1 အိုယ် ဘေ ဒူအီ ဒွန် မျုဝ်၊ တဲး ဘေ ယိုဝ်။ ဘေ ဒူအီ ဒဲင် ကာဒါယ်၊ တဲး ဘေ ထူမ်။

2 ဘေ ဒူအီ အီ ကွယ် ဒဲင် ကာဒါယ် ဘောကာဂ့လျီတ်၊ ဘော အီ တျီ့ အီ တာင်၊ ဘော ဒူအီ ခြမ် ဒူအီ ဂိန်၊ တဲး ဘေ ကာဖြူမ် ဒီ ထူမ်။

3 အုဝ် ဒီ ကာလာင် ဂြုဝ်း အီ မိုဝ်း အာငျာန်။ အာကျာမ် အာငျာန် ခဲင် နဝ်း အုဝ်၊ န့ တဲး အုဝ် နပ် အာရေ ဘဲန် မျုဝ် ဘဲန် မျုဝ်။

4 အုဝ် ဒီ ထူမ် ဂြုဝ်း မာကာထ ဘော ဘး ဒိင်၊ ကာလာင် ပီ ပါယ် ဆီဖဝ် အန် တီ။

5 အုဝ် တူ လုဝ် ယုဝ် မာဆေ ဒေါ ဇမ် အုဝ် ဒုက် တာင်၊ ဘော ဒေါ မိုဝ်း ရန်ဆူ အီ ကွယ် ရူပ် အုဝ် ဒွန် ဘ့လာက်။

6 ဂေ မုး ဒူအီ အီ ဘိုင် ကြုဝ်ကြာမ် ဂေ၊ ဂေ ဘော ပီဖုင် ဂေ ကူပ် ကိူန် ကြုဝ်ကြာမ် ဂေ။

7 န့ ယီ တူ မိုဝ်း အာဆေ အီ ပွိုန် ထုတ် လေး ဒုဝ် ဘြိမ် အန်၊ အီ ပွိုန် စိုဝ်း အာဆာက် အန် ဒီ ဇဝ်ဖြာ။

8 ခုဝ်၊ ငဝ်း ပီ လုဝ် အန် ထုတ် လေး အာဆာက် အန် တီ၊ န့ ဟဲ့ ငဝ်း ကာဆဝ်။ ဘော ကိူန် ခဲ့ မှဝ်၊ န့ တူ နပ် ဒီ ဂြုဝ်။

9 အာဝ် မိုဝ်း အီ ပွိုန် စိုဝ်း အာဆာက်၊ တဲး အန် အိမ် ဆေဆေ၊ ကွဲ့ တဲး အန် လုဝ် ဟာဝ် ကွယ် ခဲင် ဘာရေဝ်။

10 ဒွန် အီ နပ်၊ ဘော ဂေ အီ မိုဝ်း အာငျာန် ဘော ဂေ ဒူအီ ရိုဝ်၊ ဂေ ဒီ ဘော ယမ်။ ဂေ ဘော ကာဒုး ဒီ ဝဲန် ကြုဝ်ကြာမ် ဂေ၊ တဲး အီ ဟဝ် ဒိုဝ်း။

11 ဂေ ဘော တဲး မိူင် ဂေ မိုဝ်း စိူဝ် အီ ပီ စိူဝ် ဂေ။ ဂေ ယီ လုဝ် ကွယ် ခဲင် ဘာရေဝ်၊ တဲး န့ ဝီ ဘဲန် ကာင် ဒူင် ကွယ် ဂေ ဆေဆေ။ တဲး ဂေ ဘော ကွယ် ဒီ တီ ဘဲန် ဇာတ် ဘဲန် ဇာတ်။

12 ဒူအီ ခြမ် ပီ ဘော မိုဝ်း ပွုန် ခဲ့ မှဝ်၊ န့ တူ ပွိုန် ချွတ် ဂေ၊ တဲး ဂေ လွတ် ယမ်။ ဂေ ဘော လုဝ် ယမ် ပီ ဒုဝ် ဆတ်ဒါဝါ။

13 ဂေ ဒူအီ ရိုဝ် ညှိုမ် ကာလိုပ်။ ဂေ ဒီ ကာဒုး ဒီ ခမ် ပါယ် နီ။

14 ဂေ ဒီ ယမ် ပီ မာဘူ။ ဂေ ဒီ ကွယ် တူတ့် ခဲင် မိူင် မာရာန။ တဲး ဇဝ် မာရာန အိုပ် ဂေ။ ဂေ ဒီ ဘော ဟာဝ် ဆိူဝ် ခဲင် ကာဒဝ် ဘာရေဝ်။ ဒုဝ် ဘူင့် ဂေ ဒီ ဘော လာတ့် ဟြာယ် တူတ့်။ မိူင် မာရာန ဒီ ဘဲန် ဒူင် ကွယ် ဂေ။

15 ဇဝ်ဖြာ ယီ ထုတ် လေး အုဝ်၊ ကွဲ့ တဲး ဇဝ် မာရာန ပွိုန် ဒီ အိုပ် အုဝ်။ န့ မုး ဇဝ်ဖြာ အီ ဘ်ု ဒီ ရွုး အုဝ်။

16 ဆေ န့ ဘော မိုဝ်း ဒူအီ မင် အီ၊ အီ ဟဲ့ ပွိုန် ကြုဝ်ကြာမ် ကိူန်၊ အီ ဟဲ့ ပွိုန် အာဖုင်၊ ဟဲ့ ပွိုန် ဆာရေ ဘော ဟဲ့ ခြမ် ကာဆဝ်၊ ကွဲ့ တဲး မဲ လှယ့် ဂေ။

17 ခုဝ်၊ ဆေ ဂေ ယမ်၊ ဂေ တူ ပွိုန် ဒိုဝ်း ဟာဝ် ကြုဝ်ကြာမ် ဂေ တီ။ ဘော အာဖုင် ဆာရေ ဂေ၊ ဂေ တူ ပွိုန် ဒိုဝ်း ဟာဝ် ဒူပ် ဂေ။

18 ဆေ န့ မိုဝ်း ဒူအီ အူ ဝီ၊ အန် ပီ ဘော ဘူင် တဲး န့ လဝ့် နဝ်း အန်၊ အီ ဟဝ် ပီ ဘော အိူပ် အန် ကူပ် လွှက့် အန်၊

19 မာလဲ၊ ဘော အန် ဒီ ဘော ယမ်၊ ဘော ဟာဝ် ဒူပ် ဒါ ဒါ အန်၊ အီ တူ ပွိုန် ယိုဝ် ဘ့လာင် ဒေါ မှဝ်။

20 ဒူအီ ဇိုဝ် တီ၊ အန် တူ ပွိုန် ကွယ် ဆေဆေ။ အန် ဒီ ဘော ယမ် ပီ ဒုဝ် ဆတ်ဒါဝါ။