဂေ၊ ဝီ ဂဝ်း ဝဲန် မှာပ် ဂေ။ တူ ပျာတ့် ဂေ။ ဘဲန် ဇေန့် ဘဲန် ဇေန့် ဇဝ်ဖြာ ဘော ယိူန် ဘော အူတ် နဝ်း ရူ အန် ဒီ ဂေ။

39 ဇဝ်ဖြာ ဝီ လှုဝ်း၊ ဂေ မုး မျုဝ် အီ နပ် ဒီ အမ် နပ် ဒီ လာတ့်။ အန် နပ်၊ ဂေ ဘော ပီ ခုန် အီ ဟာဝ်၊ အာဝ် ဟူ နပ် ဒီ ဝီ တး။

40 ဒေါ ကွယ် ဂေ ခဲင် ပြဲ ကာဟဝ်း တွိုန်၊ ဂေ ဘော ဘူင် ကာဘး ဒီ ဇဝ်ဖြာ ဘဲန် ဇေန့် ဘဲန် ဇေန့်။ ဂေ မိူဝ် ဘူင် တဲး န့ ဆဝ် ဒီ နဝ်း ဇဝ်ဖြာ။

41 ဘဲန် ဇေန့် ဘဲန် ဇေန့်၊ ဂေ ဟဲ့ ဝီ ထေဝ် နဝ်း ဇဝ်ဖြာ၊ ဝီ ဘူင် တဲး န့ ဆဝ် ဒီ နဝ်း အန် ဇဝ် အီ ဘွတ် ကာဆဝ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။

42 ဂေ မိူဝ် ဟဲ့ ပိဝ် လွင် ပွုန် ဇဝ်ဖြာ။ ဂေ ပိဝ် ဆီငဲ ဒေါ ဟဲ့ စွယ် အန် ဇဝ် ဒီ ဂေ တဲး ဂေ လွတ် တ ရန်ဆူ ဂေ။

43 ဂေ ပိဝ် ဆီငဲ ဒေါ ဟဲ့ ဘူင် ဇဝ်ဖြာ အီ မွှိုမ် အာမ် ကာဆဝ် ဒီ ဂ့လင် စောနာ ခဲင် မိူင် အဲဂိုပ် တွိုန်။

44 ဒေါ အန် တီ ဇဝ်ဖြာ ဟဲ့ ဘူင် တဲး အိုမ် ဘဲန် နှာမ်၊ ကွဲ့ တဲး ဂေ ပွိုန် ဒီ ဒျီင် အိုမ် အီ ကွယ် ခဲင် ဘ့လဲင်။

45 အန် ဘော တိုယ် မာကာမုတ်၊ တဲး န့ တး ကဝ့် ဂေ။ အန် ဘော တဲး မာရုဝ့် ကိူန် တး ဒွါ ဒုက် ဒီ ဂေ။

46 အန် ဟဲ့ တဲး ဝလွာ တး ဟူမ် ပီ ဆမ် ဂေ၊ တဲး ဘော မာ အာဇူင့် ဟူမ် တူတ့် အီ လတ့် ခဲင် မာန် ခဲင် ဒူင် နာ ဂေ။

47 အန် ဟဲ့ တဲး ဘျြီ စုဝ်း၊ တဲး န့ ပျာတ့် ဟေ မာငုန်၊ တဲး အိုမ် ဒါတ် စုဝ်း ပျာတ့် ဘ့လေ ဒီပူ။

48 ခဲ့ ကွယ် မာမက် ဂေ၊ အန် ဇဝ် တဲး ဂေ စှိုမ် ဒေါ စုဝ်း ဘျြီ တီ။ ဘော မာဘူ ကော ယမ် တူတ့် ဒေါ ဒး ဘ့လေ ကာဆး ဒီ ဂေ။

49 ဇဝ်ဖြာ ဘော တဲး ဂေ ယိုဝ် ခဲ့ ရူ အန် ဒီ ဂေ။ အန် ဘော မိုဝ်း နဝ်း ဇွင့် ဂေ၊ ကာအိး ဂေ၊ တဲး န့ ပီ ဖိုင် အာမူ အာမာတ် အီ ငဝ်း တူတ့် ဒွန် မျုဝ် ဟဲ့ တး ပျာတ့် ဂေ။

50 အန် ဇဝ် ဟဲ့ ရဲန် ပီ ဒီ ပါယ် အန် ဒီ ရူ ဒီ ဂေ။ အန် တူ တဲး ဂေ လွတ် ယမ်၊ ဘူင် တဲး ဂေ မိုဝ်း ဆဝ် ရောဂါ။

51 ဇဝ်ဖြာ ဟဲ့ ငဝ်း ဝဲန် ဂွန် ဂိန့် ဒွန် အီ အီ ကွယ် ခဲင် မိူင် အဲဂိုပ်။ န့ မုး ဂွန် ဂေ ဒူအီ အီ ဆီ မိုဝ်း ပ့လူမ်၊ အီ ညှမ် ကတ်၊ အန် ဟဲ့ ငဝ်း တူတ့် ခဲင် မိူင် ဂေ ဒူအီ အီ မုး လှုက်လှာန် အာဟာမ် တွိုန်။

52 န့ ယီ မုး ဒူအီ အာမျုဝ် ပီ အိုပ် ဇဝ်ဖြာ၊ အန် ဇဝ် ဝီ တဲး ဂေ လေး ခဲင် မိူင် အဲဂိုပ်၊ တဲး န့ ပီ ဖိုင် မာဘူ လေး ဟူမ် ပေတ့်။ အန် ဘော တိုယ် ဂေ ဟာဝ် ခဲင် ပြဲ ကာဟဝ်း၊ တဲး ဂေ ပီ မာဘူ အန်။

53 ဇဝ်ဖြာ ဘော ယဲတ့် ဂေ၊ တဲး ဂေ ပွိုန် ဒီ ဟာဝ် ဒါခိုယ်၊ ကွဲ့ တဲး ဂေ လုဝ် ယုဝ် မာဆေ။ န့ ယီ မုး ရန်ဆူ ဂေ၊ အိုမ် ဒီနှူင် ရေန့် ဟဲ့ မ့ပုန် ယမ် တူတ့် ဂေ။

54 ပါယ် တီ၊ အန် ဇဝ် တိုယ် ဂေ ဇမ် ဒီ ကာအုန် မိူင် ဘွတ်၊ မိူင် ပီ တဝ်း ဇဝ်ဖြာ ဒီ ဒွါ ဒီ ဂေ။ န့ မုး မိူင် ဒီ နွန် ပဲ့ ဟဲ့ ဒိုဝ်း ဇဝ်ဖြာ ဒီ အီ ဟဝ်။

55 ဒေါ လိုပ် ဂေ ခဲင် မိူင် တီ၊ ဇဝ်ဖြာ ဟဲ့ ဟုဝ် တဝ် ဒူအီ အာမျုဝ် ဟဝ်။ ဟဲ့ ဟွတ့်၊ အန် ဝီ ကာဆာင် ကာဒါယ် ဂေ တီ၊ ဝီ ဒွါ ဒီ ဒူအီ အီဆာရေလ၊ တဲး ဂေ ပွိုန် ဒီ ဆမ် ကာင် ဂေ။

56 ဂေ ဒူအီ အီဆာရေလ ယီ ဝီ ဝဲန် ဇဝ်ဖြာ အီ အိုပ် တူတ့် ဒွန် မျုဝ်။ ဂေ ဘော ထေဝ် နဝ်း အန်၊ ဘော တူ ဒူပ် ဒါရာ ပဲ့ ဟဲ့ ကာလာင် အန် ဒီ ဂေ။

57 ဂေ ပီ ဝီ ဘူင် နာ တူ မွှိုမ် ပီ ဂုန့် ဒါ ဂေ၊ တူ ညှိုမ် ဆီချာ ဇဝ်ဖြာ။ ဂေ ပီ ဘ့လာ အ အီ ဟာဝ် ဂုဝ့် ဂဲ့။

58 ဂေ ကြိုပ် ဒူင် စာ ဘဲန် ပ့လုဝ့် ဘဲန် ပ့လုဝ့်၊ တဲး ဇဝ်ဖြာ ဝီ ရူ ဒီ ဂေ။ ဂေ ကြိုပ် ဘော အာရိုပ် ပီ တူ ခမ် ဇဝ်ဖြာ ဂေ ဘူင်။

59 ဇဝ်ဖြာ ဘော ယိုဝ် လွင် အန် တီ၊ အန် ဘော ဝီ ရူ ကာဆဝ် ဘော ဝဲန် တူတ့် ဂေ။

60 ဇဝ်ဖြာ ဟဲ့ တဲး ဂေ ဘ့လေး ထိုပ် ဘိက် ဘွတ် ခဲင် မိူင် ဆီလုဝ်၊ တဲး အန် ပွိုန် ဒီ ကွယ် ရိုမ် ဒူပ် ဂေ ဒီ တီ။ မာလဲ၊ အန် ဝီ လေး ဒူင် ကွယ် အန် တီ၊ အာဝ် ဟူ တဲး အန် ကွယ် ကာတတ် ဂေ။

61 ဇဝ်ဖြာ ဟဲ့ ခ့ဝါင် တဲး ရန်ဆူ အန် ဖာတ် ဒိုဝ်း ဇီဒိူက် အီ ဘျ အာဖုင် ဒင်ခုဝ် အန်၊ တဲး န့ ဝီ ဇမ် ဒူင် ကွယ် ရန်ဆူ အန်။

62 ဇဝ်ဖြာ တဲး ဒူအီ ပီ အိုပ် အန် ဝီ ယမ် ဒီ မာပွါ့ လာင်။ အန် ရူ ကာဆဝ် ဒီ ဂေ ဒူအီ အီ မုး အာမျုဝ် အန်။

63 ဂွန် ကာညူမ် ဂေ၊ ဇဝ်ဖြာ တဲး ဂေ ကာဆိုမ် ခဲင် ငဝ်။ ဂွန် ဒီဘျာ ဂေ အာဝ် ဟူ မိုဝ်း ဒူင် ဒီ ခတ်။

64 ဘော ဒူအီ အီ လှူ ဒီ ဇဝ်ဖြာ ဟဲ့ ယမ် ဒီ မာပွါ့ လာင်။ ယာ ဆီပြး ဂေ မိူဝ် တူ ဒန် က့လိုဝ်၊ တူ ဒန် ယာမ်။

65 ဝါယ် အန် တီ န့ ဘော ပီ ဇဝ်ဖြာ ဟဲ့ န့ဆိုဝ်း ပီ ဒူအီ ယိုတ့် ပဝ်း ဟဲ့ ဝီ န့ဆိုဝ်း။

66 အန် ဝီ ကာဂုဝ်း ဒီ ရန်ဆူ အန် ဘော ဘူင် တဲး ဂေ ဆာယ် အီ ဆေဆေ။

67 ဟဲ့ ဟွတ့်၊ အန် ဘော ဝဲန် လှုက်လှာန် အာယုဝ် တွိုန်။ အန် မိူဝ် တူ ရဝ်း ဂေ ခြိုဝ် အာအေဖာရိမ်။

68 အန် ယီ ရဝ်း လှုက်လှာန် အာယူဒါ။ အန် ဘော ရဝ်း နွန် ဇီအူန် အီ မုး ဒူင် ပီ ရွက့် အန်။

69 ဒီ တီ အန် ဇဝ် ဘော ဆမ် ဟုဝ် အန်၊ တဲး န့ ဆီချာ ပီ ဂါင်ဟြာဝ်၊ တဲး န့ မန် ပီ ကာဒါယ် ပဲ့ ဟဲ့ ဘူင် ဇဝ်ဖြာ အီ တူ ဘ့လိူင် ဒေါ မှဝ်။

70 ဇဝ်ဖြာ ဘော ရဝ်း အာဒါဝိတ် အီ မုး ဒဲစေန့် အန်၊ တဲး အန် လေး ခဲင် ဒူင် ဟျီင် အန် မာဘူ၊

71 တဲး အန် ဝီ ယွတ် မဲန် ဒူအီ အီဆာရေလ၊ တဲး န့ ပီ ပီ ဒွိုမ် ယွတ် မဲန် အန် မာဘူ။ ဇဝ်ဖြာ တဲး အန် ဘဲန် ခုန်ဒီခမ်၊ တဲး အန် ယဲတ့် ဂေ ဒူအီ ပီ အိုပ် အန် ဇဝ်။

72 ဒေါ ယွတ် မဲန် အာဒါဝိတ် ဒီ ဂေ တီ၊ အန် ဒူပ် နဝ်း ဆိူဝ် နဝ်း မှာန် အန်။ ခဲ့ မိုဝ်း အန် အာကျာမ် အာငျာန် ဘွတ်၊ အန် ဘော တာ တူတ့် ဒေါ အိုပ် အန် ဒီ ဂေ။