1 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ကာဝေ အုဝ်။ ခုဝ်၊ ဒူအီ မင် အီ၊ ဂေ ဟဲ့ ခုင်ခြး အုဝ်။ ဂေ ဘော ခါနှာပ် အုဝ် ဆေဆေ။

2 ဒွန် ဆီငဲ ဂေ ရန်ဆူ အုဝ် ဘော ဒူပ် အုဝ်။ ဂေ ကိူန် ဘော ပီခိုက် ဂေ၊ ကာဂုဝ်း ဒီ အုဝ်။

3 ဒေါ ယုဝ် အုဝ် တီ၊ အုဝ် ဘော ဘိုင် မဲ ဇဝ်ဖြာ။

4 အုဝ် ဘော ဘိုင် ဇဝ်ဖြာ ဘော အိူပ် ဂြုဝ်း အန် ဇဝ်၊ အာဝ် ဟူ မိုဝ်း ဒီ လုဝ် ယုဝ် မာဆေ။ ဒူအီ မိူဝ် တူ ပွိုန် ပါယ် မှဝ် ဒီ အုဝ်။

5 ဆေဆေ ဂေ ဘော ကာဘ့လျီ့ ဂြုဝ်း အုဝ် ဘော ခြာမ် ဒီ ဘူင် နာ တူ မွှိုမ် ဒီ အုဝ်။

6 ဂေ ဘော လာယ် ဆင်ချာင်၊ ဘ်ု ဒီ ယွတ်၊ တဲး ဂေ နပ် နာ ဟာဝ် အုဝ်၊ တဲး ဂေ ဘော ဘ်ု ဒီ ငဝ်း အာဆာက် အုဝ်။

7 ဒူအီ ဇိုဝ် တီ၊ မဲ ဇဝ်ဖြာ၊ ကွဲ့ တဲး ဂေ လွတ် ခမ် မှာပ် ဂေ။ တဲး မဲ ဇဝ်ဖြာ ရူ ဒီ ဂေ၊ ဝဲန် ရန်ဆူ အုဝ်၊ တဲး ဂေ စှိုမ် တူတ့်။

8 မဲ ဇဝ်၊ ကွဲ့ တဲး မဲ ပိဝ် ဒုက် အုဝ်။ ကွဲ့ တဲး မဲ ဇဝ် ပိဝ် ခဲ့ ကိူန် အိုမ် ငါယ် အုဝ်။ တဲး မဲ ဒဲမ် အုန် ခဲင် ဇာရာင် လွင် အိုမ် ငါယ် အုဝ် တီ။

9 ဒေါ ဆာခိုဝ် မှာန့် အုဝ် ဒီ မဲ ဇဝ်ဖြာ၊ ဂေ ရန်ဆူ အုဝ် ဒီ ဝီ ကာဘတ် ဝိဝ် နာ ပန်။ ပါယ် တီ၊ အုဝ် ဒီ ဘော နပ်၊ ဇဝ်ဖြာ ဟဲ့ ကွယ် ရိုမ် ဒူပ် အုဝ်။

10 အုဝ် ဘိုင် ဇဝ်ဖြာ ဘော အိူပ် ဂြုဝ်း အန် ဇဝ်။

11 အုဝ် ဘိုင် ဇဝ်ဖြာ၊ အုဝ် မိူဝ် တူ ယုဝ် မာဆေ။ ဒူအီ တူ ပွိုန် ပါယ် မှဝ် ဒီ အုဝ်။

12 အိုယ် မဲ ဇဝ်ဖြာ၊ ခဲ့ ပီ ဒွိုမ် ကာဆဲန့် အုဝ်၊ အုဝ် မိူဝ် ဒီ ဘူင်။ အုဝ် ဒီ လှူ ပီ ဒီ လှူ အီ ဒါင် ဂုင် ဂေဇူ ဒီ မဲ ဇဝ်ဖြာ။

13 ခုဝ်၊ မဲ ဇဝ်ဖြာ ဟဲ့ ချွတ် အုဝ်၊ ကွဲ့ တဲး အုဝ် ယမ်။ မဲ ဇဝ် မိူဝ် ဟဲ့ စွယ် အုဝ်၊ ကွဲ့ တဲး အုဝ် ကေး။ မဲ ဇဝ် ဟဲ့ ဝီ တဲး အုဝ် ပွိုန် ဒီ ကွယ် ရိုမ် ဒူပ် ဒူအီ အိမ်၊ တဲး အုဝ် ဝီ ကွယ် ဒူင် ဘ့လာင် အီ ဒွါ အာဆာက် ကာမာယ် ဒီ အီ၊ အီ မုး ဒူင် ကွယ် မဲ ဇဝ်။