1 ဆေ ဒူအီ ဟာယ် ဘူင် မှာပ်၊ န့ တဲး အန် ကာဖာ ခဲင် နဝ်း တဝ်း၊ “အာဝ် မိုဝ်း ဒီ လုဝ် ယုဝ် ဇဝ်ဖြာ။”

2 အန် ဘော နပ် ဒီ ပီဖုင် အန် ဘော ထာင်၊ အာဝ် မိုဝ်း အာဆေ အီ ယိုဝ် မှာပ် အန် တီ၊ အာဝ် မိုဝ်း အာဆေ အီ တဝ်း၊ န့ မွှိုမ် ကာအိး။

3 အန် ဘော ကာလာင် ဂြုဝ်း ဟာယ်၊ ဂြုဝ်း ကာလုဝ်။ အန် တူ မိုဝ်း အာငျာန်၊ တူ နပ် ဒီ ဘူင် နာ မှာန် နာ မွှိုမ်။

4 အန် ဘော ကွယ် ဒူင် အိတ် အန် ဇေန့်ဇာ မီ နာ တူ မွှိုမ် ဆေဆေ။ ခဲ့ ပီ ဘူင် အန်၊ အာဝ် မိုဝ်း အီ ဘွတ် အီ မွှိုမ်။ အန် တူ နပ် ဒီ ကာအိး နာ တူ မွှိုမ်။

5 အိုယ် မဲ ဇဝ်ဖြာ၊ မဲ နပ် ဒီ ရွက့် ကာဝေ ယေ ဆေဆေ။ မဲ ရွက့် တူတ့် ဒွန် မျုဝ် အီ ကွယ် ဒဲင် ကာဒါယ် ကော ဇမ် ဂါင်ဟြာဝ်။ မဲ ဘော ရွက့် ကာဝေ ယေ ဆေဆေ၊ တူ ပိဝ် ဒေါ မှဝ်။

6 မဲ ဇဝ် နပ် ဒီ ဘူင် နာ မှာန် နာ မွှိုမ် ဆေဆေ၊ တူ ဘျွင် ဒေါ မှဝ်။ န့ ဘော ပီ နွန် တာင် ပဲ့ ဟဲ့ ဘူင် မဲ။ ပီ ဆုင်ဖျာတ် အုန် မဲ ဇဝ် ဟဲ့ လိုက် ကာဆဝ်။ န့ ဘော ပီ ကာဒမ် အိုမ် နမ်မုက်ဆာရာ။ မဲ ဇဝ် ယွတ် မဲန် ဘော ဒူအီ ဘော ဒုဝ် ဆတ်ဒါဝါ။

7 ပီ ရွက့် ကာဝေ ဇဝ်ဖြာ ဒီ ယေ၊ န့ မွှိုမ် ကာဆဝ် ပီ ကြုဝ် အီ ဘွတ်၊ အီ ငဝ်း တာင်။ ဘော ဂေ ဒူအီ ဘောကာဂ့လျီတ် ဒီ ဘိုင် ပွုန် မဲ ဇဝ်ဖြာ။ ဂေ ပီ ဂွန် မာဆိမ် အီ ကွယ် ခြိုမ် ဖျီင် မာ အန်။

8 ပီ ဒွါ မဲ ဇဝ်ဖြာ ဒီ ယေ ဘဲန် မျုဝ် ဘဲန် မျုဝ်၊ န့ ပီ၊ ယေ ပွိုန် ဒီ ဟူမ် ဘ့လွယ် တာင် ခဲင် ကာင် မဲ ဆေဆေ။ ဘော နဝ်း ဘျုဝ် ဒါခိုယ် ပီ ဒွါ မဲ ဒီ ယေ၊ န့ ပီ၊ မဲ တဲး ယေ ဒျီင် အိုမ် ဂျီတ် ဒီ ဘ့လဲင် အိုမ် အီ တူ နပ် ဒီ ဟိတ်။

9 ခုဝ်၊ မဲ ဇဝ် မုး အီ ဒွါ အာဆာက် ဒီ ဒူအီ။ ယေ ဘော ပွိုန် ဒီ ကွယ် ခဲင် ဘ့လာင်၊ ကူပ် ဘ့လာင် ပီ ဒွါ မဲ ဇဝ်။

10 အုဝ် မှာန့်၊ တဲး မဲ ဇဝ်ဖြာ ရွက့် ဆေဆေ ဂေ အီ နပ် မဲ ဇဝ်။ တဲး မဲ ဇဝ် ချွတ် ဂေ ဆေဆေ အီ မိုဝ်း နဝ်း ဆိူဝ် နဝ်း မှာန်။

11 အုဝ် ဘော မှာန့်၊ ကွဲ့ တဲး ဂေ ဒူအီ ပီခိုက် ပွိုန် ဒီ အိုပ် အုဝ် ပီ ဂေ ညဲတ့် အုဝ်။ ကွဲ့ တဲး ဂေ ဒူအီ မိူက် ပွိုန် ဒီ ဆုတ့် တဝ် အုဝ်။

12 တဲး ဘေ ယွတ် ဂေ ဒူအီ မိူက် ဂေ ဒီ ကေး ယမ် တူတ့်။ ဂေ မိူဝ် တူ ပွိုန် ဒီ ဝီ ယိတ့် ဒေါ မှဝ်။