1 အိုယ် မဲ ဇဝ်ဖြာ၊ အုဝ် ဒီ ဘိုင် မဲ ဇဝ်။ အုဝ် မှာန့်၊ ကွဲ့ တဲး အုဝ် မွှိုမ် ဆာယ် ဒေါ မှဝ်။

2 တဲး မဲ ဇဝ် စွယ် အုဝ် ခဲ့ မိုဝ်း မဲ နဝ်း ဆိူဝ် နဝ်း မှာန်။ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ် ဘော ချွတ် အုဝ်။

3 မဲ ဇဝ် ဟဲ့ ပီ ဒါအာင် မာဝ် ဒူင် ဘိုင် အုဝ် ဆေဆေ။ မဲ ဇဝ် ဟဲ့ ပီ မင် ဂွင့်၊ ဟဲ့ ပီ ဘော ဒူင် ဘိုင် ဒူင် အိင် အုဝ်၊ အီ ရဲ အီ ဂွင့် အုဝ်။

4 အိုယ် မဲ ဇဝ်ဖြာ၊ အုဝ် မှာန့် တဲး မဲ ဇဝ် ချွတ် အုဝ်၊ တဲး အုဝ် လွတ် တ ဂေ ဒူအီ ဟာယ် ဒူအီ မိူက် ဘော ဂေ ဒူအီ တူ မွှိုမ် အီ ဟာယ် ကာဆဝ် ဂေ တွိုန်။

5 အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဘော နှဝ့် န့ဒဝ့် ကာဆဝ် မဲ ဇဝ်။ အုဝ် ဟဲ့ ညှိုမ် ဘိုင် မဲ ဇဝ် ဆိန့် ဒီတဲတ် အုဝ်။

6 အုဝ် ဒီ ဘိုင် ညှိုမ် မဲ ဇဝ် ဘော စုဝ် အုဝ်။ မဲ ဇဝ် မိူဝ်၊ ဟဲ့ ရဲ ဟဲ့ ဂွင့် အုဝ် ဆိန့် ဒေါ ဂွိုတ် အုဝ်။ အုဝ် ဒီ အိူပ် မဲ ဇဝ် ဆေဆေ။

7 အုဝ် ဟဲ့ ဘဲန် လက်ဆာနာ ဒီ အီ ဟဝ် အီ ကိူန် ကာဆဝ်။ မာလဲ၊ မဲ ဇဝ်ဖြာ ဘော မုး ဒူင် ဘိုင် ဒူင် ချြီင် ဆီချာ အုဝ် ဒီ အုဝ်။

8 ဒွန် ဆီငဲ အုဝ် ဒီ တဝ်း မှုဝ် အီ အိူပ် မဲ ဇဝ် ဘော ကာလာင် ခဲ့ တာင် အာဖုင် ဒင်ခုဝ် မဲ ဇဝ်။

9 ဆေ အုဝ် ဟီ ကတ် ဟီ ဂဲ၊ အာဝ် ဟူ မိုဝ်း ပ့လူမ် မိုဝ်း ဟဲန့်၊ မဲ ဇဝ် ကွဲ့ ဘ့လေး ကွဲ့ ဝဲန် အုဝ်။

10 ဂေ ရန်ဆူ အုဝ် ဘော ဟြေတ့် ဒီ ငဝ်း ယမ် အုဝ်။ ဂေ ဘော ကာလာင် ကာဘး ဒီ အုဝ်။

11 ဂေ ဘော တဝ်း၊ “ဇဝ်ဖြာ ဟဲ့ ဟွတ့် ဘ့လေး ဝဲန် အန်။ တဲး အေ ခုင်ခြး မှေတ့် အန်၊ အာဝ် မိုဝ်း အာဆေ အီ ဒီ စွယ် ဒီ ချွတ် အန်။”

12 အုဝ် မှာန့် တဲး မဲ ဇဝ် တး ကွယ် ရိုမ် ဒူပ် အုဝ်။ တဲး မဲ ဇဝ် တး စွယ် အုဝ် ခြန် ခြန်။

13 ဂေ အီ ဆီ ကာခဲန့် ဒီ အုဝ်၊ တဲး ဂေ ဝီ စှိုမ် တူတ့်။ ဂေ အီ ဆီ ဘူင် နာ စီစိဝ် ဒီ အုဝ်၊ တဲး ဂေ ဝီ ဆာယ် အီ ဟဝ် ဘော စှိုမ် ဆာရေ။

14 အုဝ် ဒီ ဘော နှဝ့် န့ဒဝ့် မဲ ဇဝ်ဖြာ ဆေဆေ။ အုဝ် ဒီ ဘော အိူပ် မဲ ဇဝ် လွှိုမ် အာတ့် နီ။

15 ဒွန် ဆီငဲ ဒွန် ဆီငဲ၊ အုဝ် ဒီ ဘော ကာလာင် နာ ဘွတ် နာ မွှိုမ် မဲ ဇဝ် ဘော လွင် မဲ ဇဝ် ချွတ် အီ။ န့ ဟဲ့ ကိူန် ကာဆဝ် ပဲ့ ဟဲ့ ဘူင် မဲ ဇဝ်၊ အာဝ် ဟူ ဟွတ့် ဒီ တိး။

16 အိုယ် မဲ ဇဝ်ဖြာ အီ အိုပ် တူတ့် ခဲင် ဂါင်ဟြာဝ်၊ အုဝ် ဒီ ခဲ လွင် ပဲ့ ဟဲ့ ဘူင် ပဲ့ ဟဲ့ ဘျ မဲ ဇဝ် နဝ်း ဆိူဝ် နဝ်း မှာန် မဲ ဒီ အီ။ အုဝ် ဒီ ကာလာင် မီ လွင် နာ ဘွတ် နာ မွှိုမ် ပဲ့ ဟဲ့ ဘူင် မဲ ဇဝ်။

17 ဆိန့် ဒီတဲတ် အုဝ် မဲ ဇဝ် ဟဲ့ မာနုဝ် အုဝ်။ အုဝ် မိူဝ် ဟဲ့ ကာလာင် အီ မွှိုမ် အာမ် ပဲ့ ဟဲ့ ဘူင် မဲ ဇဝ် ကော ဇမ် ဒေါ တီ နီ။

18 အိုယ် မဲ ဇဝ်ဖြာ၊ ဆေ အုဝ် ဟီ ကတ်၊ ဟိုက် ဂိန့် အုဝ် မိူဝ် ဟဲ့ လုယ်၊ မဲ ဇဝ် ကွဲ့ ဘ့လေး ကွဲ့ ဝဲန် အုဝ်။ တဲး အုဝ် ကာလာင် ဘျ အာဖုင် ဒင်ခုဝ် ဘော ပွုန် မဲ ဇဝ် ဒီ ဂေ ဒူအီ ဒေါ တီ နီ၊ ဘော ဒီ ဂေ အီ ဒီ ဂွိုတ် ဝါယ် နီ။

19 အိုယ် မဲ ဇဝ်ဖြာ၊ နဝ်း ဆိူဝ် နဝ်း မှာန် မဲ ဇဝ် ဟဲ့ စာ ကာဆဝ် ကော ဒုး ဘ့လေန့်။ လွင် ပဲ့ ဟဲ့ ဘူင် မဲ ဇဝ် ဟဲ့ အာရေ တာင် ကာဆဝ်၊ အာဝ် မိုဝ်း အာဆေ အီ ပီ မဲ ဇဝ်။

20 မဲ ဇဝ် ဟဲ့ တဲး အုဝ် ယိုဝ် အီ တူ မွှိုမ် အီ ဟာယ် ကာဆဝ်။ မဲ ဇဝ် ပီ ဝီ တဲး ပ့လူမ် တဲး ဟဲန့် ဒီ အုဝ်၊ ဝီ တဲး အုဝ် ဒါခိုယ် ဂျာမ်ဆာ။ ဟဲ့ ပီ မဲ ဇဝ် ဟဲ့ ဒိုဝ်း လေး အုဝ် ခဲင် ကာဒဝ် ဘာရေဝ်။

21 မဲ ဇဝ် ဝီ ဘူင် တဲး အုဝ် မိုဝ်း ကြုဝ်ကြာမ် ကိူန်၊ ဝီ တဲး အုဝ် ဂျာမ်ဆာ ဒါခိုယ်။

22 အိုယ် ဇဝ်ဖြာ၊ မဲ ဇဝ် ဘော မုး ဇဝ်ဖြာ ပီ ကြိုပ် အုဝ်။ အုဝ် ဒီ ဘး ဒိင် ဘော အိူပ် မဲ ဇဝ် ကူပ် ဘူင် မဲ နာ မုး နာ မှာန် ဆေဆေ။ မဲ ဇဝ်ဖြာ အီ ဆီငါ ဘွတ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အုဝ် ဒီ ဘး ဒိင် တဝ်း မှုဝ်၊ အိူပ် မဲ ဇဝ်။

23 ဒေါ ဘး အုဝ် ဒိင် တီ၊ အုဝ် ဒီ ဘော ကာလာင် ဂြုဝ်း ဒါခိုယ် ဒဲ့ မဲ ဇဝ်။ အုဝ် ဒီ ဘော ဟပ် ဘော နဝ်း ဘော ဖွိုမ် အုဝ်၊ တဝ်း မှုဝ် ကူပ် ဟဲ့ ချွတ် မဲ ဇဝ် ဒီ အုဝ်။

24 ဒွန် ဆီငဲ ဒွန် ဆီငဲ၊ အုဝ် ဒီ ကာလာင် နာ မုး နာ မှာန် ပဲ့ ဟဲ့ ဘူင် မဲ ဇဝ်။ ခုဝ်၊ တဲး ဂေ အီ ဆီ ဘူင် နာ စီစိဝ် ဒီ အုဝ်၊ ဝီ စှိုမ် ဆာရေ ဘော ဆာယ် အီ။