1 အုဝ် တဝ်း၊ “အုဝ် ဒီ ဆာဒိက် ပီ ဘူင် အုဝ် ဒွန် မျုဝ်၊ ကွဲ့ တဲး ဂြုဝ်း ပီ ကာလာင် အုဝ် ဘဲန် မှာပ် ဒီ အုဝ်။ အုဝ် ဒီ ကာဘိတ် မူတ့် အုဝ် ဒေါ ကွယ် ကာတတ် ဂေ ဒူအီ မိူက် ဒီ အုဝ်။”

2 အုဝ် မိူဝ် တူ ဂြုဝ်း။ မာလဲ၊ အုဝ် ပီ ဘော ဟဲ့ ဂျုဝ်ဂျာ ဒီ တူ ဂြုဝ်း ပါယ် တီ၊ န့ ဘော ဝဲ ဒုက် ဒီ နဝ်း အုဝ်။

3 န့ ဘော ကာဟွာ့ ကာဆဝ် ခဲင် ဒုဝ် အုဝ် ပီ ငဝ်။ န့ ဘော ပီ ငဝ် ဟဲ့ ကုး ခဲင် နဝ်း အုဝ်။ အုဝ် ဘော ဝီ ဆာခိုဝ် တဝ်း၊

4 “အိုယ် မဲ ဇဝ်ဖြာ၊ အုဝ် မှာန့်၊ တဲး အုဝ် နပ်၊ အာဆာက် အုဝ် ဒီ တူင့် ခဲ့ မှဝ်။း ပန် မှဝ် အန် ဒီ တူတ့်။း တဲး အုဝ် ဘော လှုဝ်း လွင် တူ လှေန့် အာဆာက် အုဝ်။”

5 အုဝ် ဟဲ့ နပ်၊ မဲ ဇဝ်ဖြာ ဟဲ့ ဘူင် တဲး အာဆာက် အုဝ် ကွယ် အူ ကာစန်။ ဆေ န့ ပွိုန် ဂဝ် တူင့် အန်၊ န့ ပီ အာ အူယ် ကာဘာ ဒဲ။ အာခြာဝ် အာဆာက် အုဝ် တီ ယီ တူ ခဲ့ မှဝ် ဒီ မဲ ဇဝ်ဖြာ။ ဟဲ့ မှာန်၊ ဟဲ့ မုး၊ ခဲ့ ကွယ် ဒူအီ ဒွန် အီ၊ ဂေ ကွယ် အူ ကာစန် ပီ ခုန် ပါယ် ဖ့လပ်။

6 ဂေ ပီ ကာမိုက် အီ ဟာဝ် ဝိဝ် ဟာဝ် ဝေန့်။ ဂေ ပီ ဘော ဒုက် ဘော ညှာပ်၊ အာဝ် မိုဝ်း ဒီခုဝ် မာဆေ။ ဂေ ပီ ဘော ဟြူမ် အုန် ကြုဝ်ကြာမ်၊ ဂေ တူ နပ် အာဆေ ဒီ ပွိုန် ဒီ ဘိုင်။

7 ဆေ န့ ပါယ် တီ၊ အာဝ် ခုဝ် နှဝ့် န့ဒဝ့် အုဝ် ဇိုဝ် တီ။ အုဝ် ယီ နှဝ့် န့ဒဝ့် မဲ ဇဝ်ဖြာ။

8 အုဝ် မှာန့်၊ တဲး မဲ ဇဝ် ဂဝ်း ဝဲန် မှာပ် ပဲ့ ဟဲ့ ဘူင် အုဝ်။ ကွဲ့ တဲး ဂေ ဒူအီ ရိုဝ် ပွိုန် ဒီ နဲန အုဝ်။

9 အုဝ် တူ တဝ်း မာဆေ၊ တူ နပ် ဂြုဝ်း။ ခုဝ်၊ မဲ ဇဝ်ဖြာ ဟဲ့ တဲး အုဝ် ခမ် ဒုက် ဇိုဝ် တီ။

10 အုဝ် မှာန့်၊ တဲး မဲ ဇဝ် စူ ဒမ် မှာပ် ဒီ အုဝ်။ အုဝ် ဟဲ့ ရိန် ဒီ ယမ် ကူပ် ပီ ဘူင် မဲ ဇဝ် ဒီ အုဝ်။

11 ဆေ မဲ ဇဝ်ဖြာ ဘော မာနုဝ် ဒူအီ ကူပ် မှာပ် ဂေ၊ မဲ ဇဝ် ဒီ တဲး ပီ အိုင် ပီ ဝုဝ် ဂေ စှိုမ် ပီ ခြိုင် ပီ ဟူမ် မာဝ။ ဟဲ့ မှာန်၊ ဟဲ့ မုး၊ ခဲ့ ကွယ် ဒူအီ ဒွန် အီ၊ ဂေ ကွယ် အူ ကာစန်၊ ပီ ခုန် အီ ဘုတ် ပါယ် ဖ့လပ်။

12 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ထူမ် ပီ ဆာခိုဝ် ဆာဒူင် အုဝ်။ တဲး မဲ ဇဝ် ဘော ထူမ် ဂြုဝ်း ပီ ဒတ် အုဝ်။ မဲ ဇဝ်၊ တဲး မဲ ယွတ် အိုမ် ငါယ် အုဝ်။ အုဝ် ဘော ပီ ခဲတ့် အီ ကွယ် အူ ကာစန် ပီ ဂေ ဂုန့် ဒင် အုဝ် ဒွန် အီ။

13 အာတ့် ဘျုဝ်း၊ အာတ့် ဟြာယ် အုဝ်၊ အုဝ် မှာန့်၊ ကွဲ့ တဲး မဲ ဇဝ် ယွတ် မှာပ် အုဝ်၊ တဲး အုဝ် ဘျုဝ် ဒါခိုယ်။