1 အိုယ် မဲ ဇဝ်ဖြာ၊ ကွဲ့ ဒမ် မှာပ် ဒီ အုဝ် ဒေါ ရူ မဲ။ ကွဲ့ မာနုဝ် ကာဆဝ် အုဝ် ဒေါ စာဝ် မဲ။

2 န့ ပီ ဘ့လာ အ မဲ ဇဝ် ဟဲ့ လိုပ် ခဲင် ဒုဝ် ဘူင့် အုဝ်။ န့ ဘော ပီ ဒဲ မဲ ဇဝ် ဟဲ့ ဒုး တဲး အုဝ် ကေး။

3 မဲ ဇဝ် ဟဲ့ ရူ ကူပ် မှာပ် အုဝ်၊ ဟဲ့ ဘဲန် ဆဝ်ဖိုဝ် ကာဆဝ် ဒီ အုဝ်။ ဟဲ့ ဆဝ် ဘော ဒုဝ်။

4 မှာပ် အုဝ် ဟဲ့ ကိူန် ကာဆဝ်၊ န့ ပီ အုဝ် ဟဲ့ စေတ့် ခဲင် မှာပ်။ န့ ဘော ပီ အုဝ် လုဝ် ဂွတ် ကြုဝ် စန်၊ ပီ တူ ပဲ အုဝ်။

5 ကူပ် ဟဲ့ ရိုဝ် အုဝ်၊ ဒိမ် ဒီ ဒုဝ် အုဝ် ဘော လာတ့် အုး အမ် ကာဆဝ်။

6 ကူပ် ဟဲ့ ခမ် အုဝ် ဆဝ် ကာဆဝ်၊ န့ တူ တဲး အုဝ် ပွိုန် ဒီ ယိတ့်။ ဒွင် ဝန် ဒွင် ခိူန် အုဝ် ဘော ယာမ် ဘော က့လိုဝ် ကာဆဝ်။

7 ညွယ် အုဝ် မိူဝ် ဟဲ့ ကာဟွာ့ နှဲန် ငဝ်။ ဒုဝ် အုဝ် ဘော ဒုဝ် ဟဲ့ ဆဝ်။

8 အုဝ် ဘော ဒီလှး န့စမ် ဘော ဒုဝ်၊ အာဝ် ပွိုန် ဘူင် မာဆေ။ နဝ်း အုဝ် မိူဝ် ဘော ကာပျာတ့် လိုဝ်၊ တဲး အုဝ် ဘော ငှုန် ကာဆဝ်။

9 အိုယ် မဲ ဇဝ်ဖြာ၊ ခဲ့ ပီ လုဝ် အုဝ် ဒွန် မျုဝ် မဲ ဇဝ် ဘော နပ် တူတ့်။ ခဲ့ ပီ ငှုန် အုဝ် တီ၊ မဲ ဇဝ် ဘော ယိုဝ် တူတ့်။

10 ဘာင်နဝ်း အုဝ် ဘော တာ တိုက် ကာဆဝ်။ အုဝ် အာဝ် ဟူ မိုဝ်း ဟဲန့်။ ငါယ် အုဝ် မိူဝ် အာဝ် ဟူ ဘ့လာင်။

11 ဂေ အီ ရွက့် အုဝ် ဘော ဂိုက် အုဝ်၊ ဂေ ဘော ကွယ် တူင့် အုဝ် ကူပ် ဟဲ့ ဆဝ် အုဝ် တီ။ ဂေ ဘီနွင် ဝေါဝဲ အုဝ် မိူဝ် ဘော ဝး တူင့် အုဝ်။

12 ဂေ အီ ဆီ ငဝ်း အုဝ်၊ ဂေ ဘော ဒိန့် ယွတ့် ဒီ အုဝ်။ ဂေ အီ ဆီ ဘူင် နာ တူ မွှိုမ် ဒီ အုဝ်၊ ဂေ ဘော ကာမွုန် ဇေန့်ဇာ ပီ ဒီ ပါယ် ဂေ ဒီ ဘူင် ဒွင် ဝန် ဒွင် ခိူန်။

13 အုဝ် ယီ ညိုင်ရာင် တူ ယိုဝ် ဂြုဝ်း ဂေ၊ တဲး အုဝ် ပီ ဒူအီ ရိုဝ်၊ အီ ဟျုဝ့် ကာအာဝ်၊ အီ တူ နပ် ဒီ ဂြုဝ်း။

14 အုဝ် ဘော ပီ အီ တူ နပ် ဒီ ထူမ်၊ အီ တူ နပ် ဒီ ဝျီ့ ဂြုဝ်း ဂေ။

15 န့ ယီ မုး မဲ ဇဝ်ဖြာ၊ အုဝ် ဘိုင် မဲ ကူပ် မုး မဲ ဇဝ်ဖြာ ပီ ကြိုပ် အုဝ်။ မဲ ဒီ ဘော ထူမ် ဘော ယဝ်း ဂြုဝ်း အုဝ်။

16 အုဝ် မှာန့်၊ ကွဲ့ တဲး ဂေ ရန်ဆူ အုဝ် ခူယ် တး ဒေါ ဒီလှး အုဝ်။ ကွဲ့ တဲး ဂေ ပွိုန် ဒီ ပီခိုက် ဂေ၊ ပွိုန် ဒီ ခူယ် ကာညး အုဝ် ဒေါ ဒီပ့လာတ် ကေး အုဝ်။

17 ခုဝ်၊ ဆဝ် ဟဲ့ ဒိုက် ဒီ အုဝ် ဆေဆေ။ အုဝ် မိူဝ် ဟဲ့ ရိန် ဒီ ကေး။

18 အုဝ် ဘော ကာလာင် မှာပ် အုဝ်။ ကူပ် လှုဝ်း အုဝ် မှာပ် အုဝ်၊ အုဝ် ဘော က့လိုဝ် ကာဆဝ်။

19 ဂေ ရန်ဆူ အုဝ် ယီ ကွယ် ဒါခိုယ်၊ မိုဝ်း ပ့လူမ် လွှိုမ် အုဝ်။ ဂေ ဒူအီ ကိူန် ဘော ဇွင့် အုဝ် ပီယေန့်။

20 အုဝ် တဝ်း၊ အုဝ် ဒီ ဘူင် နာ ဘွတ်။ ဂေ ယီ ဝီ ဘူင် ဝျီ့ နာ တူ မွှိုမ် ဒီ အုဝ်။ ဂေ ဝီ ဘဲန် ရန်ဆူ အုဝ် ကူပ် ဂျုဝ်ဂျာ အုဝ် ဒီ ဘူင် နာ ဘွတ် နာ မွှိုမ်။

21 အိုယ် မဲ ဇဝ်ဖြာ၊ မဲ ကွဲ့ ဘ့လေး ဝဲန် အုဝ်။ မဲ ဇဝ် ဘော မုး ဇဝ်ဖြာ ပီ ကြိုပ် အုဝ်။ အုဝ် မှာန့်၊ တဲး မဲ ကွယ် ရိုမ် ဒူပ် အုဝ် ဆေဆေ။

22 မဲ ဇဝ် ဘော မုး ဇဝ်ဖြာ အီ ချွတ် အုဝ်။ အုဝ် မှာန့်၊ မဲ ဇဝ် စွယ် အုဝ် ဟဲ ဟဲ။