ခါန် 54
ပီ ဆာခိုဝ် တဲး ဇဝ်ဖြာ ဂွင့် ရဲ ရန်ဆူ
အာဒါဝိတ် ဟဲ့ ဒဲမ် မှုဝ် အီ ဒူပ် မဲင် မာဆာခီ နီ ဒေါ မိုဝ်း ဒူအီ ဇီဖိမ် အီ ဟာဝ် ကာလာင် ဒီ အာဆောလူ တဝ်း၊ “အာဒါဝိတ် ကွယ် ဒူင် ကွယ် အေ နီ။” တဲး ဒါ အီ ယဲတ့် ဂေ အီ တဝ်း မှုဝ် နပ်၊ လုဝ် ဘး ဘော ဒိင်။
1 အိုယ် မဲ ဇဝ်ဖြာ၊ အုဝ် မှာန့်၊ တဲး ပွုန် မဲ ဇဝ် ချွတ် အုဝ်။ တဲး န့ လိုဝ်း ဆီချာ လွင် တူ မိုဝ်း အုဝ် မှာပ်။
2 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ် နီ။
3 ခုဝ်၊ ဂေ ဒူအီ အီ ပီခိုက် ပီဖုင် ဂေ၊ ဂေ ဟဲ့ တဝ်း ဒီ ကာဂုဝ်း ဒီ အုဝ်။ ဂေ ဒူအီ ဟာယ်၊ အီ တူ ရုဝ်ဆေ မဲ ဇဝ်၊ ဂေ ဘော ဟြေတ့် ဒီ ငဝ်း ယမ် အုဝ်။
4 အုဝ် ဟဲ့ နပ်၊ ဇဝ်ဖြာ အီ ဒီ စွယ် အုဝ်။ အန် ဇဝ် ဘော မုး အီ ဘ်ု အာဆာက် အုဝ်။
5 တဲး ဇဝ်ဖြာ ဘူင် ဝျီ့ နာ တူ မွှိုမ် ဒီ ဂေ ရန်ဆူ အုဝ်။ ကူပ် မိုဝ်း မဲ ဇဝ် နဝ်း ဆိူဝ်၊ တဲး မဲ ဇဝ် ပျာတ့် ဝဲန် ဂေ။
6 အုဝ် ဒီ လှူ ကိူန် ခဲ့ မိုဝ်း အုဝ် နဝ်း ဆီ လှူ ဒီ မဲ ဇဝ်ဖြာ။ အုဝ် ဒီ အိူပ် မဲ ဇဝ် ခုဝ်၊ န့ ဘဲန် နာ မွှိုမ် ဒီ အုဝ်။
7 ခုဝ်၊ မဲ ဇဝ်ဖြာ ဟဲ့ ဘူင် တဲး အုဝ် လေး ခဲင် ဒုက် ဒွန် မျုဝ်။ အုဝ် ဒီ ဘော ယိုဝ် ဒေါ စှိုမ် ရန်ဆူ အုဝ်။