1 အုဝ် ဟဲ့ ခမ် ဒီ ယိူန် ဘော နှဝ့် လှေန့်၊ တဲး ဇဝ်ဖြာ စွယ် အုဝ်။ အန် ဇဝ် ဘော ယွတ် အုဝ် ဘော ထူမ် ဂြုဝ်း ပီ ဆာခိုဝ် အုဝ်။

2 န့ ပီ အန် ဇဝ် ဟဲ့ ဒိူတ် လေး အုဝ် ခဲင် ကာဒဝ် အီ မွှိုမ် ယုဝ်၊ ဒိူတ် လေး အုဝ် ဘော ခဲင် ညုဝ့် ည။ န့ ပီ အန် ဇဝ် ဟဲ့ တဲး အုဝ် ဝီ ကွယ် ဒဲင် မာဝ်၊ တဲး အုဝ် ပွိုန် ဒီ ဟာဝ် ဆီချာ။

3 အန် ဇဝ် ဘော တဲး အုဝ် တဝ်း မှုဝ် ကာမာယ်၊ တဲး အုဝ် တဝ်း မှုဝ် အီ အိူပ် ဇဝ်ဖြာ၊ တဲး ဘော ဒူအီ ကိူန် ပွိုန် ဒီ ထူမ်၊ တဲး ဘော ဂေ ရုဝ်ဆေ ဘော ဘိုင် အန် ဇဝ်။

4 အာဆေ ဘိုင် ဇဝ်ဖြာ၊ အာဆေ တူ တဝ်း ဒီ ကြိုပ် အာရိုပ်၊ တူ ဒူပ် ဂေ အီ ဘိုင် မျုဝ် တူ မှာန်၊ န့ ဒီ ဘဲန် နဝ်း ဒါခိုယ် ဒီ အန်။

5 မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ မဲ ဟဲ့ တဲး ယေ ယိုဝ် အီ မွှိုမ် အာမ် ပဲ့ ဟဲ့ ဘူင် မဲ၊ အီ ဟဲ့ ကိူန် ကာဆဝ်။ အာဝ် မိုဝ်း အာဆေ အီ ပီ မဲ။ ဆေ အုဝ် ဒီ တဝ်း ဒီ ကာလာင် တူတ့် ဒွန် မျုဝ်၊ အာဝ် နပ် ဒီ တူတ့်။ ဆေ အုဝ် ဘော တဝ်း ဒီ တိး၊ အာဝ် ဟူ နပ် ဒီ တိး ကူပ် ဟဲ့ ကိူန် ကာဆဝ်။

6 မဲ ဇဝ် တူ ဆီ ပွိုန် ကြုဝ် လှူ ပီ လှူ အီ။ မဲ ဇဝ် ဟဲ့ တဲး အုဝ် ထူမ် ဂြုဝ်း မဲ။ ပီ လှူ အီ ဒုဝ့် ဒီ ငဝ် ဘော ပီ လှူ အီ ဂဝ်း ဝဲန် မှာပ်၊ မဲ ဇဝ် တူ လုဝ် အီ တး လှူ။

7 ခုဝ် အန် တီ အုဝ် ဘော တဝ်း၊ “မဲ ဇဝ်၊ အုဝ် ဟဲ့ ဟွတ့် တး။ ခဲင် ဘပ် မဲ န့ ဟဲ့ ဒဲမ် အုန် လွင် အုဝ်။

8 အိုယ် မဲ ဇဝ်ဖြာ ပီ ကြိုပ် အုဝ်၊ နဝ်း အုဝ် ဟဲ့ ဒါခိုယ် ကာဆဝ်။ အုဝ် ဟဲ့ ပွိုန် ဒီ ဘူင် ပီ အိုင် မဲ ဇဝ်။ ဒါရာ မဲ ဇဝ် မိူဝ် ဟဲ့ ကွယ် ခဲင် နဝ်း အုဝ်။”

9 အုဝ် ဟဲ့ ကာလာင် တဲး ဘော ဒူအီ ကိူန် ထူမ် လွင် မဲ ဇဝ် ချွတ် အီ။ မဲ ဇဝ် မိူဝ် ဟဲ့ နပ်၊ အုဝ် တူ ပွိုန် အူတ် နဝ်း၊ ကွဲ့ တဲး အုဝ် ကာလာင် ဒီ အီ။

10 လွင် မဲ ဇဝ် ချွတ် အီ၊ အုဝ် မိူဝ် တူ ခမ် ဒီ တဲး န့ ကွယ် ခဲင် နဝ်း အုဝ် အူ ဝီ။ အုဝ် ယီ ကာလာင် လွင် နဝ်း မွှိုမ် နဝ်း မှာန် မဲ ဇဝ်။ အုဝ် မိူဝ် ကာလာင် လွင် နဝ်း ရွက့် နဝ်း ကာဝေ မဲ ဇဝ် တဲး ဒူအီ ကိူန် ထူမ်။ အုဝ် တူ ချြီင် မာဆေ။

11 မဲ ဇဝ်ဖြာ၊ အုဝ် မှာန့်၊ တဲး မဲ ရွက့် ကာဝေ အုဝ် ဆေဆေ။ ကွဲ့ တဲး န့ ကာဒတ် ဒေါ မှဝ်။ နဝ်း မှာန် နဝ်း မွှိုမ် မဲ၊ တဲး န့ တဲး အုဝ် ကွယ် ဆီချာ ဆေဆေ။

12 န့ မိုဝ်း အီ တူ မွှိုမ် ဘဲန် မျုဝ် ဘဲန် မျုဝ် ကွယ် ရူပ် အုဝ်။ မှာပ် ပဲ့ ဟဲ့ ဘူင် အုဝ်၊ အုဝ် ဝီ လုဝ် ခမ်။ မှာပ် တီ ဟဲ့ ကိူန် လွှိုမ် ဟိုက် ဂိန့် အုဝ်၊ တူ တဲး အုဝ် ပွိုန် ဒီ ယိုဝ် ပေါ အူ မျုဝ်၊ တဲး နဝ်း အုဝ် ဒီလှး န့စမ်။

13 အုဝ် မှာန့် မဲ ဇဝ်၊ တဲး မဲ စွယ် အုဝ်။ တဲး မဲ ဇဝ် စွယ် အုဝ် ခြန် ခြန်။

14 တဲး ဂေ အီ ဟြေတ့် ဒီ ငဝ်း အုဝ် ဝီ မွှိုမ် ဆာယ်၊ တဲး ဂေ အီ ဘူင် နာ စီစိဝ် ဒီ အုဝ်၊ ဝီ တဝ် ဘော စှိုမ် ဆာရေ။

15 တဲး ဂေ အီ တဝ်း၊ “အေက်၊ အေက်” ဒီ အုဝ်၊ ဘဲန် ရိုဝ် ဘဲန် ငှဝ် ကူပ် ဟဲ့ ဆာယ် ဂေ ဒီ အီ။

16 ဂေ အီ ဆီ ထူမ် ဂြုဝ်း မဲ ဇဝ်၊ တဲး ဂေ မိုဝ်း နဝ်း ဒါခိုယ် ဆေဆေ။ ဂေ အီ အိူပ် မဲ ဇဝ် ကူပ် ဟဲ့ ချွတ် မဲ ဒီ ဂေ၊ တဲး ဂေ တဝ်း၊ “ဇဝ်ဖြာ မိုဝ်း အာဖုင် ဒင်ခုဝ် တာင် ကာဆဝ်။”

17 န့ ယီ မုး အုဝ်၊ အုဝ် ဟဲ့ ဒီလှး တူ မိုဝ်း မာဆေ။ မဲ ဇဝ်ဖြာ ယီ ယွတ် မဲန် အုဝ်။ ကွဲ့ တဲး မဲ ပိဝ် အုဝ်။ မဲ ဇဝ် မုး အီ စွယ် အီ ချွတ် အုဝ်။ မဲ ဇဝ်၊ ကွဲ့ ဘ်ု လှေန့်၊ တဲး မဲ တး စွယ် အုဝ် ခြန် ခြန်။