1 အိုယ် မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ အုဝ် ဒီကေန် မဲ ဇဝ်။ နဝ်း ဖွိုမ် အုဝ် ဘော ကာပြာ ဒီ ကွယ် ချြီ့ မဲ ဇဝ်။ န့ ပီ အုဝ် ဟဲ့ ကွယ် ခဲင် ဒူင် ကာဟဝ်း၊ တူ မိုဝ်း ဒီ ဒျီင် အိုမ်၊ တဲး အုဝ် ဒီလှး။ ခုဝ်၊ အုဝ် ဟဲ့ ဒီကေန် ကာဆဝ် မဲ ဇဝ်။

2 အုဝ် ဟဲ့ ယွတ် မဲ ဇဝ် ဒေါ ကွယ် အုဝ် ခဲင် ထိုပ် ဘွတ်။ ဒေါ အန် တီ အုဝ် မိူဝ် ဟဲ့ ယိုဝ် အာဖုင် ဒင်ခုဝ် ဘော ပွုန် မဲ ဇဝ်။

3 ဆေ မဲ ဇဝ် ရွက့် ကာဝေ အုဝ်၊ န့ မွှိုမ် လွှိုမ် အုဝ် မိုဝ်း အာဆာက်။ ခုဝ်၊ အုဝ် ဝီ အိူပ် မျုက် မဲ ဇဝ်ဖြာ ဆေဆေ။

4 ကူပ် န့ ပါယ် တီ၊ အုဝ် ဒီ အိူပ် မဲ ဇဝ် ဘော စုဝ် အုဝ်။ အုဝ် ဒီ ဘော ကြိုပ် မီ မဲ ဇဝ် ဆေဆေ။

5 နဝ်း ဖွိုမ် အုဝ် ဟဲ့ ဒါခိုယ်။ န့ ပီ အုဝ် ဟဲ့ ပွိုန် ဒီ ဟူမ် ဖဲ ခဲင် ဘ့လွယ် တာင်။ အုဝ် ဒီ ဘော တဝ်း မှုဝ် ဒါခိုယ် ဘော အိူပ် မဲ ဇဝ်။

6 ဒေါ ကွယ် အုဝ် ဒဲင် ကာစှူင့် အိတ် အုဝ်၊ အုဝ် ဒီ လှုဝ်း မဲ ဇဝ်။ ဒွင် ခိူန် အုဝ် ဘော ကာဖာ မဲ ဇဝ်။

7 မဲ ဇဝ်ဖြာ မုး ဒူင် ဘိုင် အုဝ်။ ခုဝ်၊ အုဝ် ဘော တဝ်း မှုဝ် ဒါခိုယ်။ ဒေါ ကွယ် အုဝ် ခူပ် မဲ န့ ပီ ဂွန် မာဆိမ် ကွယ် ခြိုမ် ဖျီင် မာ အန်။

8 နဝ်း ဖွိုမ် အုဝ် ဘော ကာဒိုက် ကာဒဝ့် ဒီ မဲ ဇဝ်ဖြာ။ မဲ ဇဝ် ဘော စွယ် အုဝ်။

9 ဂေ အီ ဟြေတ့် ဒီ ငဝ်း အုဝ်၊ ဂေ ဒီ စှိုမ်။ ဂေ ဒီ စုဝ်း လူင် တူတ့် ခဲင် မိူင် မာရာန။

10 ဂေ ဒီ ဘော ယမ် ဒီ မာပွါ့ လာင်၊ ဝီ ဘဲန် ပီ ဒီ ဟူမ် မာဆုဝ် ပြဲ။

11 န့ ယီ မုး ခုန်ဒီခမ်၊ ကူပ် လှုဝ်း အန် ဇဝ်ဖြာ၊ အန် ဒီ ဘော ဘျုဝ် ဒါခိုယ်။ ဂေ အီ ဒိူင် ကာဆဲန့် တဲး ဇဝ်ဖြာ ထူမ်၊ ဂေ ဒွန် အီ ဒီ ဘော အိူပ် ပွုန် အန် ဇဝ်။ ဂေ အီ နပ် ဒီ ကာလုဝ် ယီ တူ ပွိုန် တဝ်း မာဆေ။