1 ကွဲ့ တဲး န့ ဒုက် န့ ညှာပ် ဒီ နဝ်း ဘေ ကူပ် ဂေ ဒူအီ ဟာယ်။ ကွဲ့ လှယ့် ဂေ အီ ဘူင် နာ တူ မွှိုမ်။

2 အာဝ် လှေန့် ဂေ ဒီ ဟြာယ် ပီ ပေတ့်။ ဂေ ဒီ ပီ ဒဝ် အီ ဟျီ့ ကာဟဝ်း။ ဟဲ့ ဟွတ့်၊ အာဝ် ဟူ မိုဝ်း။

3 တဲး ဘေ ဘိုင် ဇဝ်ဖြာ ဘော ဘူင် နာ ဘွတ် နာ မွှိုမ်။ န့ ဒီ တဲး ဘေ ကွယ် ဆီချာ ခဲင် မိူင် ပီ အိုပ် ဇဝ်ဖြာ။

4 ဆေ ဘေ ဒါခိုယ် ဒီ ဘူင် ပီ အိုင် ဇဝ်ဖြာ၊ အန် ဇဝ် ဒီ ဘော ဒွါ ခဲ့ ပီ ဆီ ပွိုန် နဝ်း ဘေ။

5 လွင် ပီ ကာဖာ ဘေ နာ အာတ့် ဒီ ပါယ် မှဝ်၊ တဲး ဘေ ဘိုင် ဇဝ်ဖြာ။ အန် ဇဝ် ဒီ ဘော ဘူင် တဲး န့ ဇေ့ဇုင် တူတ့် ဒွန် မျုဝ်။

6 ဇဝ်ဖြာ ဒီ တဲး န့ လိုဝ်း လွင် နဝ်း ဆိူဝ် ဘေ၊ တဲး န့ ပီ အီ ယိုဝ် ဘ့လာင် ဆီငဲ။ နာ မှာန် ပီ ဘူင် ဘေ၊ အန် ဇဝ် ဒီ တဲး အီ ယိုဝ်၊ တဲး န့ ပီ ဘ့လာင် ဒေါ ကာတဲ ဆီငဲ။

7 တဲး ဘေ ကွယ် ယေန် ယေန်။ တဲး ဘေ နှဝ့် ဇဝ်ဖြာ၊ ကွဲ့ ဒူပ် နဝ်း ကာဟွာ့ နဝ်း မှဲ ဘေ။ ကွဲ့ တဲး န့ ဘဲန် နဝ်း ကာဟွာ့ ဒီ ဘေ၊ ဆေ ဘေ ယိုဝ် ဒူအီ ခြမ် အီ ဘူင် နာ တူ မွှိုမ်၊ အီ ဒူပ် ပီ အိုင် ဂေ။

8 တဲး ဘေ အူတ် နဝ်း ရူ၊ ဝဲန် နဝ်း စာဝ်။ ကွဲ့ တဲး န့ ဘဲန် နဝ်း ကာဟွာ့ ဒီ ဘေ။ ခုဝ်၊ န့ ဒီ တဲး ဘေ ဇမ် ဒုက်။

9 ဇဝ်ဖြာ ဒီ ဝဲန် ဂေ အီ ဘူင် နာ တူ မွှိုမ်။ ဂေ အီ ဘိုင် ဇဝ်ဖြာ၊ ဂေ ယီ ပွိုန် ဒီ ကွယ် ဆီချာ ခဲင် မိူင် ပဲ့ ဟဲ့ ဒွါ ဇဝ်ဖြာ ဒီ ဂေ။

10 အာဝ် လှေန့် အူ ကာစန် ဂေ အီ ဟာယ်၊ ဂေ ဒီ ဟြာယ် တူတ့်။ ဘေ ပီ ဘော ဝီ ဟြေတ့် ဂေ၊ အာဝ် ဟူ နပ် ဒီ ယိုဝ်။

11 ဂေ အီ မိုဝ်း နဝ်း ဂူမ်၊ ဂေ ယီ ပွိုန် ကွယ် ခဲင် မိူင် ပဲ့ ဟဲ့ ဒွါ ဇဝ်ဖြာ ဒီ ဂေ။ ဂေ ဒီ ဘော ဘျုဝ် ဒါခိုယ် ကူပ် ဘဲန် မျုဝ် ဘဲန် မျုဝ် ပီ ဒွါ ဇဝ်ဖြာ ဒီ ဂေ။

12 ဂေ ဒူအီ ဟာယ်၊ ဂေ ခြာမ် ဒီ ဘူင် ကာဘး ဒီ ဒူအီ မွှိုမ်။ ဂေ ဒီ ဘော ဇွင့် ဒီ မမ် ဒီ ဒူအီ မွှိုမ် တွိုန်။

13 ဇဝ်ဖြာ ဝီ အေဝ် ကာညး ဂေ။ အန် နပ်၊ အာဝ် လှေန့် ဂေ ဒီ ဇမ် ဒုက်။

14 ဂေ ဒူအီ မိူက် ဘော ထွတ် မာပွါ့ လာင် ဂေ ဘော ဝိတ့် အ ဂေ၊ တဝ်း ဒီ ငဝ်း ယမ် ဂေ ဒူအီ ဂိန် ပီ ခါနှာပ် ဂေ။ ဂေ ဆီ ငဝ်း ယမ် ဘော ဂေ အီ ဘူင် နာ မွှိုမ်။

15 မာပွါ့ လာင် ဂေ တီ ယီ ဝီ ဆတ် ဒုဝ် ဘြိမ် ဂေ၊ တဲး ဂေ ယမ်။ အ ဂေ ဘော ကာဘက် လိုဝ် တူတ့်။

16 ဂေ ဒူအီ အီ မိုဝ်း နဝ်း ဆိူဝ်၊ ဂေ ယီ တူ မိုဝ်း ကိူန် ကြုဝ်ကြာမ်။ ခဲ့ မိုဝ်း ဂေ ယီ မွှိုမ် လွှိုမ် ကြုဝ်ကြာမ် ကိူန် ပီ အုန် ဂေ ဒူအီ ဟာယ်။

17 ခုဝ်၊ ဇဝ်ဖြာ ဒီ ဘော ဒိုဝ်း ဝဲန် ပွုန် ဂေ ဒူအီ ဟာယ်။ အန် ယီ ဒီ ရဲ ဒီ ဂွင့် ဂေ ဒူအီ မွှိုမ်။

18 ဇဝ်ဖြာ ဘော နုဝ် ဘော နပ် တူတ့် လွင် ဂေ အီ ထူမ် ဂြုဝ်း အန်။ ခါဂုန် ပဲ့ ဟဲ့ ဒွါ ဇဝ်ဖြာ ဒီ ဂေ၊ န့ ဒီ ကွယ် ဆေဆေ။

19 ဒေါ ဇမ် အာခြာဝ် တူ မွှိုမ်၊ ဂေ တူ လုဝ် ခမ် အီ မွှိုမ် ဆာယ် ပီ အီ ဟဝ်။ ဒေါ ဇမ် အာခြာဝ် အေတ့် ပီ ဒီ ဟူမ်၊ ဂေ ဒီ မိုဝ်း လွှိုမ် ပီ လုဝ် ဂေ။

20 ဂေ ဒူအီ ဟာယ်၊ ဂေ ဒီ လိုဝ် စှိုမ် တူတ့် ပီ ဘုဝ်း အီ စှိတ် ခဲင် ပြဲ။ အာဝ် လှေန့် ဟဲ့ ဟြာယ်။ ဂေ ဒီ ဘော ဟြာယ် ပီ ဒက် ငဝ်။

21 ဂေ ဒူအီ ဟာယ်၊ ဂေ နပ် ဒီ ကာရဝ်း ဒီ အီ၊ ဂေ ယီ တူ ဆီ ဝီ ဝျီ့။ ဂေ ဒူအီ မွှိုမ် ဂေ ယီ မိုဝ်း နဝ်း ဒီဟာင်၊ နပ် ဒီ ကာဝေ အီ၊ ဒွါ ဒီလူယ် ဒီ အီ။

22 ဂေ ဒူအီ အီ ပွိုန် ပီ မွင့်ကာရာ ဒွါ ဇဝ်ဖြာ၊ ဂေ မိုဝ်း ခါဂုန် ခဲင် မိူင် ပီ ဒွါ ဇဝ်ဖြာ ဆေဆေ။ ဂေ ဒူအီ ပီ အေး ပီ ဒိူင် ဇဝ်ဖြာ၊ ဂေ ယီ လုဝ် ခမ် ဒုက်။ ခုဝ်၊ ဇဝ်ဖြာ ဒီ ဝဲန် ဂေ။

23 ဇဝ်ဖြာ ဘျုဝ် ဒီ ယဲတ့် ဒူအီ။ အာဆေ ဘူင် အီ လဝ့် နဝ်း ဇဝ်ဖြာ၊ အန် ပွိုန် ဒီ ကွယ် ဆီချာ။

24 အန် ပီ ဘော ဒီပ့လာတ်၊ အန် ယီ တူ ကေး။ ခုဝ်၊ ဇဝ်ဖြာ ဒီ ပါ အန်။

25 ဆိန့် ဒေါ နှိုမ် ကော ဇမ် ပန် ကတ် အုဝ် ဒေါ တီ နီ၊ အုဝ် တူ ဒွိုမ် ယိုဝ် ဇဝ်ဖြာ ဘ့လေး ဝဲန် ဒူအီ မွှိုမ်။ အုဝ် မိူဝ် တူ ယိုဝ် လှုက်လှာန် အန် လုဝ် မှာန့် ဒီ ဟူမ် ဒီ အီ ဟဝ်။

26 ဒူအီ မွှိုမ် ဇိုဝ် တီ၊ အန် နပ် ဒီ ဒွါ အီ ကာရဝ်း ဒီ အန်၊ ဘော ဒွါ ဒီလူယ် ဒီ အီ။ ဘော လှုက်လှာန် အန် ပွိုန် ဒီ မွင့်ကာရာ ဒွါ ဒီ အီ။

27 တဲး ဘေ ဝဲန် အီ တူ မွှိုမ်၊ ဝီ ဘူင် နာ မွှိုမ်။ ဆေ ဘေ ဘူင် ပါယ် တီ၊ လှုက်လှာန် ဘေ ဒီ ပွိုန် ဒီ ကွယ် ဒါခိုယ် ဆေဆေ ခဲင် မိူင် ပီ ဒွါ ဇဝ်ဖြာ။

28 ခုဝ်၊ ဇဝ်ဖြာ အိုင် ဒီ ဘူင် နာ ဘွတ် နာ မွှိုမ်။ အန် ဘော ရွက့် ကာဝေ ဂေ၊ တူ ဘ့လေး တူ ဝဲန် ဂေ ဒေါ မှဝ်။ အန် ဘော ရဲ ဘော ဂွင့် ဂေ ဆေဆေ။ လှုက်လှာန် ဂေ ဒူအီ မိူက်၊ အန် ယီ ဝဲန်။

29 ဂေ ဒူအီ အီ မိုဝ်း နဝ်း ဆိူဝ်၊ ဂေ ဒီ ပွိုန် ခါဂုန် ပီ ဒွါ ဇဝ်ဖြာ ဒီ ဂေ။ ဂေ ဒီ ဘော ကွယ် ဒီ တီ ဆေဆေ။

30 ဒူအီ အီ ဘူင် နာ မှာန်၊ အန် ကာလာင် ဂြုဝ်း အီ မိုဝ်း အာငျာန်။ ဂြုဝ်း အီ လေး ခဲင် မူတ့် အန်၊ န့ ဘော ကာရမ်၊ တူ ရွက့် တူ ဇွင့် အာဆေ။

31 ဂြုဝ်း ဇဝ်ဖြာ ဘော ကွယ် ခဲင် နဝ်း အန်။ အန် ဘော ဘူင် မာဆေ၊ အန် တူ ကာလိုပ်။

32 ဂေ ဒူအီ ဟာယ် ယီ ဘ်ု ဒီ ငဝ်း ဂေ ဒူအီ ဘွတ်။

33 ဇဝ်ဖြာ ယီ တူ အာပ် ဒူအီ ဘွတ် တီ ဒီ ဂေ။ အန် တူ တဲး ဂေ ဒမ် မှာပ် ဒီ ဂေ ဒူအီ ဘွတ် ဒေါ ဆုင်ဖျာတ် အန် အာမူ ဂေ။

34 တဲး ဘေ နှဝ့် န့ဒဝ့် ဇဝ်ဖြာ ဘော ဘူင် ပီ အိုင် အန်။ အန် ဒီ မျုက် ဘေ၊ တဲး ဘေ ပွိုန် ဒီ ကွယ် ခဲင် မိူင် ပီ ဒွါ ဇဝ်ဖြာ။ ဘေ ဒီ ဘော ယိုဝ် ဂေ ဒူအီ ဟာယ် လိုဝ် စှိုမ်။

35 အုဝ် ဟဲ့ ဒွိုမ် ယိုဝ် ဂေ ဒူအီ ဟာယ် အီ ဟဲ့ ပီခိုက် နဝ်း ဂေ။ ဂေ ဟဲ့ ပီစာ နဝ်း ဂေ တဲး န့ ပီ ဟေ အာရိတ် တာင် အီ ကွယ် ဒီ နွန် လေဘာနုန်။^a

36 ဝါယ် တီ၊ ဒေါ ဝီ တး ဝဝ့် အုဝ်၊ အာဝ် ဟူ မိုဝ်း။ အုဝ် ဝီ ဟြေတ့် ဂေ မိူဝ်၊ အာဝ် ဟူ ယိုဝ်။

37 တဲး ဘေ ဘ်ု ဒီ ယွတ် ဂေ ဒူအီ အီ ဆီချာ ဘော ဒူအီ အီ မိုဝ်း နဝ်း ဆိူဝ်။ ဂေ ဒီ မိုဝ်း လှုက်လှာန် အီ တဲး ခြိုဝ် ဂေ ကွယ် ဆေဆေ။

38 လှုက်လှာန် ဂေ အီ ဘူင် နာ စီစိဝ်၊ ဂေ ယီ စှိုမ်။

39 န့ မုး ဇဝ်ဖြာ အီ နပ် ဒီ ချွတ် ဒူအီ မွှိုမ်။ ဒေါ ဇမ် ဂေ ဒုက်၊ ဂေ ဒီ ဘိုင် အန် ဇဝ်။

40 ဇဝ်ဖြာ ဘော စွယ် ဂေ၊ တဲး ဂေ လွတ် ဒီ ဒူအီ ဟာယ်။ ကူပ် ဘိုင် ဂေ ဒီ အန်၊ အန် ဇဝ် ဘော ချွတ် ဂေ။