1 ဇဝ်ဖြာ ဟဲ့ တာင် လွှိုမ် တူတ့်။ ဂေ ဒူအီ ဘောကာဂ့လျီတ် အီ ကွယ် ဒဲင် ကာဒါယ်၊ တဲး ဂေ ထူမ် ဂြုဝ်း အန်။ ဂေ အီ ကွယ် ဒွန် နာ ဒွန် ပ့လုဝ့်၊ စုး ဒူင် လေး ဆီငဲ ကော ဇမ် ဒူင် ဂေတ့် ဆီငဲ၊ တဲး ဂေ ဘောကာဂ့လျီတ် ထူမ်။

2 ဇဝ်ဖြာ ဘော တဲး အာရူင် ဘ့လာင် အန် လေး ဒီ နွန် ဇီအူန်၊ အီ စှိတ် ကာဆဝ်။

3 ဆေ ဇဝ်ဖြာ ပီ ကြိုပ် အေ ဟီ တး၊ အန် ဇဝ် တူ တး ပီယေန့်။ န့ ဘော မိုဝ်း ငဝ် ကုး နာ အာတ့် အန် ဇဝ်။ ဘော ခုန် ဘော ဂ့လာယ် ကွယ် ရူပ် အန်။

4 ပန် ဒီ ဆုင်ဖျာတ် အန် ဇဝ် အာမူ ဒူအီ ပီ အိုပ် အန်၊ အန် ဇဝ် ဒီ ဘော ဒဲ့ ဘော အီ ကွယ် ခဲင် ဂါင်ဟြာဝ် ဘော အီ ကွယ် ဒဲင် ကာဒါယ် တဝ်း၊

5 “ဘေ ဒူအီ အီ ဒူပ် ဆီချာ အုဝ်၊ အီ ကာဆဲန့် ဒေါ လှူ ဘေ ဒုဝ် ဆတ်ဒါဝါ၊ တဲး ဘေ တး ကာဇု တူတ့် ဒူင် ကွယ် အုဝ်။”

6 ဂါင်ဟြာဝ် ဒီ ဘော ကာလာင်၊ အန် ဇဝ် ဟဲ့ ဘူင် နာ မုး နာ မှာန် ကူပ် ဟဲ့ ဆုင်ဖျာတ် အန် ဒူပ် ဒါရာ။

7 အန် ဇဝ် တဝ်း၊ “အိုယ် ဘေ ဒူအီ ပီ အိုပ် အုဝ်၊ တဲး ဘေ ထူမ် ပီ ကာလာင် အုဝ်။ အိုယ် ဘေ ဒူအီ အီဆာရေလ၊ အုဝ် ဒီ ဘဲန် ဆက်ဆေ အီ ကာဘး ဒီ ဘေ။ အုဝ် ဘော မုး ဇဝ်ဖြာ ပီ ကြိုပ် ဘေ။

8 အုဝ် မိူဝ် တူ ဒမ် မှာပ် ဘေ ကူပ် ပီ လှူ ဘေ ဒီ အုဝ်။ ပီ လှူ ဘေ အီ ဒုဝ့် ဒီ ငဝ် အုဝ် လှုဝ်း ဆေဆေ။

9 အုဝ် ယီ တူ လုဝ် မာမက် ဂေ မာပဲ အာလူင့် ပီ လှူ ဘေ။

10 ခုဝ်၊ ဒုဝ် ဆတ်ဒါဝါ အီ ကွယ် ခဲင် ပြဲ ဘော ဒုဝ် ပီ ဟျီင် ဘေ အီ ကွယ် ဒူပ် နွန်၊ န့ ဟဲ့ ကိူန် ဘဲန် ဟြဲန့် ဘဲန် ဟြဲန့်၊ န့ ယီ မုး တူတ့် ကြုဝ် အုဝ်။

11 အုဝ် ဘော နပ် တူတ့် ခဲ့ ကိူန် မာဆိမ် အီ ကွယ် ဒူပ် နွန် ဘော ဒုဝ် ဆတ်ဒါဝါ ဒွန် မျုဝ် အီ ကွယ် ခဲင် ဒူင် နာ၊ န့ မုး တူတ့် ကြုဝ် အုဝ်။

12 ဆေ အုဝ် ဘော ကာပြာန့် ပီ ဒီ ဟူမ်၊ အုဝ် တူ ကာလာင် ဒီ ဘေ။ ခုဝ်၊ ခဲ့ ဘော မိုဝ်း အီ ကွယ် ဒဲင် ကာဒါယ် ဒွန် မျုဝ် ဘော မုး တူတ့် ကြုဝ် အုဝ်။

13 အုဝ် တူ ဟူမ် ယင် မက်။ အုဝ် မိူဝ် တူ ဒျီင် နှာမ် မာပဲ။

14 ဆေ ဘေ လှူ၊ တဲး ဘေ ဒါင် ဂုင် ဂေဇူ ဒီ ဇဝ်ဖြာ၊ တဲး န့ ဒူပ် ခဲ့ ပီ ဒွိုမ် ကာဆဲန့် ဘေ၊ တဲး န့ မှာန် ခဲ့ ပီ ဒွိုမ် ကာလာင် ဘေ ဒီ အန် ဇဝ် အီ အိုပ် တူတ့် ဒွန် မျုဝ်။

15 ဒေါ ဇမ် ဘေ ဒုက် တာင်၊ တဲး ဘေ ဒဲ့ အုဝ်။ အုဝ် ဒီ ချွတ် ဘေ၊ တဲး ဘေ ဝီ ပွိုန် ဒီ အိူပ် အာဖုင် ဒင်ခုဝ် တာင် အုဝ်။”

16 ဇဝ်ဖြာ ယီ တဝ်း ဒီ ဂေ ဒူအီ ဟာယ်၊ “အုဝ် တူ လုဝ် ဘေ နုဝ် ဂြုဝ်း အုဝ်၊ ဝီ ကာလာင် ဒီ အီ ဟဝ်။ အုဝ် တူ လုဝ် ဘေ ခဲ ဒါရာ အုဝ် ဆေဆေ။

17 ခုဝ်၊ ဘေ ဇွင့် ဂြုဝ်း ပီ မာနုဝ် အုဝ်၊ ဘေ တူ ဒိုဝ်း ဒီ ထူမ် ဂြုဝ်း အုဝ်။

18 ဆေ ဘေ ယိုဝ် ဒါ ဇူန်၊ ဘေ ဘော ဘဲန် ဂိုက် အန်။ ဘေ ဒူပ် ဂေ ဒူအီ လုတ့် ရဝ်။

19 ဘေ အွန် ဒီ ကာလာင် ဂြုဝ်း တူ မွှိုမ်။ ဘေ ဘော ခြန် ဒီ ကာလာင် ဂြုဝ်း ကာလုဝ်။

20 ဘေ ကွယ် ကာယွင့် ဘီနွင် ဘေ။ ဘေ ဘော ခဲ စာဝ် လွင် ဂွန် အာရာင် မာ ဘေ။

21 ဘေ ပီ ဘော ဘူင် ပါယ် တီ၊ အုဝ် တူ တဝ်း မာဆေ။ ခုဝ်၊ ဘေ ထာင် အုဝ် ဟဲ့ ပီ ဘေ။ အုဝ် ယီ ဒီ ဝီ ကာလာင် မှာပ် ဘေ၊ တဲး ဘေ နပ် ဆီချာ။

22 အိုယ် ဘေ ဒူအီ အီ ပိဝ် ဇဝ်ဖြာ၊ တဲး ဘေ လှုဝ်း လွင် အန် တီ။ ဆေ ဘေ တူ ထူမ်၊ အုဝ် ဒီ ဘော ဝဲန် ဘေ တဲး ဘေ စှိုမ်။ ယီ တူ မိုဝ်း အာဆေ အီ ဒီ ချွတ် ဘေ။

23 န့ ယီ မုး ဂေ အီ ရုဝ်ဆေ အုဝ်၊ ဂေ ဒီ ဘော ဒါင် ဂုင် ဂေဇူ ဒီ အုဝ်၊ တဲး န့ ပီ ဂေ လှူ ဒီ အုဝ်။ ဂေ အီ နပ် ဒီ ဂျုဝ်ဂျာ ဒီ ဘူင် နာ မှာန် ဆေဆေ၊ အုဝ် ဇဝ်ဖြာ ဒီ စွယ် ဒီ ချွတ် ဂေ။”