ခါန် 60
ပီ ဆာခိုဝ် ဒူအီ ဒေါ ဟဲ့ စှိုမ် ဂေ ဒီ ရန်ဆူ
အာဒါဝိတ် ဟဲ့ ဒဲမ် မှုဝ် နီ၊ တဲး န့ မာနုဝ် ဒူအီ။ အန် ဒဲမ် မှုဝ် နီ ဒေါ ကာဂုဝ်း ဂေ ဒီ အာရာမ် နာရာဟမ် ဘော ဒီ အာရာမ် ဇုဝ်ဘာတ်။ ဒေါ အန် တီ အာယောဖ ဟဲ့ ဝီ ဟာဝ် ပေါ အူ ဇေန့်၊ ဝီ ငဝ်း ဒူအီ အေဒူမ် အာဒါ အူ မှိုန့် ဒီ အာ ဟြဲန့် ဝီ၊ ဒေါ ကွယ် ဂေ ဒူပ် ဒီလယ့် ဆယ့်။ တဲး ဒါ အီ ယဲတ့် ဂေ အီ တဝ်း မှုဝ် နပ်၊ လုဝ် ဒူပ် မဲင် အီ စိူဝ် “ဘုဝ်း။”
1 အိုယ် မဲ ဇဝ်ဖြာ၊ မဲ ဇဝ် ဟဲ့ ဘ့လေး ဝဲန် ယေ။ မဲ ဇဝ် ဟဲ့ တဲး ယေ စှိုမ်။ မဲ ဟဲ့ ရူ ဒီ ယေ။ ယေ ဝီ မှာန့်၊ တဲး မဲ ဝီ စွယ် ယေ။
2 မဲ ဇဝ် ဟဲ့ ဘူင် တဲး န့ ပီ မာအိမ် ဟဲ့ ယေန့် ကာဆဝ် ဘော ကာဒါယ် ဟဲ့ ဒး မာတုး။ ခုဝ်၊ အုဝ် ဝီ မှာန့်၊ တဲး ဒူင် ဒး တီ ဝီ ကာဇု ပီ ဘြိမ်။ ကွဲ့ ဟူ တဲး အန် ဒီယေန့်။
3 မဲ ဇဝ် ဟဲ့ ဘူင် တဲး န့ ညှာပ် ကာဆဝ် ဒီ ဒူအီ အီ ကြိုပ် မဲ ဇဝ်။ မဲ ဘော ခါနှာပ် ဂေ၊ တဲး န့ ပီ ဂေ ဒျီင် အိုမ် မာငုန် အီ တဲး ဂေ ယိုတ့် ကာဆဝ် ကော ကေး။
4 အီ မုး ဂေ အီ ရုဝ်ဆေ မဲ ဇဝ်၊ တဲး မဲ ဇဝ် ဒွါ အာလာမ် ဒီ ဂေ၊ တဲး ဂေ ပွိုန် ဒီ တဝ် ဟာဝ် ဒူပ်၊ တဲး ဂေ လွတ် ဘ့လာ အ ပီ ဘန့် ရန်ဆူ။
5 အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် ယေ၊ ဘော ဝီ တဲး ပ့လူမ် ဒီ ယေ။ တဲး မဲ ချွတ် ဂေ ဒူအီ ပီ ရွက့် မဲ ဇဝ်။
6 ဇဝ်ဖြာ ဘော ကွယ် ဒူင် ဘွတ်၊ ဒူင် ကြိုပ် အီ ဒီ အန်။ အန် ဟဲ့ တဝ်း၊ “အုဝ် ဒီ ဘူင် ဘ့လွယ် ကာဂုဝ်း အွင် ဘော ကာဆာင် မိူင် ဆေခေမ်။ အုဝ် ဒီ ဂဝ် ဒီ ကာဆာင် ဒီလယ့် အီ စိူဝ် ဆူခူတ်၊ ဒွါ ဒီ ဒူအီ အာမျုဝ် အုဝ်။
7 အိူင် ဂီလေအာတ် ဘော မုး အိူင် အုဝ်။ အိူင် မာနာဆေ ဘော မုး အိူင် အုဝ်။ အိူင် အေဖာရိမ် ဘော ပီ မာဂိန့် ဟိန် အုဝ်။ အိူင် ယူဒါ ဘော ပီ လျီး ပီ ဂူင့် အုဝ်။
8 အိူင် မုဝ်အာပ် ဘော ပီ မ့ပါန် အိုမ်၊ ဒူင် ဒီ တာ အုဝ်။ အိူင် အေဒူမ် ဘော ဘဲန် ဒူင် ဘုတ့် အုန် အုဝ် ခူဒိန့် အုဝ်။ အုဝ် ဒီ ဘော ဒတ် တာင် ကူပ် ဟဲ့ ပဲ ဟဲ့ အွင် အုဝ် ရန်ဆူ ခဲင် အိူင် ဖီလီထီ။” ခဲ့ တီ ဇဝ်ဖြာ ဟဲ့ ကာလာင်။
9 အိုယ် မဲ ဇဝ်ဖြာ၊ အာဆေ ဒီ ယဲတ့် ဟာဝ် အုဝ် ဇမ် ခဲင် မိူင် အီ မိုဝ်း ရဲင် တာင်။း အာဆေ ဒီ ဟာဝ် ရိုမ် ဒူပ် အုဝ်၊ တဲး ကော ဇမ် အိူင် အေဒူမ်။း
10 န့ မုး မဲ ဇဝ်ဖြာ၊ အုဝ် လုဝ် မဲ ဟာဝ် ရိုမ် ဒူပ် အုဝ်။ မဲ ဇဝ် ယဲ့ ဟဲ့ ဝဲန် ယေ။ မဲ ဇဝ် အာဝ် ဟူ ဟာဝ် ဒူပ် ဒါ ဘုဝ် ဒါ ဆိုက် ယေ။
11 အုဝ် မှာန့်၊ တဲး မဲ ဇဝ် ဝီ စွယ်၊ တဲး ယေ ပဲ ရန်ဆူ ယေ။ ဆေ န့ မုး ပီ စွယ် ဒူအီ၊ အန် တူ ခုဝ် မာဆေ။
12 ခုဝ်၊ န့ ဘော မုး မဲ ဇဝ်ဖြာ အီ ဘူင် တဲး ယေ ပဲ ရန်ဆူ ယေ၊ တဲး ဂေ စှိုမ် တူတ့်။