1 ဂေ အီ ရွက့် ကာဝေ ဒူအီ ဂိန်၊ ဂေ ဒီ ဘျုဝ် ဒါခိုယ်။ ဇဝ်ဖြာ ဒီ စွယ် ဒေါ ဇမ် ဂေ ဒုက်။

2 ဇဝ်ဖြာ ဒီ ဘော ဂွင့် ရဲ ဂေ ဘော ဘ်ု ရိတ် အာဆာက် ဂေ၊ ကွဲ့ တဲး န့ စှိုမ်။ ဒေါ ကွယ် ဂေ ခဲင် မိူင် နီ၊ အီ ဟဝ် ဒီ ဘော တဝ်း၊ ဇဝ်ဖြာ ဟဲ့ မွင့်ကာရာ ဒွါ ဒီ ဂေ။ ဇဝ်ဖြာ မိူဝ် တူ အာပ် ဂေ ဒီ ရန်ဆူ ဂေ၊ တူ တဲး ရန်ဆူ ဂေ ပွိုန် ဒီ ဘူင် ခဲ့ ပီ အိုင် ဂေ။

3 ဂေ ဘော မိုဝ်း ဆဝ် ရောဂါ၊ ဇဝ်ဖြာ ဒီ ဘော စွယ် ယွတ် မဲန် ဂေ၊ တဲး ဂေ ပွိုန် ဒီ အိတ် ဆီချာ ဒူင် အိတ် ဂေ။ အန် ဒီ ဘော ယွတ် လိုမ်လာ၊ တဲး န့ ဟြာယ် တူတ့် ဒွန် မျုဝ်။

4 န့ ယီ မုး အုဝ်၊ အုဝ် မှာန့် တဝ်း၊ “အိုယ် မဲ ဇဝ်ဖြာ၊ အုဝ် ပီ ဘော ဟဲ့ ကာလိုပ် ဒီ ဘူင် မှာပ်၊ အုဝ် မှာန့်၊ တဲး မဲ ဇဝ် ကာဝေ အုဝ်။ အုဝ် မှာန့်၊ တဲး န့ ဟြာယ်။”

5 ဂေ ရန်ဆူ အုဝ် ဘော ကာလာင် နာ တူ မွှိုမ် လွင် အုဝ်။ ဂေ တဝ်း၊ “ပန် မှဝ် အန် ဒီ ယမ်၊ ပန် မှဝ် ခြိုဝ် အန် ဒီ ဟြာယ် တူတ့်။း”

6 ဒေါ တး စ်ု ဂေ ဒီ အုဝ်၊ ဂေ ညိုင်ရာင် ပီ ကာလဝ့် ဒီ အုဝ်။ ဂေ ဘော ဟြေတ့် ဒီ ယွတ် အီ တူ မွှိုမ် လွင် အုဝ်။ ဟဲ့ ဟွတ့်၊ ဂေ ဘော ဝီ လေး ဟာဝ်၊ ဝီ ကာလာင် တဲး ဒွန် အီ နပ်။

7 ခဲ့ ကွယ် ဂေ အီ ဇွင့် အုဝ်၊ ဂေ ဘော ပြာ ဒီ လာယ် ဖူဖာပ်၊ လာယ် ဆင်ချာင် ဒီ ဘူင် နာ တူ မွှိုမ် ဒီ အုဝ်။

8 ဂေ တဝ်း၊ “အန် ဟဲ့ ဒဝ့် ဆဝ် ကာဆဝ်။ အန် ဟူ နပ် ဒီ ပွိုန် ဒီ ဝီ ယိတ့် ဒူင် အိတ် အန် ဒေါ မှဝ်။”

9 ဘော ဂိုက် ပီ ညှိုမ် အုဝ် အီ ဒွိုမ် ဟူမ် ဘူမ် ဒူပ် အုဝ်၊ အန် ဟဲ့ ဝီ ဘဲန် ရန်ဆူ အုဝ်။

10 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ကာဝေ အုဝ်၊ တဲး အုဝ် ပွိုန် ဒီ ဝီ ဘူင် ဝျီ့ မှာပ် ပဲ့ ဟဲ့ ဘူင် ဂေ တီ ဒီ အုဝ်။

11 အုဝ် ဟဲ့ နပ်၊ မဲ ဇဝ်ဖြာ ဟဲ့ အိုင် အုဝ်။ မဲ ဇဝ် မိူဝ် တူ တဲး ဂေ ရန်ဆူ အုဝ် ပဲ အုဝ်။

12 မဲ ဇဝ်ဖြာ ဟဲ့ စွယ် အုဝ် ကူပ် ဘူင် အုဝ် နာ ဆိူဝ် နာ မှာန်။ မဲ ဇဝ် ဘော တဲး အုဝ် ကွယ် ဆီချာ၊ တဲး အုဝ် ကွယ် ဒူပ် မဲ ဆေဆေ။

13 တဲး အေ အိူပ် ဇဝ်ဖြာ၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ တဲး ဒူအီ ဒွန် ဇာတ် ဒွန် စုဝ် အိူပ် ဇဝ်ဖြာ။ တဲး န့ မုး၊ တဲး န့ မှာန် ဆာတူ ဆာတူ။