1 အိုယ် မဲ ဇဝ်ဖြာ၊ မှာန့်၊ တဲး မဲ ဇဝ် မာနုဝ် ခုန်ဒီခမ်၊ တဲး အန် နပ် ဒီ ဆုင်ဖျာတ်၊ တဲး န့ ပီ ပီ ဆုင်ဖျာတ် မဲ။ နဝ်း ဆိူဝ် နဝ်း မှာန် မဲ ဇဝ်၊ တဲး မဲ ဒွါ ဘော ဒီ အန်။

2 တဲး အန် ဝီ ပွိုန် ဒီ ဆုင်ဖျာတ် နာ မှာန် ဒီ ဂေ ဒူအီ ပီ အိုပ် မဲ ဇဝ်၊ တဲး အန် ဝီ ဆုင်ဖျာတ် ကာရမ် ဒီ ဒူအီ အီ ဟဲ့ ခမ် ဒုက်။

3 ကူပ် ဘူင် အန် နာ မုး နာ မှာန်၊ ဂေ ဒူအီ ခဲင် မိူင် ဘော မိူင် ဒီ ဘော ခူယ် ဒါခိုယ်။

4 ခုန်ဒီခမ် တီ၊ အန် ဒီ ဘော ဆုင်ဖျာတ် ဒီ ဂေ ဒူအီ ဒုက် ဒူအီ ဂိန်၊ တဲး န့ ကာရမ်။ အန် ဒီ ဘော စွယ် ဂွန် ဂေ အီ တူ မိုဝ်း မာဆေ၊ ဘော ပျာတ့် ဂေ အီ ဘူင် နာ စီစိဝ် ဒီ အီ။

5 ဒေါ ဆီ ဘ့လာင် မာဂျီန် ဂေ ဆီငဲ၊ တဲး အန် အိုပ် ဘဲန် ဇာတ် ဘဲန် ဇာတ်။

6 ဒေါ အိုပ် ခုန်ဒီခမ် တီ ဒီ ဒူအီ၊ တဲး န့ ပီ ဂ့လာယ် အီ စုဝ်း ခဲင် ဒူင် နာ၊ တဲး န့ ပီ ဘော အိုမ် ဂ့လာယ် အီ စုဝ်း၊ တဲး ကာဒါယ် အမ်။

7 ဒေါ ကွယ် အန် တီ၊ ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘော ကိူန် ကာဆဝ်။ ဂေ ဒီ ဘော ကွယ် ဂျာမ်ဆာ ဒါခိုယ် ဒွန် အီ၊ တဲး န့ ကော ဇမ် ပန် ဒီ ဟြာယ် ဘ့လာင် မာဂျီန်။

8 မာန် မိူင် ပီ အိုပ် အန် ဒီ ဘော ကာဝဝ်း ကာဆဝ်၊ န့ ဒီ ဘော စုး ဒီ အိုမ် နမ်မုက်ဆာရာ အူ ဘ့လာက်၊ ကော ဝီ ဇမ် အိုမ် နမ်မုက်ဆာရာ ပေါ အူ ဘ့လာက်။ န့ ဒီ ဘော စုး ဒီ အိုမ် ဘ့လဲင် အူဖာရာတ်၊ ကော ဇမ် ဒူင် ဆိူတ် ကာဒါယ်။

9 ဂေ ဒူအီ အီ ကွယ် ခဲင် ပြဲ ကာဟဝ်း၊ ဂေ ဒီ ဘော တး ဂူမ်၊ တး ကြိုပ် အန်။ ခဲ့ ကွယ် ရန်ဆူ အန် ဘောကာဂ့လျီတ်၊ ဂေ ဒီ ဘော တး ဒူင် ကွယ် အန်၊ ဝီ မုတ် ဂိုပ် ဒီ ကာဒါယ်။

10 ဂေ ခုန်ဒီခမ် အီ ကွယ် မိူင် ထာဆိတ် ဘော ခုန်ဒီခမ် အီ ကွယ် ခဲင် ဂုန် အိုမ် နမ်မုက်ဆာရာ၊ ဂေ ဒီ ဘော တး ဟပ် စိုင် ဒီ အန်။ ဂေ ခုန်ဒီခမ် ခဲင် မိူင် ဆေဘာ ဘော ခဲင် မိူင် ဆာဘာ၊ ဂေ ဒီ ဘော တး ဒွါ လက်ဆွင် ဒီ အန်။

11 ခဲ့ ကွယ် ခုန်ဒီခမ် ဘောကာဂ့လျီတ် ဒီ ဘော လုဝ် တး ဂူမ်၊ တး ကြိုပ် အန်။ ဂေ ဒူအီ ဒွန် ဇိုဝ် ဒွန် ခြိုဝ် ဒီ ဘော ဘဲန် ဒဲစေန့် အန်။

12 ဂေ ဒူအီ အီ ခမ် ဒုက်၊ အီ ဟဲ့ မှာန့် ဒီ အန်၊ အန် ဒီ တဲး ဂေ ဝီ ဒါခိုယ်။ ဘော ဂေ အီ တူ မိုဝ်း မာဆေ၊ အီ တူ မိုဝ်း ဒူင် ဒီ ဘိုင်၊ အန် ဘော စွယ် ဂေ။

13 အန် ဘော မိုဝ်း နဝ်း ကာဝေ ဂေ ဒူအီ ဂိန် အီ ခမ် ဒုက်။ အန် ဘော ချွတ် အာဆာက် ဂေ အီ တူ မိုဝ်း မာဆေ။

14 အန် ဘော ထုတ် လေး ဂေ ဒီ ဒူအီ ဟာယ် ဘော ဒီ ဂေ အီ ခါနှာပ် အီ ဟဝ်။ ခုဝ်၊ အန် နပ် အာဆာက် ဂေ ဟဲ့ ငဝ်း တာင်။

15 တဲး အာဆာက် ခုန်ဒီခမ် တူင့် ကာဆဝ်။ တဲး အန် ဘော ပွိုန် ခြိဝ် အီ တး ဒီ မိူင် ဆေဘာ။ တဲး ဒူအီ ဆာခိုဝ် အာဒါ အန် ဒွင် ခိူန် ဒွင် ဝန်။ တဲး အန် ဘော ပွိုန် ပီ မွင့်ကာရာ ဒွါ ဇဝ်ဖြာ ဆေဆေ။

16 တဲး ငှုဝ် ဂေ ဒီဂါဝ် ဘော မိုဝ်း ကိူန် ကာဆဝ် ခဲင် မိူင် ပီ အိုပ် အန်။ ကာယူင့် ငှုဝ် ဘော ဘ့လေ ပီ ဆမ် ဂေ ဒွန် နွန်၊ တဲး န့ ဘော မွှိုမ် ဘော မိုက်၊ တဲး န့ ကော ပီ ဟေ အီ ကွယ် ဒီ နွန် လေဘာနုန်။ ခဲင် မိူင် ပီ အိုပ် အန်၊ တဲး န့ ဘော မိုဝ်း ဘ့လေ ကိူန် ပီ ပေတ့်။

17 တဲး အန် မိုဝ်း ဆာရေ ဆေဆေ။ ကွဲ့ တဲး ဂေ ပိဝ် အန် ဒေါ မှဝ်။ ခုဝ်၊ ဂေ ဒူအီ ဒွန် မျုဝ် ဒီ ပွိုန် မွင့်ကာရာ ပီ ဒွါ ဇဝ်ဖြာ ကူပ် မုး အန် ခုန်ဒီခမ်။

18 အိုယ် ဇဝ်ဖြာ၊ ယေ အိူပ် မဲ ဇဝ် အီ မုး ဇဝ်ဖြာ ပီ ကြိုပ် ယေ ဒူအီ အီဆာရေလ။ န့ မိုဝ်း မီ မဲ ဇဝ် အူ ကာဒင် အီ ဘူင် နာ မွှိုမ် အာမ် ကာဆဝ်။

19 တဲး အေ အိူပ် အန် ဇဝ် အီ မိုဝ်း အာဖုင် ဒင်ခုဝ် တာင် ဆေဆေ။ တဲး အီ ကွယ် ဒဲင် ကာဒါယ် နီ ဒွန် အီ ကော နပ် လွင် အာဖုင် ဒင်ခုဝ် ဇဝ်ဖြာ။ ဆာတူ ဆာတူ။

20 ပီ မှုဝ် ထမ် ပီ ဒဲမ် အာဒါဝိတ် အီ မုး ဂွန် အာယေဆေ၊ ဟဲ့ တူတ့် ပုင် နီ။