1 ဂြုဝ်း ပီ ဒီ အိူပ် ခုန်ဒီခမ် ဟဲ့ ကိူန် ခဲင် နဝ်း အုဝ်။ မူတ့် အုဝ် ဆီ ကာလာင်၊ တဲး န့ ပီ ဂမ်လမ် ပီ တာ ဒါ စာရေ၊ အီ အွန် ဒီ ဒဲမ် ပဲ့။

2 ခုန်ဒီခမ် ဟဲ့ စှိတ် လွှိုမ် ဒူအီ ဟဝ်။ ဂြုဝ်း ပီ ကာလာင် မဲ ဟဲ့ မွှိုမ် ထူမ်။ ခုဝ်၊ ဇဝ်ဖြာ ဒီ မွင့်ကာရာ ဒွါ ဒီ မဲ ဆေဆေ။

3 အိုယ် မဲ ခုန်ဒီခမ် အီ မိုဝ်း ပွုန် တာင် ကာဆဝ်၊ တဲး မဲ ကာနွင့် မာပွါ့ လာင် မဲ။

4 တဲး မဲ ဘျ အာဖုင် ဒင်ခုဝ် မဲ၊ တဲး မဲ ပဲ တူတ့် ဒွန် မျုဝ် အီ တူ မုး တူ မှာန်၊ တဲး န့ မိုဝ်း မီ အီ ဘူင် နာ မုး နာ မှာန်။ ကူပ် မိုဝ်း မဲ ဟဲန့်၊ တဲး မဲ ယ ဘူင် ပီ တူ ယ အီ ဟဝ်။

5 ဘ့လာ အ မဲ ခုန်ဒီခမ် ဟဲ့ လမ် ကာဆဝ် ဘော လိုပ် ခဲင် နဝ်း ရန်ဆူ မဲ။ ခဲ့ ကွယ် ရန်ဆူ မဲ၊ ဂေ ဒီ ဘော ကေး စှိုမ် တူတ့်။

6 မိူင် ပီ တဲး ဇဝ်ဖြာ မဲ အိုပ်၊ န့ ဒီ ကွယ် ဆေဆေ၊ တူ လိုဝ် ဒေါ မှဝ်။ မဲ ဒီ ဘော အိုပ် မိူင် မဲ၊ ဆုင်ဖျာတ် နာ မှာန် ဆေဆေ။

7 မဲ ဘော အိုင် နာ မုး နာ မှာန် ဘော ဇွင့် နာ စီစိဝ်။ ခုဝ်၊ ဇဝ်ဖြာ ပီ ကြိုပ် မဲ၊ အန် ဟဲ့ မွင့်ကာရာ ဒွါ ဒီ မဲ၊ တဲး န့ လွှိုမ် ပီ ဒွါ အန် ဒီ ခုန်ဒီခမ် ကာဒင် ဟဝ်။

8 ခြိုင် ပီ တာ မဲ ခုန်ဒီခမ် ဟဲ့ အုး ငှုန် ပီ ဒဝ် မူရာ၊ ဒဝ် အာလုဝ် ဘော ဒဝ် ခီဒါ။ မဲ ဘော ကွယ် ခဲင် ဟုဝ် ပီ ပိတ် ဂေ ပ့လဲ့ မာဆာင်။ ဂေ ဘော ဘး ဒိင်၊ တဲး န့ လဝ့် နဝ်း မဲ။

9 ဂွန် ဒီဘျာ အီ မုး ဂွန် ခုန်ဒီခမ် ဘဲန် မိူင် ဘဲန် မိူင်၊ ဂေ ဘော ဘဲန် ဇိူင် နာင် မဲ။ ဘ့လာက် အာအး မဲ ဇဝ် ဘော မုး နာင် ဟောခမ် အီ ကွယ်။ အန် ဘော စှိုပ် ဒီ တာ ခြိုင် ခြိဝ် အီ ဇဲတ်၊ အီ စှိတ် ကာဆဝ်။

10 အိုယ် မဲ ဂွန် ဒီဘျာ၊ တဲး မဲ ထူမ် ဆီချာ ဘော ဇေန့်ဇာ ခဲင် နဝ်း မဲ။ တဲး မဲ ပိဝ် ဘီနွင် ဝေါဝဲ မဲ၊ တဲး မဲ ပိဝ် ဘော ဒွန် အီ အီ ကွယ် ခဲင် ကာင် ဂုန့် မာ မဲ။

11 အီ မုး ခုန်ဒီခမ်၊ အန် ဒီ ဘော ဒိုဝ်း မဲ ကူပ် ဟဲ့ စှိတ် မဲ။ အန် ဘော မုး ဒါ ကာညာ မဲ။ ခုဝ်၊ တဲး မဲ ဂူမ် အန်။

12 ဂေ ဂွန် အီဘိုန့် အီ ကွယ် မိူင် ထူရုဝ်၊ ဂေ ဒီ ဒိုဝ်း တး လက်ဆွင်။ ဘော ဂေ ဒူအီ ခြမ်၊ ဂေ ဒီ တး၊ တဲး မဲ ဖြူမ် နဝ်း ဂေ။

13 နာင် ဟောခမ် ဘော ကွယ် ခဲင် ဟုဝ်။ အန် ဘော တာ ခြိုင် ပီ ဒဝ့် ဟပ် အီ ဆေန့် ခြိဝ်။ အန် ဟဲ့ စှိတ် ကာဆဝ်။

14 ဂေ ဘော ယဲတ့် နာင် အီ တာ ခြိုင် ကာဇဝ် တီ၊ တဲး အန် ဟာဝ် ဒူင် ကွယ် ခုန်ဒီခမ်။ ဘော ဂိုက် အန် တး ဒူပ် အန်၊ ဟာဝ် လိုပ် ဒူင် ကွယ် ခုန်ဒီခမ်။

15 ဒေါ ဒိုဝ်း တး ဂေ နာင် တီ၊ ဂေ ဘော ခူယ် ကာဆဝ်။ ဂေ ဘော လိုပ် ဟာဝ် ခဲင် ဟုဝ် ခုန်ဒီခမ်။

16 ဂွန် အီမာယ် မဲ ခုန်ဒီခမ်၊ အီ ဒီ ဘဲန် အီ ပ့လု ဂုန့် ဒင် ဂေ ဒေါ မွိုန်၊ ဂေ ဒီ ဘော ကိူန်။ မဲ ခုန်ဒီခမ် ဒီ ဘော တဲး ဂေ အိုပ် တူတ့် ဒဲင် ကာဒါယ် နီ။

17 အုဝ် ဒီ ကာလာင် ပီ ပါယ် ပွုန် မဲ ခုန်ဒီခမ် ဒီ ဂေ ဒူအီ အီ ညှမ် ဒွိုမ် ယိုဝ်၊ ညှမ် ဒွိုမ် နပ်၊ တဲး ဂေ ဘောကာဂ့လျီတ် ပွိုန် ဒီ အိူပ် မဲ ဒွန် စုဝ် ဒွန် ဇာတ်။