1 အုဝ် ဒီ ဒတ် တာင်၊ ဆာခိုဝ် ဒီ ဇဝ်ဖြာ တဲး အန် ဇဝ် ဘော ထူမ် ဂြုဝ်း ပီ ဆာခိုဝ် ပီ မှာန့် အုဝ်။

2 ဒေါ ဇမ် အုဝ် ဒုက် တာင်၊ အုဝ် ဟဲ့ ဆာခိုဝ် ဒီ ဇဝ်ဖြာ။ အုဝ် ဘော ကြိုပ် ဆာခိုဝ် ဒီ အန် ဇဝ် ဒွင် ခိူန်၊ တူ တဲး အုဝ် နုန်။ အုဝ် ယီ တူ ယိုဝ် အာဆေ အီ လှဝ် နဝ်း အုဝ်။

3 ဒေါ ကာဒွါ့ ကာဖာ အုဝ် အန် ဇဝ်၊ န့ ဘော ဘဲန် ဒီအိး နဝ်း။ ဒေါ ဇေန့်ဇာ အုဝ် ဘဲန် မျုဝ် ဘဲန် မျုဝ် နဝ်း အုဝ် ဘော ဒီတဲတ်။

4 အန် ဇဝ် တူ တဲး အုဝ် ပွိုန် ဒီ အိတ် ဒွင် ခိူန်။ န့ ဘော ဒုက် ညှာပ် ဒီ နဝ်း အုဝ်၊ အာဝ် ဟူ နပ် ဒီ ကာလာင်။

5 အုဝ် ဘော ဇေန့်ဇာ ဆီငဲ အီ ဟဲ့ ပွုန် တး အာတ့် နီ၊ ဘော ဆီနမ် အီ ဟဲ့ ပွုန် တး ဆိန့် ဒေါ မွိုန်။

6 အုဝ် ဘော လှုဝ်း မှုဝ် ပီ ဒွိုမ် တဝ်း အုဝ် ဘဲန် မျုဝ် ဘဲန် မျုဝ် ဒွင် ခိူန်။ ခဲင် နဝ်း အုဝ်၊ အုဝ် ဝီ ကာဖာ ဝီ ဒီမွှတ် တဝ်း၊

7 “ယုဝ် မိူဝ် ဇဝ်ဖြာ ဒီ ဝဲန် ကာဒတ် အုဝ်။း ယုဝ် အန် ဇဝ် ပီ ဟူ ဂေဇူ အုဝ် ဒေါ မှဝ်။း

8 ယုဝ် မိူဝ် နဝ်း ရွက့် ဇဝ်ဖြာ ဟဲ့ ဟွတ့် တူတ့်။း ဂြုဝ်း ပီ ကာဆဲန့် အန် ဇဝ်၊ ယုဝ် အန် ဟဲ့ ဝဲန် တူတ့်။း

9 ယုဝ် မိူဝ် ဇဝ်ဖြာ ဟဲ့ ဟွတ့် ပိဝ် နဝ်း ကာဝေ အန် ဒီ အီ။း ယုဝ် မိူဝ် နဝ်း ရွက့် ကာဝေ ဇဝ်ဖြာ ဟဲ့ ဝီ ဘဲန် နဝ်း ရူ နဝ်း စာဝ် နီ။း”

10 ဒေါ အန် တီ အုဝ် ဘော ဝီ ထာင်၊ “ဇဝ်ဖြာ အီ အိုပ် တူတ့် ဒွန် မျုဝ်၊ အန် အာဝ် ဟူ စွယ် ယေ ပီ ခါ အာတ့်။ အာတီ တဲး နဝ်း အုဝ် က့လိုဝ် လွှိုမ် ဒုက် မျုဝ် ဟဝ်။”

11 အုဝ် ယီ ဝီ တဝ်း၊ အုဝ် ဒီ ဝီ လှုဝ်း ပဲ့ ဟဲ့ ဘူင် ဇဝ်ဖြာ။ အုဝ် ဒီ ဝီ လှုဝ်း အီ မွှိုမ် အာမ် ကာဆဝ် ဒွန် မျုဝ် ပဲ့ ဟဲ့ ဘူင် အန် ဇဝ် ဒေါ မွိုန်။

12 အုဝ် ဒီ ဝီ ကာဒွါ့ ကာဖာ ပဲ့ ဟဲ့ ဘူင် ဇဝ်ဖြာ ဒွန် မျုဝ်၊ နဝ်း အုဝ် ဘော ဝီ ဇေန့်ဇာ ပဲ့ ဟဲ့ ဘူင် ဇဝ်ဖြာ တီ။

13 အိုယ် မဲ ဇဝ်ဖြာ၊ ပီ ဘူင် မဲ ဇဝ် ဒွန် မျုဝ်၊ န့ ဟဲ့ မုး တူတ့် အီ ဆီငါ ဘွတ်။ အာဝ် ဟူ မိုဝ်း ဇဝ်ဖြာ ပေါ အူ ကာဒင် အီ ဆီ ဒီ ဘွတ် လွှိုမ် မဲ ဇဝ်ဖြာ နီ။

14 မဲ ဇဝ်ဖြာ ဘော နပ် ဒီ ဘူင် ဘဲန် မျုဝ် ဘဲန် မျုဝ် အီ မွှိုမ် အာမ် ကာဆဝ်။ မဲ ဇဝ် ဘော ဟဲ့ ဘူင် ဘျ ပီ ပါယ် ပွုန် မဲ၊ တဲး ဂေ ဒူအီ ယိုဝ်။

15 မဲ ဇဝ် ဟဲ့ ဒိုဝ်း ပွုန် မဲ ချွတ် ဒူအီ ပီ အိုပ် မဲ ဇဝ်၊ အီ မုး လှုက်လှာန် ခြိုဝ် အာကူပ် ဂါယ် ခြိုဝ် အာယုဝ် တွိုန်။

16 အိုယ် မဲ ဇဝ်ဖြာ၊ ဘော အိုမ် နမ်မုက်ဆာရာ နပ် ဒီ ယုဝ် မဲ ဇဝ်။ ဘော ကာဒမ် အိုမ် အီ ကွယ် လိုက် ကာဆဝ် နပ် ဒီ ရ်ု ဒီယုး ဒီယေန့် ဒီ ယုဝ် မဲ ဇဝ်။

17 အိုမ် န့အု ဟဲ့ စုဝ်း ဘဲန် ဂ့လာယ်။ ကာနမ် မိူဝ် ဘော ဟမ် ဆီနန် ဆီနိူင် ခဲင် ဂါင်ဟြာဝ်၊ ပ့လ မ့ပ့လေတ့် ဂေ ဘ့လေ ကာဆး ဘော တး ဒွန် ပ့လုဝ့် ဒွန် နာ။

18 ဟမ် ဘ့လေ ကာဆး မဲ ဇဝ် ဘော တး ဒူပ် ခုန် လာင်။ ပ့လ မ့ပ့လေတ့် ဘော တဲး န့ ဘ့လာင် ဒဲင် ကာဒါယ် နီ။ ကာဒါယ် ဘော ဒီယေန့် ဘော ရ်ု ဒွန် ပ့လုဝ့်။

19 မဲ ဇဝ် ဘော ဟာဝ် ဒဲင် မာ အိုမ် အီ ဟဲ့ ဆီလွယ် ဆီလွယ်။ မဲ ဇဝ် ဘော ကာလုဝ်း အိုမ် နမ်မုက်ဆာရာ ဒူင် လိုက် ကာဆဝ်။ ယီ တူ ပွိုန် ယိုဝ် ပန် ပ့လဝ် မဲ ဇဝ်။

20 မဲ ဇဝ် ဟဲ့ ယဲတ့် ဒူအီ ပီ အိုပ် မဲ ပီ ဒါ အီ ဟျီင် မာဘူ ယဲတ့် မာဘူ အန်။ မဲ ဇဝ် ဘော စ်ု အာမုဝ်ဆဲ ဂါယ် အာရူန် တွိုန်၊ တဲး ဂါယ် ယဲတ့် ဒူအီ ပီ အိုပ် မဲ ဇဝ်။