1 အိုယ် မဲ ဇဝ်ဖြာ၊ ယေ ဟဲ့ ဒွိုမ် ယိုဝ် ပီ ကာလာင် ဂုန့် ဒင် ယေ ဒီ ယေ။ ဂေ ဟဲ့ ခဲ၊ တဲး ယေ နပ် လွင် အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် ပဲ့ ဟဲ့ ဘူင် မဲ ဇဝ် ဒီ ဂေ ဒေါ မွိုန်။

2 မဲ ဇဝ်ဖြာ ဟဲ့ ညွန် တဝ် ဂေ ဒူအီ အာမျုဝ် ဟဝ် ဒီ မိူင် ဒူင် ကွယ် ယေ၊ ဝီ တဲး ဂုန့် ဒင် ယေ တီ ဘြဲ ကိူန်။ မဲ ဇဝ်ဖြာ ဘော ဘူင် တဲး ဂေ ဒူအီ အာမျုဝ် ဟဝ် ခမ် ဒုက် တာင်၊ ယီ ဝီ တဲး ဂေ ဂုန့် ဒင် ယေ ဒါခိုယ်။

3 ဂေ ပွိုန် ဒီ အိုပ် မိူင် တီ၊ အာဝ် မုး ကူပ် ကာဂုဝ်း ဂေ၊ တာ မာပွါ့ လာင် ဂေ။ အာဝ် မုး ကူပ် ကျ ဂေ ဒီ ကာဂုဝ်း၊ ဂေ ဟဲ့ ပွိုန် ဒီ အိုပ်။ န့ မုး ကူပ် ပွုန် မဲ ဇဝ်၊ ကူပ် ကွယ် ရိုမ် မဲ ဇဝ် ဒူပ် ဂေ။ ဇိုဝ် တီ တဲး န့ လိုဝ်း လွင် ရွက့် ကာဝေ မဲ ဒီ ဂေ။

4 မဲ ဇဝ်ဖြာ၊ မဲ မုး ခုန်ဒီခမ် အီ အိုပ် အုဝ် ဘော ဇဝ်ဖြာ ပီ ကြိုပ် အုဝ်။ ဆေ န့ မုး ဒူအီ ပီ အိုပ် မဲ၊ မဲ ဘော နပ် ဒီ တဲး ဂေ အွင်။

5 ဆေ ယေ ဘိုင် ပွုန် မဲ ဇဝ်ဖြာ၊ ယေ ဘော ပွိုန် ဒီ ပဲ ဂေ အီ ကာဂုဝ်း ဒီ ယေ။

6 ခုဝ်၊ အုဝ် တူ နဝ်း တာင် ဒီ အ အုဝ်။ အုဝ် ဟဲ့ နပ်၊ မာပွါ့ လာင် အုဝ် မိူဝ် တူ ပွိုန် ချွတ် အုဝ်။

7 န့ ယီ မုး မဲ ဇဝ်ဖြာ အီ ဟဲ့ ချွတ် ယေ၊ တဲး ယေ လေး တ ရန်ဆူ ယေ။ မဲ ဇဝ်ဖြာ ဟဲ့ ဘူင် တဲး ဂေ အီ ဇွင့် ယေ ဝီ ကာယဝ်း။

8 ယေ ဒဲစေန့် မဲ ဇဝ်ဖြာ၊ ဒွန် ဆီငဲ ယေ ဒီ အိူပ် မဲ။ ယေ ဒီ အိူပ် မျုက် ပွုန် မဲ ဇဝ်ဖြာ ဆေဆေ။

9 မာလဲ၊ မဲ ဇဝ် ဟဲ့ ဟွတ့် ဘ့လေး ဝဲန် တဲး ယေ မွှိုမ် ဆာယ်။ မဲ ဇဝ်ဖြာ မိူဝ် တူ ဟာဝ် ဒူပ် ဂေ အီ မုး ဒါ ဘုဝ် ယေ။

10 မဲ ဇဝ်ဖြာ ဟဲ့ ဘူင် တဲး ယေ ဝီ ကာဒုး ဒီ ဝီ ဝိဝ် နာ ပန်။ ဂေ အီ ဇွင့် ယေ၊ ဂေ ဟဲ့ ဒိုဝ်း ဟာဝ် ကြုဝ်ကြာမ် ယေ။

11 မဲ ဇဝ်ဖြာ ဟဲ့ ဘူင် တဲး ယေ ပီ မာဘူ ပီ ဒီ ငဝ်း ယမ် အီ ဟဝ်။ မဲ ဇဝ် ဟဲ့ တဲး ယေ ကာယဝ်း ကာတဲ ဂေ ဒူအီ အာမျုဝ် ဟဝ်။

12 န့ ပီ မဲ ဇဝ်ဖြာ ဟဲ့ ယွင့် ခြေ ဒူအီ အာမျုဝ် မဲ၊ န့ ပီ ဂေ တူ မိုဝ်း ငဝ်း မာဆေ။

13 မဲ ဇဝ်ဖြာ ဘော ဘူင် တဲး ဂေ အီ ကွယ် ကာတတ် ယေ၊ ကာလာင် စာဝ် ယေ၊ တဲး ဂေ အီ ကွယ် ခူပ် ယေ၊ နဲန ယေ ဘော ကာညး ယေ။

14 မဲ ဇဝ်ဖြာ ဘော ဘူင် တဲး ယေ ဘဲန် ပီ ကာမွုန် ပီ ကာလာင် ဒူအီ အာမျုဝ် ဟဝ်။ တဲး ယေ ဘဲန် ပီ ကာညး ဒူအီ ဘော မိူင်။

15 ဒွန် ဆီငဲ ဆာရေ အုဝ် ဟဲ့ ချဝ့် တူ တဲး အုဝ် ပိဝ်။ လွင် မွှိုမ် ဆာယ် အုဝ် တူ နပ် ဒီ တူတ့်။

16 ဂေ ဘော ဖျာက် အုဝ်၊ ဘော အေး အုဝ်။ ဂေ ရန်ဆူ အုဝ် ဝီ ဘူင် ဝျီ့ နာ တူ မွှိုမ် ဒီ အုဝ်။

17 ယေ ယီ တူ ပိဝ် ဂြုဝ်း မဲ ဇဝ်ဖြာ။ ယေ မိူဝ် ဘူင် ပီ ကာဆဲန့် ယေ ဒီ မဲ။ မဲ ယီ တဲး ယေ ခမ် အီ တူ မွှိုမ် ဒွန် မျုဝ်။

18 နဝ်း ယေ မိူဝ် တူ ဘ့လိူင် တူ ဝီ ဝိဝ် နာ ပန်၊ တူ ဝး န့တေန့် မဲ ဇဝ်။

19 န့ ပီ မဲ ဇဝ်ဖြာ ဟဲ့ ဘ့လေး ဝဲန် ယေ ခဲင် ကာဒဝ် မာဆုဝ် ပြဲ၊ ဟဲ့ တဲး ယေ ကွယ် ခဲင် အပ် ဝွင့် အီ မုး ဒူင် ကွယ် ဒူအီ ယမ်။

20 ဆေ ယေ ပိဝ် ဂုင် ဂေဇူ မဲ ဇဝ် ဘော ဝီ ကြိုပ် ဇဝ်ဖြာ ပီ ကြိုပ် အီ ဟဝ်၊

21 မဲ ဇဝ်ဖြာ ဒီ ဘော နပ် တူတ့် လွင် အန် တီ။ ခုဝ်၊ မဲ ဇဝ်ဖြာ နပ် ဆီချာ ပီ ကာဖာ ယေ ခဲင် နဝ်း ယေ။

22 ကူပ် ညှိုမ် ယေ ဒီ မဲ ဇဝ်ဖြာ၊ န့ ပီ ယေ ဒီ ဘော လုဝ် ယမ် ဒွန် ဆီငဲ။ ယေ ဘော ပီ မာဘူ ပီ ဒီ ငဝ်း ယမ် အီ ဟဝ်။

23 အိုယ် မဲ ဇဝ်ဖြာ၊ မှာန့်၊ ကွဲ့ တဲး မဲ အိတ်၊ တဲး မဲ ဇဝ် ယိတ့် ယွတ် ယေ။ ကွဲ့ တဲး မဲ ဇဝ် ပိဝ် ယေ၊ ကွဲ့ တဲး မဲ ဘ့လေး ဝဲန် ယေ ဒေါ မှဝ်။

24 န့ ပါယ် မှဝ်၊ မဲ ဇဝ် တူ ယွတ် ဒေါ ခါနှာပ် အီ ဟဝ် ဒီ ယေ။း မှဝ် န့ ပါယ် ပီ ပိဝ် မဲ ဇဝ် ဒီ ယေ ဒေါ ဇမ် ယေ ဒုက် တာင်။း

25 နဝ်း ယေ ဟဲ့ ဒီတဲတ်။ န့ ပီ၊ ယေ ကွယ် ခဲင် ကာပုး။ ယေ မိူဝ် ဟဲ့ ကေး ဆာဂိုပ် ဒီ ကာဒါယ်။

26 ယေ မှာန့်၊ မဲ ဇဝ်ဖြာ တး စွယ် ယေ။ ကူပ် မိုဝ်း မဲ နဝ်း ရွက့် ကာဝေ ယေ၊ တဲး မဲ ဇဝ် စွယ် ယေ။