1 အိုယ် ဘေ ဒူအီ၊ တဲး ဘေ ကာဖြူမ် ဒီ ကာထ ဒဲ ဘေ၊ တဲး ဘေ ဒါခိုယ်၊ အိူပ် ဇဝ်ဖြာ၊ တဝ်း မှုဝ် တာင်။

2 ခုဝ်၊ ဇဝ်ဖြာ ဟဲ့ အိုပ် တူတ့် ဒွန် မျုဝ်၊ ဟဲ့ မွှိုမ် ရုဝ်ဆေ။ အန် မုး ခုန်ဒီခမ် အီ အိုပ် တူတ့် ဒဲင် ကာဒါယ် နီ။

3 အန် ဇဝ် ဘော တဲး အေ အိုပ် ဒူအီ။ ဒူအီ မျုဝ် ဟဝ် ဘော လုဝ် ဂူမ် အေ။

4 အန် ဇဝ် ဟဲ့ ရဝ်း မိူင် ဒူင် ကွယ် အေ၊ တဲး န့ ဘဲန် ခါဂုန် ပီ ဒွါ အန် ဒီ အေ။ န့ တဲး အေ မိုဝ်း နဝ်း ကြွိုမ်၊ နဝ်း တာင် ကူပ် မုး အေ ဒူအီ ပီ ရွက့် အန် ဇဝ်။

5 ဇဝ်ဖြာ ဟဲ့ ဟာဝ် ဒူင် ကွယ် အန် ဒေါ မိုဝ်း ဘော မှုဝ် ဒါခိုယ်၊ ဒေါ မိုဝ်း ဘော ဟမ် နိုင် ပဲ။

6 တဲး ဘေ တဝ်း မှုဝ်၊ တဲး န့ မုး မှုဝ် အီ အိူပ် ဇဝ်ဖြာ။ တဲး ဘေ တဝ်း ဘော မှုဝ် ဒါခိုယ်၊ တဲး န့ မုး မှုဝ် အီ အိူပ် အန် ဇဝ် အီ မုး ခုန်ဒီခမ် အီ အိုပ် အေ။

7 ခုဝ်၊ ဇဝ်ဖြာ မုး ခုန်ဒီခမ် အီ အိုပ် တူတ့် ဒဲင် ကာဒါယ် နီ။ န့ ကာအာပ် အေ တဝ်း မှုဝ်၊ အိူပ် မီ အန်။

8 ဇဝ်ဖြာ မုး အီ အိုပ် တူတ့် ဒူအီ။ န့ ပီ အန် ကွယ် ဒဲင် မာလာင် အန် အီ ဘွတ် ကာဆဝ်။

9 ခဲ့ ကွယ် ဂေ ဒါ ကာညာ အီ အိုပ် ဒူအီ ဒွန် မျုဝ်၊ ဂေ ဒီ လုဝ် တး ကာဇု တူတ့် ဒီ ဒူအီ အီ ညှိုမ် ဇဝ်ဖြာ၊ အီ မုး ဇဝ်ဖြာ ပီ ကြိုပ် ဒါ အာဘြာဟမ် တွိုန်။ ခြိုင် ကာဂုဝ်း ပီ တာ ဒူအီ ဒဲင် ကာဒါယ် ဘော မုး တူတ့် ကြုဝ် ဇဝ်ဖြာ။ ခုဝ်၊ ဟဲ့ ကာအာပ် အေ အိူပ် ပွုန် အန် ဇဝ်။