1 ဂေ ဒူအီ ခဲင် အိူင် ယူဒါ၊ ဂေ ဟဲ့ နပ် ဇဝ်ဖြာ။ ဂေ ဒူအီ ခဲင် မိူင် အီဆာရေလ၊ ဂေ ရုဝ်ဆေ ဇဝ်ဖြာ အီ မိုဝ်း ပွုန် တာင်။

2 ဟုဝ် အန် ဇဝ် ဟဲ့ ကွယ် ခဲင် မိူင် ယေရူဆာလဲမ်။ နွန် ဇီအူန် ဟဲ့ ဘဲန် ဒူင် ကွယ် အန် ဇဝ်။

3 ဒူင် ကွယ် အန် တီ၊ အန် ဇဝ် ဟဲ့ ကာဘက် ဝဲန် ဘ့လာ အ ဂေ ရန်ဆူ အန်၊ အန် ဟဲ့ ပျာတ့် ဘော ဘ့လာ လျီး ဂေ မင် ဂွင့်၊ ဘော ခြိုင် ကာဂုဝ်း ဒွန် မျုဝ်။

4 အိုယ် မဲ ဇဝ်ဖြာ၊ အာဖုင် ဒင်ခုဝ် မဲ ဟဲ့ လိုဝ်း ဆီချာ ဒေါ လူင် မဲ ဒီ နွန် ဝါယ် ဟဲ့ ကာဂုဝ်း အွင် မဲ ဒီ ရန်ဆူ မဲ။

5 ဂေ ဒါ ဆိုက် အီ ယ အီ ကျ ဒီ ကာဂုဝ်း၊ ဂေ ဟဲ့ ဟွတ့် ကာဒုး ဒီ ခမ် အီ ဖာတ် ဒိုဝ်း ကြုဝ်ကြာမ် ဂေ။ ဂေ ဟဲ့ ဟွတ့် ယမ်၊ အာဝ် ဟူ ယိတ့်။ ဘော ပ့လူမ် ဘော ဟဲန့် ဂေ အာဝ် မိုဝ်း ဒီခုဝ် မာဆေ။

6 မဲ ဇဝ်ဖြာ အီ မုး ဇဝ်ဖြာ ပီ ကြိုပ် အာကူပ်၊ မဲ ဟဲ့ ဘူင် တဲး ဘော လက်လဝ် ဘော ဒူအီ အီ ပဝ့် လက်လဝ် ယမ် စှိုမ် တူတ့်။

7 မဲ ဇဝ်ဖြာ၊ မဲ အူ ကာဒင် ဟဲ့ မွှိုမ် ယုဝ် ကာဆဝ်။ ဒေါ ဟဲ့ ရူ မဲ အာဝ် မိုဝ်း အာဆေ အီ ခမ် ဒီ ကွယ် နာ အာတ့် မဲ ဇဝ်။

8 ဒေါ ဆုင်ဖျာတ် မဲ ဇဝ် အာမူ အီ၊ ဂြုဝ်း မဲ ဟဲ့ လေး ခဲင် ဂါင်ဟြာဝ်၊ တဲး ဒူအီ ဘော ကာဒါယ် ဘော ယုဝ် ဒီယေန့် တူတ့် ဒွန် အီ။

9 ဒေါ အန် တီ မဲ ဇဝ် မိူဝ် ဆုင်ဖျာတ် ဒီ ချွတ် ဒူအီ ဒဲင် ကာဒါယ်၊ အီ မုး ဒူအီ ပဲ့ ဟဲ့ ခါနှာပ် အီ ဟဝ်။

10 ပါယ် တီ၊ ဒူအီ အီ ဟဲ့ ဒွိုမ် ရူ ဒီ မဲ၊ ဂေ ဒီ ဝီ အိူပ် မဲ ဇဝ်ဖြာ။ ဂေ အီ ဆီ ရူ အာဝ် ဟူ ပွိုန် ဘူင် မာဆေ။

11 ခဲ့ ပီ ဒွိုမ် ကာဆဲန့် ဘေ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ တဲး ဘေ ဘော ဘူင် ခဲ့ တီ။ တဲး ဂေ ဒူအီ အာမျုဝ် ဟဝ် အီ ကွယ် ကာတတ် ဘေ ဒိုဝ်း လက်ဆွင်၊ တး အာပ် ဒီ အန် ဇဝ်။ ခုဝ်၊ ဇဝ်ဖြာ အီ မွှိုမ် ယုဝ်။

12 အန် ဇဝ် ဘော ဘူင် တဲး နဝ်း ပီခိုက် ဂေ ခုန်ဒီခမ်၊ ဝီ န့စမ် လူင်။ တဲး ခုန်ဒီခမ် ဘောကာဂ့လျီတ် ရုဝ်ဆေ အန် ဇဝ်။