ခါန် 52
လွင် ဇဝ်ဖြာ ဒမ် မှာပ် ဒီ ဒူအီ ဘော ကာဝေ ဂေ
အာဒါဝိတ် ဟဲ့ ဒဲမ် မှုဝ် နီ ဒေါ တး ဒူအီ မိူင် အေဒူမ် အီ စိူဝ် အာဒုဝ်က ကာလာင် ဒီ အာဆောလူ တဝ်း၊ “အာဒါဝိတ် ဟဲ့ ဟာဝ် ဇမ် ဒူင် ကွယ် အာဟီမာလေက်”။ မှုဝ် နီ ဒူပ် မဲင် မာဆာခီ။ တဲး ဒါ အီ ယဲတ့် ဂေ အီ တဝ်း မှုဝ် တိး။
1 အိုယ် ဘေ အီ မိုဝ်း ပွုန် တာင်၊ မှဝ် န့ ပါယ် ပီ အိူပ် ဘေ နာ တူ မွှိုမ် ပီ ဘူင် ဘေ ဒီ ဒူအီ အီ ဒူပ် ဇဝ်ဖြာ။ ဘေ ဘော ကာလာင် အီ တူ မွှိုမ် ဒွင် ဝန်၊ တူ ရုဝ်ဆေ ဇဝ်ဖြာ။
2 ဘေ ဒူအီ အီ ဆီမာ ကာလုဝ်၊ ဘေ နပ် ဒီ ကာလာင် ဂြုဝ်း အီ ပီ အာတိုမ် ဂါ့ ဂိန့်၊ အီ လမ် ကာဆဝ်။
3 ဘေ ဘော အိုင် နာ မိူက် လွှိုမ် အိုင် ဘေ နာ ဘွတ်။ ဘေ ဘော ကာလာင် ဂြုဝ်း ကာလုဝ် ကိူန် လွှိုမ် ဂြုဝ်း မှာန်။
4 အိုယ် ဘေ အီ ဆီမာ ကာလုဝ်၊ ဘေ ဘော အိုင် ဒီ ကာလာင် ဂြုဝ်း တဲး န့ ဆဝ် ဒီ နဝ်း အီ။
5 ဇဝ်ဖြာ ယီ ဒီ ဘူင် တဲး ဘေ ကာပျာတ့် လိုဝ် ဆေဆေ။ အန် ဇဝ် ဒီ ဘော ဒိုဝ်း လေး ဘေ ခဲင် ကာင် ဘေ၊ တဲး ဘေ ဝိဝ် ရဝ် မူင့် ဘေ။
6 ဂေ အီ မိုဝ်း နဝ်း ဆိူဝ် ဂေ ဟီ ယိုဝ်၊ ဂေ ဒီ ဘော ယုဝ် ကာဆဝ် ဘော ဝီ ကာညး ဘေ တဝ်း၊
7 “တဲး ဘေ ယွတ် ဂေ ဒူအီ အီ တူ ဘိုင် ဇဝ်ဖြာ၊ အီ နဝ်း တာင် ကူပ် ကိူန် ကြုဝ်ကြာမ် ဂေ၊ အီ တဝ်း ဒီ ဘိုင် ခြမ် ဂေ။”
8 အီ မုး အုဝ်၊ အုဝ် ပီ ဟေ နာမန် အီ အိမ် ဆေဆေ၊ အီ ကွယ် ခဲင် ဝဲင် ဟုဝ် ဇဝ်ဖြာ။ အုဝ် ဒီ ဘိုင် နဝ်း ရွက့် ကာဝေ ဇဝ်ဖြာ ဘော စုဝ် အုဝ်။
9 အုဝ် ဒီ ဒါင် ဂုင် ဂေဇူ ဒီ ဇဝ်ဖြာ ဘော စုဝ် အုဝ် ကူပ် ပဲ့ ဟဲ့ ဘူင် အန်။ အုဝ် ဒီ ကာလာင် ဒီ ဂေ အီ ညှိုမ် ဘိုင် ဇဝ်ဖြာ လွင် ပီ ဘူင် မဲ ဇဝ် ဟဲ့ ဘွတ် ဟဲ့ မွှိုမ်။