1 အုဝ် မှာန့်၊ တဲး မဲ ဇဝ်ဖြာ ကာဝေ အုဝ်၊ ကူပ် မိုဝ်း မဲ နဝ်း ရွက့် ဆေဆေ။ အုဝ် မှာန့်၊ တဲး မဲ ဇဝ် ဂဝ်း ဝဲန် မှာပ် အုဝ် ကူပ် ဟဲ့ တာင် ကာဆဝ် ဂေဇူ မဲ။

2 အုဝ် မှာန့်၊ တဲး မဲ ဇဝ် ဂဝ်း ဝဲန် တူတ့် မှာပ် အုဝ် ဒွန် မျုဝ်၊ တဲး န့ ပီ မဲ ဇဝ် ဘာယ် ဝဲန် အီ ကာဒါတ့်၊ တဲး အုဝ် ဝီ ဆီငါ။

3 အုဝ် ဟဲ့ နပ်၊ အုဝ် ဟဲ့ ကာလိုပ်။ ခုဝ်၊ အုဝ် လှုဝ်း မှာပ် အုဝ် တီ ဆေဆေ။

4 အုဝ် ဟဲ့ ဟွတ့် လုတ့် မဲ ဇဝ်ဖြာ။ အုဝ် ဟဲ့ လုတ့် မီ မဲ ဇဝ်ဖြာ။ အုဝ် ဟဲ့ ဘူင် အီ ဟာယ် ကာဆဝ် ပီ တူ အိုင် မဲ။ ခုဝ် အန် တီ ဆေ မဲ ဇဝ် ဒမ် မှာပ် ဒီ အုဝ်၊ မဲ ဘူင် အီ မှာန် အီ မုး။

5 ဆိန့် အာတ့် ဂွိုတ် အုဝ်၊ အုဝ် ဟဲ့ မိုဝ်း မှာပ်။ ဆိန့် ဒဲ မာ အုဝ် ဘာဒိက် ဆန်ထေ ဒီ အုဝ်၊ အုဝ် ဟဲ့ ဟွတ့် မိုဝ်း မှာပ်။

6 မဲ ဇဝ် ဘော အိုင် ဆေ အီ ကာလာင် ဂြုဝ်း ဆိူဝ်၊ ဂြုဝ်း မှာန် အီ လေး ခဲင် နဝ်း။ ခုဝ်၊ အုဝ် မှာန့် မဲ ဇဝ်၊ တဲး မဲ ဒွါ အာငျာန် ဘွတ် ဒီ အုဝ်။

7 အုဝ် မှာန့်၊ တဲး မဲ ဇဝ် ဘာယ် ဝဲန် မှာပ် အုဝ်၊ တဲး န့ လုယ် ဆီငါ၊ တဲး န့ ပီ မဲ ဇဝ် ဟဲ့ ဘာယ် ဒုဝ် အုဝ် တာ ဒဝ် ဟူဆူပ်။ တဲး နဝ်း အုဝ် လုယ် ပီ ဘျြီ။

8 ဒေါ တီ နီ၊ နဝ်း အုဝ် ဟဲ့ ဆဝ်၊ ပီ ကာအာင် အုဝ် ဟဲ့ ကာလာတ့်။ အုဝ် မှာန့်၊ တဲး အုဝ် ဝီ ပွိုန် ဒီ ထူမ် ဂြုဝ်း မဲ အီ ဘျုဝ် ဒါခိုယ်။ တဲး န့ တဲး အုဝ် ဝီ ပ့လူမ် ခ ဒါခိုယ်။

9 အုဝ် မှာန့်၊ ကွဲ့ တဲး မဲ ဇဝ် နုဝ် မှာပ် ပဲ့ ဟဲ့ ဘူင် အုဝ်။ တဲး န့ ပီ မဲ ဘျတ် ဝဲန် တူတ့် ပဲ့ ဟဲ့ ဒဲမ် အုန် လွင် မှာပ် အုဝ်။

10 အုဝ် မှာန့်၊ တဲး မဲ ဇဝ် တဲး အုဝ် ဝီ မိုဝ်း နဝ်း လုယ်၊ တဲး မဲ ဇဝ် ဒွါ နဝ်း ကာမာယ် ဒီ အုဝ်၊ အီ နပ် ဒီ ဘူင် နာ မှာန်။

11 အုဝ် မှာန့်၊ ကွဲ့ တဲး မဲ ညွန် လေး အုဝ် ဒူင် ကွယ် မဲ။ အုဝ် ဘော မှာန့်၊ ကွဲ့ တဲး နဝ်း ဖွိုမ် မဲ ဇဝ်၊ လေး ခဲင် နဝ်း အုဝ်။

12 တဲး မဲ ဇဝ် ဝီ တဲး နဝ်း အုဝ် ဒါခိုယ် ကူပ် ဟဲ့ ချွတ် မဲ ဒီ အုဝ်။ တဲး အုဝ် မိုဝ်း နဝ်း ဆီ ထူမ် မဲ ဇဝ်။

13 မဲ ဇဝ် ဟီ စွယ် အုဝ် ပါယ် တီ၊ အုဝ် ဒီ ဝီ ကာလာင် တဲး ဂေ ဒူအီ ဟာယ် နပ် လွင် ဒါရာ မဲ၊ တဲး ဂေ အီ မိုဝ်း မှာပ် ဝီ လှုဝ်း မှာပ် ဂေ ဘော မှာန့် တဲး မဲ ဇဝ် ဂဝ်း ဝဲန်။

14 မဲ ဇဝ်၊ မဲ မုး ဇဝ်ဖြာ အီ ချွတ် အုဝ်။ အုဝ် မှာန့်၊ ကွဲ့ တဲး အုဝ် လုဝ် ခမ် မှာပ် ပဲ့ ဟဲ့ ငဝ်း ယမ် အုဝ် အီ ဟဝ်။ ပန် တီ အုဝ် ဒီ ဝီ တဝ်း မှုဝ် လွင် ဘူင် မဲ ဇဝ် နာ မုး နာ မှာန်။

15 အိုယ် မဲ ဇဝ်ဖြာ၊ အုဝ် မှာန့်၊ ကွဲ့ တဲး အုဝ် ကွယ် နှိမ် တူ ဂြုဝ်း။ တဲး အုဝ် အိူပ် မဲ ဇဝ်ဖြာ ဆေဆေ။

16 ဆေ အုဝ် ဘော ဆီ လှူ မျုဝ် အီ ဒုဝ့် ဒီ ငဝ်၊ မဲ ဇဝ် တူ အိုင် တူ လုဝ် ဇိုဝ် တီ။

17 ဆေ အုဝ် ယီ မိုဝ်း နဝ်း က့လိုဝ် ကူပ် ကိူန် မှာပ် အုဝ်၊ န့ ဘဲန် ပီ ဒီ လှူ အီ လဝ့် နဝ်း မဲ။ ဆေ အုဝ် မိုဝ်း နဝ်း တျီမ်၊ တူ ပိဝ် မှာပ် အုဝ်၊ မဲ ဇဝ်ဖြာ တူ ဝဲန် အုဝ်။

18 အုဝ် မှာန့်၊ တဲး မဲ ဇဝ် ကာဝေ နွန် ဇီအူန်၊ တဲး မဲ ဇဝ် စွယ် ဂေ အီ ကွယ် ဒီ တီ။ တဲး မဲ ဇဝ် ဝီ မ့ပြာယ် ရဲင် မိူင် ယေရူဆာလဲမ်၊ တဲး န့ ဝီ ဆီချာ။

19 ဟဲ့ ဟွတ့်၊ မဲ ဒီ ဘော ဒါခိုယ် ဆေ ယေ လှူ ပီ လှူ အီ မုး အီ မှာန်။ ဘော ပီ လှူ အီ ဒုဝ့် ဒီ ငဝ်၊ ဘော မက် အာလူင့် ဘော ဒုဝ်၊ ယေ ဒီ လှူ ဒီ ကာစှူင့် လှူ ဒီ မဲ။