1 အုဝ် ဘိုင် မီ ဇဝ်ဖြာ အူ ကာဒင်။ မီ အန် ဇဝ် အီ တဲး နဝ်း အုဝ် ယေန်။ န့ မုး အန် ဇဝ် အီ ဒီ ချွတ် အုဝ်။

2 ဇဝ်ဖြာ ဘော ပီ ဒါအာင် မာဝ် အီ တဲး အုဝ် ကွယ် ဆီချာ။ အန် ဒီ ဘော ချွတ် အုဝ်။ အန် တဲး အုဝ် ကွယ် ဆီချာ၊ တူ တဲး အုဝ် စှိုမ် ဒေါ မှဝ်။

3 ဘေ ဘောကာဂ့လျီတ်၊ ကွဲ့ တဲး ဘေ မး လှေန့် ဒူအီ အူ ဝီ အီ ပီ ရဲင် မာဝ် မာအုတ် ဘော လူင့် အီ ဟဲ့ ကျီင်၊ ဟဲ့ ရိန် ဒီ ကေး။

4 ဘေ ဘော ခြာမ် ဒီ ဘူင် တဲး အန် စုဝ်း လူင် ဒူင် စာ၊ ဒူင် ကွယ် အန်။ ဘေ ဘော အိုင် ဒီ ကာလုဝ် ဆေဆေ။ ဘေ ဘော ညိုင်ရာင် ကာလာင် ဂြုဝ်း မွှိုမ်။ ဘေ ယီ ဒိူင်၊ ယီ အေး ခဲင် နဝ်း ဘေ။

5 အိုယ် နဝ်း အုဝ်၊ တဲး မဲ ဘိုင် မီ ဇဝ်ဖြာ အူ ကာဒင်။ အုဝ် နှဝ့် န့ဒဝ့် မီ အန် ဇဝ် အူ ကာဒင်။

6 အန် ဇဝ် ဘော ပီ ဒါအာင် မာဝ် အီ တဲး အုဝ် ကွယ် ဆီချာ။ အန် ဒီ ဘော ချွတ် အုဝ်။ အန် ဇဝ် တဲး အုဝ် ကွယ် ဆီချာ၊ ကွဲ့ တဲး အုဝ် စှိုမ် ဒေါ မှဝ်။

7 ခုဝ်၊ န့ မုး ဇဝ်ဖြာ အီ ချွတ် အုဝ်၊ တဲး အုဝ် မိုဝ်း ဆာရေ။ အန် ဇဝ် ဘော ပီ ဒါအာင် မာဝ် အီ တဲး အုဝ် ကွယ် ဆီချာ။ အန် ဘော တဲး အုဝ် ချြီင် ဒူင် ကွယ် အန်။

8 အိုယ် ဘေ ဒူအီ ဘောကာဂ့လျီတ်၊ တဲး ဘေ ဘိုင် ဇဝ်ဖြာ ဆေဆေ။ အီ ဒုက် ဒီ နဝ်း ဘေ ဒွန် မျုဝ်၊ တဲး ဘေ ကာလာင် တူတ့် ဒီ ဇဝ်ဖြာ။

9 ဂေ ဒူအီ ဂိန်၊ ဂေ ပီ ဖွိုမ် အီ ဟိုဝ်း ဟြာယ်။ ဂေ ဒူအီ ခြမ် ယီ တူ ခုဝ် မာဆေ။ ဆေ ဟီ ဆ ဂေ ဘောကာဂ့လျီတ် ဒဲင် လစူ၊ ဂေ ဒီ န့စိုဝ် ပီ ဟိုတ့်။

10 ကွဲ့ တဲး နဝ်း ဘေ ဒါခိုယ် ကူပ် ခါနှာပ် ဘေ အီ ဟဝ်။ ကွဲ့ တဲး ဘေ ပီခိုက် ကူပ် ဖာတ် ဘေ ကြုဝ်ကြာမ် အီ ဟဝ်။ ကြုဝ်ကြာမ် ဘေ ပီ ဘော ဟဲ့ ဘြဲ ဟဲ့ ကိူန်၊ ကွဲ့ တဲး နဝ်း ဘေ ဒိုက် ဒီ တီ။

11 ဇဝ်ဖြာ ဟဲ့ ကာလာင် အူ မျုဝ်။ အုဝ် မိူဝ် ဟဲ့ ဝီ ယိုဝ် အာ မျုဝ်။ အူ မျုဝ် ဟဲ့ မုး လွင် မဲ ဇဝ်ဖြာ မိုဝ်း ပွုန် တာင်။

12 ပေါ အူ မျုဝ် မုး လွင် မဲ ဇဝ်ဖြာ မိုဝ်း နဝ်း ရွက့် ကာဝေ ဆေဆေ။ ဘော ဒူအီ မွှိုမ် ဘော ဒူအီ တူ မွှိုမ်၊ မဲ ဇဝ်ဖြာ ဒီ ဝီ ဘူင် ဝျီ့ ဒီ ဂေ ဝီ မှဝ် ဝီ အန်၊ ခဲ့ ပီ ဒွိုမ် ဘူင် ဂေ ဒီ အီ။