1 ဇဝ်ဖြာ ဘော မိုဝ်း နဝ်း ဆီ ဘူင် နာ မွှိုမ် ဆေဆေ ဒီ ဂေ ဒူအီ အီဆာရေလ။ အန် အိုင် ဂေ အီ မိုဝ်း နဝ်း လုယ် နဝ်း ဘွတ် အာခါခ်ု။

2 န့ ယီ မုး အုဝ်၊ အုဝ် ဟဲ့ ရိန် ဒီ ကာလိုပ်၊ ဟဲ့ ရိန် ဒီ စှိုမ်၊ ပီ ဒူအီ အီ ရိန် ဒီ ဒီပ့လာတ်၊ ရိန် ဒီ ကေး။

3 ခုဝ်၊ ဒေါ ယိုဝ် အုဝ် ဂေ ဒူအီ မိူက် မိုဝ်း ကြုဝ်ကြာမ် ကိူန်၊ ဘော ဂေ ဒူအီ ပီခိုက် ဂေ၊ အုဝ် ဘော လှယ့် ဂေ။

4 ဂေ တူ မိုဝ်း ဒီ ခမ် ဒုက် မာဆေ။ ဂေ ဘော ပ့လူမ် ခ၊ မိုဝ်း ဟဲန့်။

5 ဂေ မိူဝ် တူ လုဝ် ညှာပ် ပီ ဂေ ဒူအီ ဟဝ်။ ဂေ မိူဝ် တူ မိုဝ်း ဒုက် ဒီ နဝ်း ပီ ဂေ ဒူအီ ဟဝ်။

6 ခုဝ် အန် တီ ဂေ ပီခိုက် နဝ်း ဂေ၊ တဲး န့ ပီ ဒူအီ အီ ဟွယ် မာကာဝဲ့ ဒီ မဲင် ဂေ။ နာ ဟာယ် နာ မိူက် ပီ ဘူင် ဂေ၊ န့ ဘော ပီ ခြိုင် ပီ စှိုပ် ဂေ။

7 ငါယ် ဂေ ဘော ယွတ် မီ မျုဝ် တူ မွှိုမ်။ ခဲင် နဝ်း ဂေ ဘော ကာဖာ မီ အီ တူ ဘွတ်။ အီ ဟာယ် အီ မိူက် ကော နုဝ့် လုတ့် ခဲင် နဝ်း ဂေ။

8 ဂေ ဘော ပီ ဝါညာက် ဘော ကာညး အီ ဟဝ်၊ ဘော ကာလာင် မီ ဂြုဝ်း တူ မွှိုမ်။ ကူပ် မိုဝ်း ဂေ နဝ်း ပီခိုက်၊ ဂေ ဘော ခြာမ် မီ ဒီ ခါနှာပ် အီ ဟဝ်။

9 ဂေ ဘော ကာလာင် ဂြုဝ်း အီ ခဲန့် ဇဝ်ဖြာ အီ ကွယ် ဂါင်ဟြာဝ်၊ ကာလာင် ဂြုဝ်း အီ တူ မိုဝ်း ဒီခုဝ် ဒီ ဒူအီ ဒဲင် ကာဒါယ် နီ။

10 ခုဝ် အန် တီ ဘော ဂေ ဒူအီ ပီ အိုပ် ဇဝ်ဖြာ ဝီ ဟာဝ် ဒူင် ကွယ် ဒူအီ ဟာယ် ဂေ တီ၊ ဝီ ထူမ် ဂြုဝ်း ပီ ကာလာင် ဂေ။ န့ ပီ ဂေ ဆီ တဲး အိုမ် ဘော ဘ့လဲင် လိုပ် ခဲင် မူတ့် ဂေ။

11 ဂေ ဘော တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ်၊ အန် တူ နပ်၊ အန် တူ ယိုဝ် ဒေါ မှဝ်။”

12 တဲး ဘေ ယွတ်၊ ဂေ ဒူအီ ဟာယ် ဒူအီ မိူက်၊ ဂေ ပါယ် တီ။ ဂေ ကွယ် ဒါခိုယ် ဆေဆေ၊ ဘော ဝဲ ခြမ် လွှိုမ် ဘြိမ်။

13 ဆေ န့ ပါယ် တီ၊ ပဲ့ ဟဲ့ ဘူင် အုဝ် အီ တဲး နဝ်း အုဝ် ဆီငါ၊ တူ ဘူင် မှာပ်၊ န့ တူ မိုဝ်း အာဂျိုဝ် မာဆေ။

14 အုဝ် ဟဲ့ ခမ် ဒုက် ဒွင် ဝန် ဒွင် ခိူန်။ ဇဝ်ဖြာ ဘော ဒမ် မှာပ် ဒီ အုဝ် ဒွန် ညှာ။

15 ဆေ အုဝ် ဒီ ဘော ဖျာက် ဇဝ်ဖြာ ပါယ် တီ၊ အုဝ် ဒီ ဘော ကာလုဝ် ဒီ ဂေ ဒူအီ ပီ အိုပ် ဇဝ်ဖြာ။

16 အုဝ် ဘော ကာဒွါ့ ကာဖာ၊ တဲး န့ ကာလှုး ဒီ နဝ်း အုဝ် လွင် ပီ ဘူင် ဇဝ်ဖြာ။ န့ ယီ ဘဲန် ဒုက် ကာဆဝ် ဒီ နဝ်း အုဝ်။

17 ဝါယ် တီ၊ ဒေါ ဝီ ဟာဝ် အုဝ် ခဲင် ဟုဝ် ဇဝ်ဖြာ၊ အုဝ် ဘော ဝီ နပ် ဆီချာ ပီ ဒီ ပါယ် ပန် ဒီ တူတ့် အာဆာက် ဂေ ဒူအီ ဟာယ် ဒူအီ မိူက်။

18 န့ ပီ မဲ ဇဝ်ဖြာ ဟဲ့ တဲး ဂေ ကွယ် ဒူင် ဂ့လျီတ် ကာဆဝ်။ ဟဲ့ ဟွတ့်၊ မဲ ဘော ဘူင် တဲး ဂေ လိုဝ် စှိုမ် တူတ့်။

19 ဂေ ဒီ လိုဝ် စှိုမ် တူတ့် အူ ဇေန့်။ ဂေ ဒီ ဇမ် တူတ့် ဒူင် မွှိုမ် ယုဝ် ကာဆဝ်။

20 န့ ပီ ဒူအီ အိတ် မ့ဘာဝ်။ ပြဲ ဟီ ဝး၊ ပီ မ့ဘာဝ် အန် ဟဲ့ ဟွတ့် ဟြာယ် တူတ့်။ ပါယ် တီ မဲ ဇဝ်ဖြာ ဒီ ဘော ဘူင် တဲး ဂေ ဟြာယ် တူတ့် အူ ဇေန့်။

21 ဒေါ ကာဒွါ့ ကာဖာ အုဝ် လွင် အန် တီ၊ န့ ဘဲန် က့လိုဝ် ဘဲန် ဆဝ် ဒီ နဝ်း အုဝ်။

22 အုဝ် မိူဝ် တူ မိုဝ်း အာငျာန် မာဆေ၊ ပီ ဒုဝ် ဆတ်ဒါဝါ။ အာဝ် ကာလှုး မာဆေ ဒီ အုဝ် လွင် မဲ ဇဝ်။

23 မာလဲ၊ မဲ ဇဝ် ယီ ကွယ် ရိုမ် ဒူပ် အုဝ်၊ ယဲတ့် အုဝ် ဆေဆေ။

24 မဲ ဇဝ် ဒီ ယဲတ့် အုဝ်၊ တဲး အုဝ် နပ် အာကျာမ် အာငျာန် မဲ။ ဟဲ့ ဟွတ့်၊ မဲ ဒီ တဲး အုဝ် ကွယ် ဒူင် ဆီချာ။ မဲ ဒီ ဝီ မျုက် အုဝ်၊ တဲး အုဝ် မိုဝ်း ဆာရေ။

25 ဒဲင် မဲ ဇဝ်ဖြာ အူ ကာဒင် နီ၊ အုဝ် တူ မိုဝ်း ဒီ ဘိုင် မာဆေ ဘော ခဲင် ဂါင်ဟြာဝ် ဘော ဒဲင် ကာဒါယ်။ အာဝ် မိုဝ်း မာဆေ ပီ လုဝ် အုဝ်။

26 နဝ်း အုဝ် ဂေ ဒုဝ် အုဝ် ပီ ဘော ဒီလှး ကာဆဝ် မိူဝ်၊ မဲ ဇဝ် ယီ ဝီ တဲး ပ့လူမ် တဲး ဟဲန့် ဒီ အုဝ်။ မဲ ဇဝ် ဘော မုး ဒါ ကာညာ ဒူင် ဘိုင် အုဝ် ဆေဆေ။

27 ဂေ အီ တူ ဘိုင် အီ ကာယဝ်း ဒီ မဲ ဇဝ်၊ ဂေ ဒီ ဘော စှိုမ် အာခ်ု မှာန်။ မဲ ဇဝ် ဒီ ဘော ဝဲန် ဂေ အီ တူ ထူမ် ဒူပ် မဲ ဇဝ်။

28 အီ မုး အုဝ်၊ အုဝ် ဒါခိုယ် ဆေ အုဝ် ကွယ် ခူပ် မဲ ဇဝ်။ အုဝ် ဘော ချြီင် ဒူင် ကွယ် ဇဝ်ဖြာ အီ အိုပ် တူတ့် မျုဝ် အီ မိုဝ်း ပွုန်။ အုဝ် ဒီ ကာလာင် ပဲ့ ဟဲ့ ဘူင် မဲ ဇဝ် ဒွန် မျုဝ်။