1 ဇဝ်ဖြာ ဘော မုး ဒူင် ဘိုင် အေ။ အန် ဇဝ် ဘော တဲး ပ့လူမ် ဒီ နဝ်း အေ။ ဒေါ ဇမ် အေ ဒုက်၊ အန် ဇဝ် ဘော ဖြူမ် ဒီ စွယ် အေ ဆေဆေ။

2 ခုဝ်၊ အေ တူ ယုဝ်။ ကာဒါယ် ပီ ဘော ဒီယေန့်၊ နွန် ဒွန် ပ့လုဝ့် ပီ ဘော ဒီဂ့လဝ်း ဒီခြွန် တူတ့် ခဲင် အိုမ် နမ်မုက်ဆာရာ၊

3 ဘော အိုမ် နမ်မုက်ဆာရာ ပီ ဘော ကာတုန် ဘော ဟမ် ဒီငိုန့်၊ နွန် ဘောကာဂ့လျီတ် ပီ ဘော ဒီယုး ဒီယေန့် ကူပ် ဟဲ့ ဟုဝ့် အိုမ်၊ အေ ယီ တူ လုဝ် ယုဝ် မာဆေ။

4 န့ မိုဝ်း ဘ့လဲင် အိုမ် အူ ဘ့လဲင်၊ အန် တဲး န့ ဒါခိုယ် ခဲင် မိူင် ပီ အိုပ် ဇဝ်ဖြာ၊ အီ မုး မိူင် ဘွတ် မိူင် ဒါခိုယ်၊ အီ မုး ဒူင် ကွယ် အန် ဇဝ် အီ အိုပ် တူတ့် ဒွန် မျုဝ်။

5 ဇဝ်ဖြာ ဘော အိုပ် မိူင် တီ။ မိူင် တီ တူ နပ် ဒီ လိုဝ် ဒေါ မှဝ်။ ဇဝ်ဖြာ ဘော စွယ် အန် ဆိန့် ဆိန့်ဝး။

6 အာမျုဝ် ဒူအီ ဘော ကာဝှ်ု ကာဝျှီန် ဒီ ယုဝ်။ ခဲင် မာန် မိူင် ဒွန် ပ့လုဝ့် ဂေ ဘော ဒီယုး ဒီယေန့်။ အန် ဇဝ် ဘော ကာလာင် ဂြုဝ်း အီ ပီ ဟမ် ကာနမ်၊ ကာဒါယ် ဘော လာတ့် ဇွိုမ် တူတ့်။

7 ဇဝ်ဖြာ အီ အိုပ် တူတ့် ဒွန် မျုဝ်၊ အီ မုး ဇဝ်ဖြာ ပီ ကြိုပ် အာကူပ်၊ အန် ဘော မုး အန် ဇဝ် ဒူင် ဘိုင် အေ။

8 တဲး အေ ယွတ် လွင် ပဲ့ ဟဲ့ ဘူင် ဇဝ်ဖြာ ဒဲင် ကာဒါယ် နီ။ တဲး အေ ယွတ် အီ မွှိုမ် အာမ် ကာဆဝ် ဒဲင် ကာဒါယ် နီ။

9 အန် ဇဝ် ဟူ တဲး ဒါ ဆိုက် ကာဂုဝ်း ဒွန် ပ့လုဝ့် ဒဲင် ကာဒါယ် နီ။ အန် ဇဝ် ဟဲ့ ကာဘက် ဝဲန် ဘော အ ဂေ၊ ဟဲ့ ကာဒဲပ် ဘော ဘ့လာ လျီး ဂေ ဘဲန် ပွတ် ဘဲန် ပွတ်။ အန် မိူဝ် ဟဲ့ ဒုဝ့် ဘော လက်လဝ် ဂေ၊ တဲး န့ ကာဆိုမ် တူတ့်။

10 ဇဝ်ဖြာ တဝ်း၊ “တဲး ဘေ ကွယ် ဆီချာ၊ တဲး ဘေ နပ်၊ အုဝ် မုး ဇဝ်ဖြာ။ အုဝ် မုး အန် ဇဝ် ပီ အိူပ် ဂေ ဒူအီ ဒွန် မျုဝ်။ အုဝ် ဟဲ့ ကာအာပ် အီ အိူပ် ဒဲင် ကာဒါယ် နီ။”

11 ဇဝ်ဖြာ အီ အိုပ် တူတ့် ဒွန် မျုဝ်၊ အီ မုး ဇဝ်ဖြာ ပီ ကြိုပ် အာကူပ်၊ အန် ဘော မုး အန် ဇဝ် ပီ ဘိုင် အေ။