1 အိုယ် မဲ ဇဝ်ဖြာ၊ ယေ ပီ မာဘူ ပီ ဟျီင် မဲ။ မှဝ် န့ ပါယ် ပီ ဝဲန် မဲ ဇဝ် ဒီ ယေ။း မှဝ် န့ ပါယ် ပီ ရူ မဲ ဇဝ် ဒီ ယေ ဆေဆေ။း

2 ယေ မှာန့်၊ တဲး မဲ ဇဝ် ဘော ဝီ လှုဝ်း ယေ ဒူအီ ပဲ့ ဟဲ့ ရဝ်း မဲ ဇဝ် ဆိန့် ဒေါ မွိုန်။ ကွဲ့ ပိဝ် ယေ အီ မုး ဒူအီ ပဲ့ ဟဲ့ ထုတ် လေး မဲ ဒီ ဒူအီ ဟဝ်၊ တဲး ယေ ဘဲန် ဒူအီ ပီ အိုပ် မဲ။ တဲး မဲ ဇဝ် လှုဝ်း ဘော နွန် ဇီအူန် အီ မုး ဒူင် ဟဲ့ ဒွိုမ် ကွယ် မဲ ဇဝ်။

3 တဲး မဲ ဇဝ် ဟာဝ် ယွတ် ဟုဝ် မဲ ဇဝ် အီ ဟဲ့ လိုဝ် ဟဲ့ ကာပျာတ့်။ ဟဲ့ လှေန့်၊ ဂေ ရန်ဆူ မဲ ဇဝ် ဟဲ့ ပျာတ့် ဝဲန် တူတ့်။

4 ဒေါ အန် တီ ဂေ ဟဲ့ ကာဖြူမ် ဒီ ဒတ် တာင် ခဲင် ဟုဝ် အီ မုး ဒူင် ကြိုပ် ယေ ဒီ မဲ။ ဂေ ဘော ဆမ် အာလာမ် ဂေ၊ တဲး ဒွန် အီ ယိုဝ် ဂေ ဟဲ့ အွင် ဒီ တီ။

5 ဂေ ဘူင် ခဲင် ဟုဝ် ပီ ဒူအီ အီ ဟဲ့ ဒိုဝ်း မိုယ် ဂ်ု ဟေ တာင်။

6 ဂေ ဟဲ့ ဒိုဝ်း မိုယ် ဂေ မာပွါ့ ဒွယ် ရာင် ဘုဝ်း အီ ဒိုက် ဒီ ရဲင်၊ တဲး န့ လိုဝ် ကာပျာတ့် တူတ့်။

7 ဂေ ဟဲ့ ဒိုဝ်း ငဝ် ဒုဝ့် ကာဆိုမ် ဟုဝ် မဲ ဇဝ်။ ဂေ တူ ရုဝ်ဆေ ဒူင် ဘွတ် အီ မုး ဒူင် ကွယ် မဲ ဇဝ်။

8 ခဲင် နဝ်း ဂေ၊ ဂေ တဝ်း ဒီ ဘူင် တဲး ယေ ကော လိုဝ် တူတ့်။ ခဲင် မိူင် ဘော မိူင် ဂေ ဟဲ့ ဒုဝ့် ကာဆိုမ် ဒွန် ပ့လုဝ့်၊ အီ မုး ဒူင် ကြိုပ် ယေ ဇဝ်ဖြာ။

9 လက်ဆာနာ ပီ ဘ့လေး ယေ တဲး ယေ နုဝ် လွင် ပဲ့ ဟဲ့ ဘူင် မဲ ဇဝ်ဖြာ ဟဲ့ ဟြာယ် တူတ့် ဒွန် မျုဝ်။ ဒူအီ အီ ဘျာန် ဂြုဝ်း ဇဝ်ဖြာ၊ အူ ဝီ မိူဝ် အာဝ် ဟူ မိုဝ်း။ န့ ဒီ လှေန့် ခဲ့ မှဝ်၊ ဒေါ တူ မိုဝ်း ခေါ အူ ဝီ ကာတဲ ယေ အီ နပ် လွင် အန် တီ။း

10 အိုယ် မဲ ဇဝ်ဖြာ၊ ပန် မှဝ် မဲ ဒီ တဲး ဂေ ရန်ဆူ စူ ကာညး မဲ။း မဲ ဒီ ဘော တဲး ဂေ နဲန မဲ ဆေဆေ။း

11 မှဝ် န့ ပါယ် ပီ တူ စွယ် မဲ ဒီ ယေ။း မှဝ် န့ ပါယ် ပီ ကွယ် မဲ ဇဝ် တူ ဘူင် မာဆေ ဒီ ဂေ။း

12 အိုယ် မဲ ဇဝ်ဖြာ၊ မဲ ဇဝ် ဟဲ့ မုး ခုန်ဒီခမ် ယေ ဆိန့် ဒေါ ဂုဝ် အန်။ မဲ ဇဝ် ဘော ဟဲ့ ချွတ် ဟဲ့ စွယ် ယေ ဘဲန် ဇေန့် ဘဲန် ဇေန့်။

13 ပွုန် တာင် မဲ ဇဝ် ဟဲ့ ဘူင် တဲး အိုမ် နမ်မုက်ဆာရာ ကာယဝ်း။ မဲ ဇဝ် ဘော ကာဘက် ဂိန့် မာကြာယ် အီ ကွယ် ခဲင် အိုမ် တီ။

14 မဲ ဇဝ် ဟဲ့ ဟွတ့် မး ကာလာတ့် ဂိန့် မာကြာယ် တီ၊ ဝီ ဒိုဝ်း ဒုဝ် ယမ် အန်၊ ဝီ တဲး န့ ဘဲန် ပီ ဒီ ဟူမ် မာဒုဝ် ပြဲ။

15 န့ ဘော မုး မဲ ဇဝ် အီ ဘူင် တဲး အိုမ် တုဝ်း၊ တဲး န့ ကော လှဲ ဆေဆေ။ မဲ ဇဝ် ဘော ဘူင် အိုမ် ဘ့လဲင် အီ ဇုး ကာဆဝ်၊ တဲး န့ ဝီ ဟိတ် ဘဲန် ပ့လုဝ့် ဘဲန် ပ့လုဝ့်။

16 မဲ ဇဝ် ဘော ဖာန် တဲး န့ မိုဝ်း မာဂျီန် ဘော ဆီငဲ။ မဲ ဘော မုး ဒါ ကာညာ အီ အိုပ် ဘော ကာတဲ ဆီငဲ ဘော ခဲင် မှိုဝ်။

17 မဲ ဇဝ် ဟဲ့ ဘူင် တဲး န့ မိုဝ်း ကာအုန် ဒွန် မျုဝ် ဒဲင် ကာဒါယ်၊ တဲး န့ ဘော မိုဝ်း ဘော အာခြာဝ် မှဲ၊ အာခြာဝ် ဂတ်။

18 အိုယ် မဲ ဇဝ်ဖြာ၊ တဲး မဲ ဇဝ် ဘော ဝီ လှုဝ်း ပီ ပါယ် ဂေ ရန်ဆူ မဲ ဒီ ကာညး မဲ။ တဲး မဲ လှုဝ်း ခဲ့ ရိုဝ် ဒူအီ ဒေါ ကာလာင် ဂေ နာ စာဝ် ဒီ မဲ ဇဝ်။

19 မဲ ဇဝ်၊ ကွဲ့ အာပ် ဒူအီ ပီ ရွက့် မဲ ဒီ ဂေ ရန်ဆူ အီ ဟာယ် ကာဆဝ်၊ အီ ပီ မာဒုဝ် ပြဲ။ မဲ ဇဝ်၊ ကွဲ့ ပိဝ် အာမျုဝ် ဂေ ဒူအီ ပီ အိုပ် မဲ အီ ဟဲ့ ခမ် ဒုက် ဒီ အီ ဟဝ်။

20 တဲး မဲ ဇဝ် ဘော ဝီ လှုဝ်း ပီ ဒွိုမ် ကာဆဲန့် မဲ ဒီ ဒဲစေန့် မဲ။ ခုဝ်၊ န့ မိုဝ်း အီ ဟာယ် ကာဆဝ် အီ ဟဲ့ ကွယ် ဒွန် နာ ဒွန် ပ့လုဝ့် ခဲင် အပ် ဝွင့်။

21 ကွဲ့ တဲး ဂေ အီ ခမ် ဒုက် ဒီ အီ ဟဝ် မွှိုမ် ဆာယ်။ တဲး ဂေ ဒူအီ ဒုက် ဒူအီ ဂိန် ဝီ ပွိုန် ဒီ အိူပ် မဲ ဇဝ်။

22 အိုယ် မဲ ဇဝ်ဖြာ၊ တဲး မဲ ဘျ ဒီ ဂေ ခဲ့ တူ မွှိုမ် ဂေ။ တဲး မဲ ဇဝ် ဘော ဝီ လှုဝ်း၊ ဂေ ဒူအီ ရိုဝ် ဟဲ့ ဖျာက် ဟဲ့ ကာညး မဲ ဇဝ် ဒွန် ဆီငဲ။

23 မဲ ဇဝ် ကွဲ့ ပိဝ် ဂြုဝ်း ပဲ့ ဟဲ့ ဒတ် ဟဲ့ ဒဲ့ ဂေ ရန်ဆူ မဲ။ တဲး မဲ လှုဝ်း ပီ ဒတ် ဆီနန် ဆီနိူင် ဂေ ဆေဆေ၊ ပီ နဲန ဂေ ဒီ မဲ ဇဝ်။