1 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်။ အုဝ် မှာန့်၊ ကွဲ့ တဲး မဲ ဇဝ် ဝဲန် ဂြုဝ်း အုဝ် နီ။

2-3 အုဝ် မှာန့်၊ တဲး မဲ ဇဝ် ဘော ထူမ် ဘော ဝျီ့ ဂြုဝ်း အုဝ်။ ဆေ ဂေ ရန်ဆူ အုဝ် ကာဘျုဝ် အုဝ်၊ န့ ဘဲန် ဒုက် ဒီ နဝ်း အုဝ်၊ တဲး န့ ကာဟွာ့ ဆေဆေ။ ခုဝ်၊ ဂေ ဟဲ့ ရူ ကာဆဝ် ဒီ အုဝ် ဘော ဖျာက် အုဝ် ဆေဆေ။

4 နဝ်း အုဝ် ဘော ယုဝ် ကာဆဝ် ကော ဒီယေန့်။ န့ ပီ နဝ်း ဒူအီ အီ ဟဲ့ ရိန် ဒီ ယမ် ဟဲ့ တး ပ့လိုက် အုဝ်။

5 နဝ်း ယုဝ် ဘော နဝ်း ဒီယုး ဒီယေန့် ဟဲ့ ဟွတ့် ပ့လိုက် တူတ့် အုဝ်။ အုဝ် မိူဝ် တူ ပဲ ဒီ ရဲ ဒီ ဂွင့် အီ မွှိုမ် ယုဝ် အီ မွှိုမ် ကာဟိဝ် တီ။

6 အုဝ် ဘော တဝ်း၊ “အာလိုဝ်၊ ဆေ အုဝ် နပ် ဒီ မိုဝ်း ဖျီင် ပီ မာဘ့လူယ်၊ အုဝ် ဒီ ဘော ဘိုန့် ဟာဝ် ဒူင် ယေန် ဒါခိုယ်။

7 တဲး အုဝ် ပွိုန် ဒီ တဝ် ဟာဝ် ကွယ် ခဲင် ပြဲ ကာဟဝ်း၊ ဒူင် တူင့် ကာဆဝ်။

8 တဲး အုဝ် ပွိုန် ဒီ တဝ် ခြန် ခြန်၊ တဲး အုဝ် ဇမ် ဒူင် ဂတ် ဂျီတ်၊ တဲး န့ ပီ အုဝ် ဟဲ့ ပွုန် ခုန် တာင် ဂေ ဂ့လာယ် တာင်။”

9 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ပျာတ့် ဂေ၊ တဲး ဘော ဂြုဝ်း ဂေ လာယ် ကာယဝ်း လာယ် ဘ့လိူင်။ ခုဝ်၊ အုဝ် ဟဲ့ ယိုဝ် ပီ ဘူင် ဂေ ခဲင် မိူင်။ ဂေ ဘော လာယ် ကာဖာ့ လာယ် ကာလုတ့် ဆေဆေ။

10 ဒွင် ခိူန် ဒွင် ဝန် ဂေ ဘော လဲပ် ရဲင် မိူင်၊ ခြာမ် ဒီ ဘူင် နာ တူ မွှိုမ်။ ဘော ဂေ ဒူအီ ခဲင် မိူင် ဘူင် မီ နာ စီစိဝ် နာ တူ မွှိုမ်။

11 ဂေ ဒူအီ အီ မိူက် အီ ဟာယ် ကာဆဝ်၊ ဂေ ဘော ကွယ် ခဲင် မိူင်။ ဘော ဂေ အီ နပ် ဒီ ခါနှာပ် အီ ဟဝ် ဘော ဂေ အီ နပ် ဒီ ပီလွှက့် ဒီ အီ၊ ဂေ ကွယ် ခဲင် ကာလး။

12 န့ ယီ မုး အုဝ်။ ဆေ ရန်ဆူ အုဝ် နဲန အုဝ်၊ အုဝ် ဒီ ဘော ခမ် ဒီ ယိူန်။ ဆေ အီ ဟဝ် ဒီ ဘော ဇွင့် အုဝ်၊ အုဝ် ဒီ ဘော နပ် ဒီ ဝး ဂေ။

13 မာလဲ၊ န့ ဝီ မုး မဲ အီ မုး ဂိုက် အုဝ်၊ အီ ဒွိုမ် ကာလဝ့် ဒီ အုဝ်၊ အီ လာယ် ဒွိုမ် ဆီချာ ဒီ အုဝ်၊ မဲ ဟဲ့ ဝီ ဘူင် တဲး နဝ်း အုဝ် လိုဝ်။

14 အာယ် ဟဲ့ ဒွိုမ် လာယ် ကာမွုန်၊ ဟဲ့ အွန် ဒီ လာယ် ဆင်ချာင် ဆေဆေ။ အာယ် ဟဲ့ ဒွိုမ် ကာဒူပ် ဟာဝ် ဒီ ဟုဝ် ဇဝ်ဖြာ၊ ဟဲ့ ဟာဝ် ရိုမ် ဒူပ် ဂေ အီ ဟဝ်။

15 အုဝ် မှာန့်၊ တဲး ဂေ ယမ် ပါယ် ဖ့လပ် အူ ဇေန့်၊ တဲး ဂေ စုဝ်း ကာလုဝ့် ငါရာယ် ဘော အိမ်။ ခုဝ်၊ ဘော ခဲင် နဝ်း ဂေ၊ ဘော ခဲင် ကာင် ဂေ၊ ဂေ ဘော တဲး အီ တူ မွှိုမ် ကွယ် ဆေဆေ။

16 အီ မုး အုဝ်၊ အုဝ် ဒီ ဆာခိုဝ် မှာန့် မဲ ဇဝ်ဖြာ၊ တဲး မဲ ဇဝ် ချွတ် အုဝ်။

17 ဘော မုး ဘာ ဒီ အပ်၊ ဆိန့်ဝး၊ ကာတဲ ဆီငဲ၊ အုဝ် ဒီ ဘော ကာလာင် ဒီ ဇဝ်ဖြာ ဆေဆေ လွင် အီ ဒုက် ဒီ နဝ်း အုဝ်။ ဇဝ်ဖြာ ဒီ ဘော ယိုဝ် ပီ ဆာခိုဝ် အုဝ် တီ။

18 ဇဝ်ဖြာ ဒီ ဘော ချွတ် အုဝ်၊ တဲး အုဝ် လွတ် ဒီ ဂေ အီ ကာဂုဝ်း ဒီ အုဝ်။ ဂေ အီ ကာဘး ဒီ အုဝ်၊ ဂေ ဟဲ့ ကိူန် ကာဆဝ်။

19 ဇဝ်ဖြာ အီ ကွယ် ဆေဆေ အီ အိုပ် တူတ့် ဒွန် မျုဝ်၊ အန် အီ ဒီ ထူမ် ပီ ဆာခိုဝ် အုဝ်။ အန် ဒီ ဝီ တဲး ဂေ ကာဒုး ဒုက်။ န့ မုး ဂေ အီ တူ ကာပ့လု နဝ်း ဘော ဂေ အီ တူ ရုဝ်ဆေ ဇဝ်ဖြာ။

20 ဒူအီ အီ ဟဲ့ ဒွိုမ် ဘဲန် ဂိုက် အုဝ် တွိုန်၊ အန် ဟဲ့ ဝီ ကာလုတ့် ဒီ ဂေ ဂိုက် အန်။ အန် ဘော ပျာတ့် ဝဲန် ကာဒိက် ဆတ်ဇာ ပီ ဒွိုမ် ခမ် အန်။

21 မူတ့် အန် ဟဲ့ ငါမ်။ မာလဲ၊ နဝ်း အန် ယီ ဂုဝ့် နှဲန် န့ဝါတ့်။ ဂြုဝ်း ပီ တဝ်း အန် ဘော န့စမ်။ မာလဲ၊ န့ ပီ မာပွါ့ လာင် ဟဲ့ ဟွတ့် ထွတ် လေး၊ ဘ်ု ဒီ ဒဲပ်။

22 ဘေ ဒူအီ အီ ကာဒုး ဒုက်၊ တဲး ဘေ ဘိုင် ဇဝ်ဖြာ။ အန် ဇဝ် ဒီ ဘော စွယ် ဘေ။ ဂေ အီ မိုဝ်း နဝ်း ဆိူဝ်၊ ဇဝ်ဖြာ တူ တဲး ဂေ စှိုမ် ဒေါ မှဝ်။

23 မဲ ဇဝ်ဖြာ၊ မဲ ယီ ဝဲန် ဂေ အီ နဝ်း မိူက်၊ တဲး ဂေ ဇမ် ခဲင် ကာဒဝ် ဘာရေဝ်၊ တဲး ဂေ လိုဝ် စှိုမ် တူတ့်။ ဂေ အီ ဆီ ငဝ်း အီ ဟဝ် ဘော ဂေ အီ ကာလုဝ် ဆေဆေ၊ အာဆာက် ဂေ တူ ဒန် ကာတဲ၊ ဂေ ဒီ ဘော စှိုမ်။ အီ မုး အုဝ်၊ အုဝ် ဒီ ဘိုင် မဲ ဇဝ်ဖြာ။