1-2 ဇဝ်ဖြာ ဟဲ့ တာင် ကာဆဝ်။ ဟဲ့ ကာအာပ် အေ အိူပ် အန် ကိူန် ကိူန်။ အန် ကွယ် ခဲင် မိူင် ဒူင် ကြိုပ် အေ ဒီ အန်။ မိူင် တီ၊ ကွယ် ဒဲင် နွန် ဇဝ်ဖြာ အီ မုး နွန် ဇီအူန်၊ အီ ဘွတ်၊ အီ စာ၊ အီ စှိတ် ကာဆဝ်။ န့ ဘော မုး ဒူင် ကွယ် ခုန်ဒီခမ် တာင်။ ဒူအီ ဘော ကာဒါယ် ဟီ ယိုဝ် ဘော ဘဲန် နဝ်း ဒါခိုယ်။

3 ဇဝ်ဖြာ ဟဲ့ တဲး အေ နပ်၊ ခဲင် မိူင် ဟဲ့ ပွိုန် ကွယ် ဆီချာ၊ အာဝ် မိုဝ်း ပီ ဒီ လုဝ် ယုဝ်။

4 ခုဝ်၊ ခုန်ဒီခမ် ဘဲန် ကာဒင် ဘဲန် ကာဒင်၊ ဂေ ဟဲ့ လာယ် ဖြူမ် ဒီ တး ကာဇု၊ တဲး ဂေ ကာဂုဝ်း ဒီ နွန် ဇီအူန် တီ။

5 ဂေ ဟဲ့ ဟွတ့် ယိုဝ်၊ ဂေ ဘော အာမ် ကာဆဝ် ဝီ ကာစွာ ဝီ တဝ် အူ ဇေန့်။

6 ပီ ပါယ် ဂေ ဒီ ယုဝ်၊ ပီ ပါယ် ဂေ ဒီ ဒုက် ကာဆဝ် ဒီ နဝ်း ဂေ ကော ပီ အီဘိုန့် အီ ဟဲ့ ကာတတ် ဒီ ဂွန်။

7 န့ ဘော ပီ ဇဝ်ဖြာ ဟဲ့ ဘူင် တဲး ခုန် တး နာ လေး ဆီငဲ ဘုတ် ကာပျာတ့် ရိုဝ် ဆင်ဖုဝ် ဒီ မိူင် ထာဆိတ်။

8 ခဲ့ ပီ ဒွိုမ် ခဲ အီ တဲး အေ ထူမ်၊ အေ ပီ ဝီ ယိုဝ် တူတ့် ပါယ် တီ ခဲင် မိူင် ပီ အိုပ် မဲ ဇဝ်ဖြာ အီ အိုပ် တူတ့် ဒွန် မျုဝ်။ မိူင် တီ၊ မဲ ဇဝ် အီ မိုဝ်း ပွုန် တာင်၊ မဲ ဘော တဲး န့ ကွယ် ဆေဆေ။

9 အိုယ် ဇဝ်ဖြာ၊ ဒေါ ကွယ် ယေ ခဲင် ဟုဝ် မဲ ဇဝ်၊ ယေ ဘော ဇေန့်ဇာ လွင် ရွက့် ကာဝေ မဲ ယေ ဆေဆေ။

10 ခဲ့ နပ် ဂေ ဒူအီ လွင် မဲ ဇဝ်ဖြာ၊ ဂေ ဘော အိူပ် မဲ ခဲ့ တီ။ ဒဲင် ကာဒါယ် ဒွန် နာ ဒွန် ပ့လုဝ့် ဂေ အိူပ် မဲ။ မဲ ဇဝ်ဖြာ ဆုင်ဖျာတ် နာ မှာန် ဆေဆေ။

11 တဲး ဂေ အီ ကွယ် ဒီ နွန် ဇီအူန် ဘော ခူယ်။ ဂေ ဒူအီ ခဲင် အိူင် ယူဒါ၊ တဲး ဂေ ဒါခိုယ် ကူပ် ဟဲ့ မှာန် ဟဲ့ မုး ပီ ဆုင်ဖျာတ် မဲ ဇဝ်ဖြာ။

12 တဲး အေ ကာဖြူမ် ဒီ ဟာဝ် လဲပ် နွန် ဇီအူန်၊ တဲး အေ တိး ခဲ့ ကွယ် ကာစှူင့် ဘ်ု ဂေ။

13 တဲး အေ နုဝ် ဆီချာ ပီ ပါယ် ရဲင် မိူင်၊ တဲး အေ ဟာဝ် ယွတ် ခဲ့ ကွယ် ဒူင် ဒီ ပွိုန် ချြီင်။ တဲး အေ ပွိုန် ဒီ ဝီ ကာလာင် လွင် အန် တီ ဒီ လှုက်လှာန် အေ ဘဲန် ဇာတ် ဘဲန် ဇာတ်။

14 တဲး အေ ကာလာင် ဒီ ဂေ လွင် ဇဝ်ဖြာ နီ၊ အီ မုး ဇဝ်ဖြာ အီ ကွယ် ဆေဆေ။ အန် ဇဝ် ဘော မုး အီ ယဲတ့် အေ ဒွန် စုဝ် ဒွန် ဘာန်။