1 အိုယ် မဲ ဇဝ်ဖြာ၊ အုဝ် မှာန့်၊ တဲး အုဝ် လွတ် ဒီ ဂေ ရန်ဆူ အုဝ်၊ တဲး မဲ ဂွင့် ရဲ အုဝ် ဒီ ဂေ အီ ဆီ ကာဂုဝ်း ဒီ အုဝ်။

2 အုဝ် မှာန့်၊ တဲး အုဝ် လွတ် ဒီ ဂေ ဒူအီ ဟာယ်။ တဲး မဲ ဇဝ် ချွတ် လေး အုဝ် ဒီ ဂေ အီ ဆီ ငဝ်း အုဝ်။

3 တဲး မဲ ယွတ်၊ ဂေ အီ မိုဝ်း ပ့လူမ် တာင်၊ ဂေ ဘော ဘ်ု ဒီ ငဝ်း ယမ် အုဝ်။ ဂေ ဘော ကွယ် ကာဇု၊ ဘ်ု ဒီ ကာဂုဝ်း ဒီ အုဝ်။ အိုယ် မဲ ဇဝ်ဖြာ၊ အာဝ် မုး ကူပ် မှာပ် ပဲ့ ဟဲ့ ကာလိုပ် အုဝ်။

4 အုဝ် တူ မိုဝ်း ဒီ လုတ့် ဂေ မာဆေ၊ ဂေ ယီ တဝ်း ဒီ တး ကာဂုဝ်း ဒူင် ကွယ် အုဝ်။ အုဝ် မှာန့်၊ တဲး မဲ ဇဝ် တး စွယ် အုဝ်၊ ကွဲ့ တဲး မဲ ပိဝ် အုဝ်။

5 မဲ ဇဝ်ဖြာ၊ မဲ မုး ဇဝ်ဖြာ အီ တာင် လွှိုမ် တူတ့်၊ မဲ ဇဝ် ဘော မုး ဇဝ်ဖြာ ပီ ကြိုပ် ယေ ဒူအီ အီဆာရေလ။ တဲး မဲ ဇဝ် တး ဒမ် မှာပ် ဒီ ဒူအီ ဒွန် မျုဝ်။ အီ မုး ဂေ ဒူအီ မိူက်၊ ကွဲ့ ကာဝေ ခေါ အူ ဝီ။

6 ဂေ ဝီ တး ဒွန် ဘာ ဒီ အပ်။ ဂေ ဘော ကာအိူန် ဂြန့် ဟြာင် ဂေ ပီ မာဆုဝ်။ ဂေ ဘော ဝိန် ဒီ လဲ လဲပ် ခဲင် မိူင်။

7 မူတ့် ဂေ ဘော ကာလာင် အီ တူ မွှိုမ် ပီ ဆီနမ် ပွင့် ပြာင်။ ဂြုဝ်း ဂေ ဘော ပီ အာတိုမ် အီ ဆတ် အီ။ ဂေ ဘော ကာဖာ ခဲင် နဝ်း ဂေ တဝ်း၊ “အာဝ် မိုဝ်း အာဆေ အီ ထူမ်။”

8 မာလဲ၊ မဲ ဇဝ်ဖြာ ဘော ဝီ ကာညး ဂေ။ တူ မာတ် ဂေ ဒူအီ အာမျုဝ် ဟဝ် ဒွန် ခြိုဝ်။

9 မဲ ဇဝ် ဘော တဲး ပ့လူမ် တဲး ဟဲန့် ဒီ အုဝ်။ အုဝ် ဘော နှဝ့် မဲ ဇဝ်။ မဲ ဘော မုး အီ ရဲ အုဝ်။

10 မဲ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်၊ မဲ ဇဝ် ဘော ရွက့် ကာဝေ အုဝ် ဘော တဲး အုဝ် ယိုဝ် ဒေါ စှိုမ် ရန်ဆူ အုဝ်။

11 မာလဲ၊ မဲ ဇဝ် ကွဲ့ တဲး ဂေ ယမ်၊ တဲး ဂေ ယီ တဝ် ဟာဝ် ဒွန် နာ ဒွန် ပ့လုဝ့်၊ ကွဲ့ တဲး ဂေ ဒူအီ ပီ အိုပ် အုဝ် ပိဝ် လွင် အန် တီ။ မဲ မုး ဇဝ်ဖြာ အီ ရဲ အီ ဂွင့် ယေ။ အာဖုင် ဒင်ခုဝ် မဲ ဇဝ် ဘော နပ် ဒီ ဘူင် တဲး ဂေ ကေး စှိုမ် တူတ့် ဒွန် နာ ဒွန် ပ့လုဝ့်။

12 ကူပ် ဂြုဝ်း ဒိူင် ပီ တဝ်း ဂေ၊ တဲး န့ ဝီ ဘဲန် ပါယ် တီ။ ကူပ် ပီခိုက် ဂေ နဝ်း ဂေ ဘော ကာလာင် ဂြုဝ်း ကာလုဝ်၊ တဲး ဂေ ဝီ ဇမ် ဒုက် တာင် ကာဆဝ်။

13 တဲး မဲ ဇဝ်ဖြာ ဘ့လေး နဝ်း ရူ မဲ ဒီ ဂေ၊ တဲး ဂေ စှိုမ် တူတ့် ဘောကာဂ့လျီတ်၊ ကွဲ့ တဲး န့ ဆီ မိုဝ်း ခေါ အူ ဝီ။ တဲး ဂေ ဒူအီ ဘော ကာဒါယ် ကော နပ်၊ မဲ ဇဝ် မုး ဇဝ်ဖြာ အီ အိုပ် ခြိုဝ် အာကူပ်။

14 ဂေ ဝီ တး ဒွန် ဘာ ဒီ အပ်၊ ကာအိူန် ဂြန့် ဟြာင် ဂေ ပီ မာဆုဝ်။ ဂေ ဝိန် ဒီလဲ လဲပ် ခဲင် မိူင်။

15 ဂေ ဘော လုဝ် ဟာဝ် ဝိဝ် ဟာဝ် ဝေန့် ဒွင် ခိူန်၊ ဟြေတ့် ပီ ဒီ ဟူမ် ဂေ။ ဆေ ဂေ ယီ တူ ဖဲ ဂေ ဒီ ဘော ပြုဝ်း တာင်။

16 န့ ယီ မုး အုဝ်၊ အုဝ် ဒီ တဝ်း မှုဝ် အီ အိူပ် အာဖုင် ဒင်ခုဝ် မဲ ဇဝ်။ ဆိန့်ဝး စေဝ်၊ အုဝ် ဒီ တဝ်း မှုဝ် ဒါခိုယ် အီ အိူပ် မဲ ဇဝ် အီ ရွက့် ကာဝေ အုဝ်။ ဒေါ ဇမ် အုဝ် ဒုက် တာင်၊ မဲ တဲး အုဝ် ကွယ် ဒူင် ကွယ် မဲ၊ တဲး န့ ဘဲန် ဒူင် ချြီင် အုဝ်။

17 မဲ ဇဝ်ဖြာ ဘော မုး အီ တဲး ပ့လူမ် ဂေ ဟဲန့် ဒီ အုဝ်။ မဲ ဇဝ် ဘော ရွက့် ကာဝေ အုဝ် ဘော တဲး အုဝ် ချြီင် ဒူင် ကွယ် မဲ ဆေဆေ။