1 အိုယ် ဘေ အီ မုး ဒါ တာင်၊ ဆေ ဘေ ကာလာင် ဂြုဝ်း၊ ဘေ ထာင် ဟဲ့ မုး ဟဲ့ မှာန်။ ဘေ အာမျုဝ် ဒူအီ၊ ဆေ ဘေ လာယ် ဆုင်ဖျာတ် အာမူ ဘေ၊ ဘေ ထာင် န့ ဟဲ့ ကာရမ်။

2 အာဝ် မုး ပါယ် တီ။ ခဲင် နဝ်း ဘေ၊ ဘေ ခြာမ် ဒီ ဘူင် အီ တူ မွှိုမ်။ ပီ ဘူင် ဘေ၊ န့ မုး မီ အီ မိူက် အီ ဟာယ် ဒဲင် ကာဒါယ် နီ။

3 ဂေ ဒူအီ မိူက်၊ ဂေ ဒီ ကာလိုပ် ဘော စုဝ် ဂေ။ ဂေ ကာလုဝ် ဘော တူ ဘူင် နာ မှာန် ဆိန့် ဒေါ ဂွိုတ် ဂေ။

4 ဂေ ဘော မိုဝ်း ဂူင် အီ ပီ အာယ် မာဟန့်။ ဂေ ပီ မာဟန့် ဂြဝ် အီ ကာဘိတ် ဟျုဝ့် အန်၊

5 ကွဲ့ တဲး အန် ပွိုန် ဒီ ထူမ် ဟမ် ဝဝ် ပီ ဘုတ် ဒူအီ အီ ဒီ အိုပ် အန်။ ဒူအီ တီ ပီ ဘော ဘုတ် ခဲ့ မှဝ်၊ ဟန့် တူ ယိုဝ် မာဆေ၊ တူ တဲး အီ အိုပ် အန်။

6 အိုယ် မဲ ဇဝ်ဖြာ၊ တဲး မဲ ဇဝ် ကာဘက် ဝဲန် ဟြာင် ဂေ။ တဲး မဲ ဒိုဝ်း ဝဲန် ပွုန် ဂေ၊ တဲး န့ ပီ ဒူအီ အီ ထွတ် လေး ပ့လဲ့ မာခြင်ဆီ။

7 တဲး ဂေ ဟြာယ် လှဲ ပီ အိုမ်။ တဲး မဲ ဇဝ် ကာဘက် ဝဲန် ဘော ဘ့လာ အ ပီ ဘန့် ဂေ။

8 တဲး ဂေ ဟြာယ်၊ ပီ ဝ ညိုက် အီ ကာဟဝ်း ဒေါ ဆောဒါတ်။ တဲး ဂေ ပီ ဂွန် အီ ဟဲ့ လိုဝ် ခဲင် ဝတ့် မာ အန်၊ အီ တူ ဒန် ယိုဝ် ဘ့လာင် ဆီငဲ။

9 တဲး မဲ ဇဝ် ဝဲန် ဂေ အာတ့် လှုဝ်း ဂေ ဒုဝ် ဂေ။ တဲး န့ ပီ ဒဝ် မာအာတ့်၊ အီ ငျီန် အီ ကာဟဝ်း၊ ပဲ့ ဟဲ့ ရိုတ့် လေး တူတ့် အီ။

10 ဇဝ်ဖြာ ဒီ ဘူင် ဝျီ့ နာ တူ မွှိုမ် ဒီ ဂေ။ ဂေ အီ မိုဝ်း နဝ်း ဆိူဝ် ဟီ ယိုဝ် လွင် အန် တီ၊ ဂေ ဒီ ဘော ခူယ် ကာဆဝ်။ န့ ပီ ဂေ ဒီ ဘော ညဲတ့် ဟာဝ် ဒဲင် နှာမ် ဂေ အီ တူ မွှိုမ် တီ။

11 ပန် တီ ဂေ အီ ဟဝ် ဒီ ဘော တဝ်း၊ “အိုဝ်၊ ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ယိုဝ် အာဂျိုဝ် အန်။ န့ ဟဲ့ မှာန် ဟဲ့ မုး၊ ဇဝ်ဖြာ ဒီ ဆုင်ဖျာတ် မှာန် ဒါရာ ဒီ ဒူအီ ဒဲင် ကာဒါယ် နီ။”