1 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ဘူင် ကာဘး ဒီ ဂေ အီ ဘူင် ကာဘး ဒီ အုဝ်။ တဲး မဲ ဇဝ် ဝီ ကာဂုဝ်း ဒီ ဂေ အီ ကာဂုဝ်း ဒီ အုဝ်။

2 အုဝ် မှာန့်၊ တဲး မဲ ဇဝ် တာ ခြိုင် ကာဂုဝ်း၊ ဟာဝ် ကာဂုဝ်း ဒါင် အုဝ်။

3 တဲး မဲ ဇဝ် ဒိုဝ်း ဘ့လာ လျီး မဲ၊ ငှာ ဒီ ဂေ၊ ရဲ ဂေ အီ ခုင်ခြး အုဝ်။ တဲး မဲ ဇဝ် ဝီ ကာလာင် ဒီ နဝ်း အုဝ် တဝ်း၊ “အုဝ် ဇဝ်ဖြာ အီ ချွတ် မဲ၊” တဲး အုဝ် နပ် ဆီချာ လွင် အန် တီ။

4 ဂေ အီ ဟြေတ့် ဒီ ငဝ်း အုဝ်၊ တဲး ဂေ ဝီ စှိုမ် ဆာရေ၊ တဲး ဂေ ကော ဝီ ဆာယ် အီ။ ဂေ အီ ဘူင် နာ တူ မွှိုမ် ဒီ အုဝ်၊ တဲး ဂေ ဝီ ကာဒုး ဝိဝ် ဒုက်၊ တဲး ပီ ခြာမ် ဂေ စှိုမ်။

5 တဲး ဂေ ဟြာယ် ပီ ဒျီပ် ငှုဝ် ပီ ဘုတ် ခုန်။ တဲး အာမူ အာမာတ် ဇဝ်ဖြာ ဝီ ညွန် တဝ် ဂေ။

6 ဒေါ တဝ် ဂေ ဒီ အာမူ အာမာတ် ဇဝ်ဖြာ တီ၊ တဲး န့ အပ် ဝွင့်၊ တဲး န့တေန့် ဂေ ဘော ဂ့လျီတ်။

7 ခုဝ်၊ ပီ ဘူင် ဂေ အာဝ် မိုဝ်း ဒီခုဝ်။ ဂေ ဟဲ့ ဒိန့် ယွတ့် တဲး အုဝ် ခြေ။ ဂေ ဘော ဂိုဝ်း ကာဒဝ် တဲး အုဝ် စုဝ်း ယမ်။

8 ဒူအီ ဇိုဝ် တီ၊ တဲး ဂေ စှိုမ် ဒေါ တူ နမ်လှုဝ်း ဂေ။ တဲး ဂေ ဝီ ခြေ ယွတ့် ပီ ဒိန့် ဂေ။ တဲး ဂေ ဝီ စုဝ်း စှိုမ် ခဲင် ကာဒဝ်။

9 ဆေ န့ ပါယ် တီ၊ နဝ်း အုဝ် ဒီ ဘျုဝ် ဒါခိုယ် ကူပ် ဇဝ်ဖြာ။ အန် ဇဝ် ဟဲ့ ချွတ် အုဝ်၊ တဲး အုဝ် ဘျုဝ် ဒါခိုယ်။

10 ခဲင် နဝ်း ခဲင် ဖွိုမ် အုဝ် တဝ်း၊ “အိုယ် ဇဝ်ဖြာ၊ အာဝ် မိုဝ်း အာဆေ အီ ပွိုန် စွယ် ပီ မဲ ဇဝ်ဖြာ။ မဲ မုး ဇဝ်ဖြာ အီ စွယ် ဒူအီ အီ တူ မိုဝ်း ပ့လူမ်၊ တဲး ဂေ လွတ် ဒီ ရန်ဆူ ဂေ အီ မိုဝ်း ပ့လူမ် မိုဝ်း ဟဲန့် လွှိုမ် ဂေ။ မဲ မုး ဇဝ်ဖြာ အီ ပွိုန် စွယ် ဂေ ဒူအီ အီ ခမ် ဒုက်၊ တဲး ဂေ လွတ် တ ဒူအီ အီ ခါနှာပ် ဂေ။”

11 ဂေ ဒူအီ ဟာယ် ဟဲ့ တး ကာလာင် ဂြုဝ်း တူ မှာန် လွင် အုဝ်။ ဂေ ဘော ဒီမွှတ် ပီ တူ နပ် အုဝ်။

12 ဂေ ဘူင် အီ တူ မွှိုမ်၊ ဝီ ဝျီ့ အီ မွှိုမ် ပီ ဘူင် အုဝ်။ ဂေ ဘူင် တဲး နဝ်း အုဝ် ကာပျာတ့် လိုဝ်။

13 ဒေါ ဒွိုမ် မိုဝ်း ဂေ ဆဝ်၊ အုဝ် ဟဲ့ ယိူန် ပီ ဒီ ဟူမ်၊ စှိုပ် ခြိုင် စာန် ဒီ အုဝ်။ အုဝ် ဘော မုတ် ဂိုပ် တူ ဂြုဝ်း၊ တူ ရ်ု၊ ယီ ဆာခိုဝ် ခဲင် နဝ်း အုဝ်။

14 အုဝ် ဘူင် ပါယ် တီ၊ အုဝ် မာတ် ဂေ မုး ဂိုက် ဘော အီကတ် အုဝ်။ အုဝ် ဘော ပီ ဒူအီ အီ ဟဲ့ မိုဝ်း ဒုက် တာင်၊ အီ ဟဲ့ က့လိုဝ် ကူပ် ဟဲ့ ယမ် မာ အန်။

15 ဒေါ ဝီ ကေး အုဝ်၊ ဂေ ဘော ကွယ် ကာဇု ခူယ် ကာညး အုဝ်။ ဂေ ဘော ကာဖြူမ် ဒီ တး ကာဂုဝ်း ဒီ အုဝ်။ ဂေ ဒူအီ ပီ တူ နပ် အုဝ်၊ ဂေ ဘော အေး ကာဆဝ် အုဝ်၊ အေး အုဝ် ဆေဆေ။

16 ဂေ ဘော နပ် ဒီ ဘူင် ဟာဝ် ဇိုဝ် တီ၊ တူ နပ် ဒီ ပိုဝ်။ ဂေ ဘော ဇွင့် ဒီမမ် ဒီ အုဝ်။

17 အိုယ် မဲ ဇဝ်ဖြာ၊ န့ ဒီ လှေန့် ခဲ့ မှဝ်၊ မဲ ဇဝ် ကော ဒီ ချွတ် အုဝ်။း အုဝ် မှာန့်၊ တဲး မဲ ဇဝ် ချွတ် အုဝ်၊ ကွဲ့ တဲး အာဆာက် အုဝ် စှိုမ် ဒီ ဂေ အီ ဟာယ်၊ အီ ပီ မာခြင်ဆီ။

18 ပန် တီ အုဝ် ဒီ ဝီ ဒါင် ဂုင် ဂေဇူ ဒီ မဲ ဇဝ် ကာတဲ ဂေ ဒူအီ ကိူန် အီ တး ကာဇု။ အုဝ် ဒီ အိူပ် မျုက် မဲ ဇဝ် ကာတဲ ဂေ ဒူအီ ဘောကာဂ့လျီတ်။

19 အုဝ် မှာန့်၊ ကွဲ့ တဲး ဂေ ရန်ဆူ အုဝ် ပွိုန် ဒီ ခူယ် ကာညး အုဝ် ပီယေန့်။ ကွဲ့ တဲး ဂေ အီ ဇွင့် အုဝ် ဘော ပြာ ဒီ ကာအျီပ် ငါယ်၊ တူ မိုဝ်း ဒီခုဝ်။

20 ကူပ် တူ ဆီ ကာလဝ့် ဂေ ဒီ အီ၊ ဂေ ဘော ကာဖာ လွင် ပီ ဒီ ပါယ် ဒီ ကာလုဝ် ဒီ ဂေ အီ ကွယ် ဆီချာ၊ အီ ကွယ် နှိမ် ခဲင် ရဝ် ခဲင် ကာင်။

21 ဂေ ဘော ကာလာင် ဂြုဝ်း တာင် တဝ်း၊ “အေက်၊ အေက်၊ ယေ ဟဲ့ ဟွတ့် ယိုဝ် အန်။”

22 မဲ ဇဝ်ဖြာ၊ မဲ ဟဲ့ ယိုဝ် တူတ့် လွင် အန် တီ။ အုဝ် မှာန့်၊ တဲး မဲ ကွယ် ရိုမ် ဒူပ် အုဝ် ဆေဆေ။

23 အိုယ် ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ အုဝ် မှာန့်၊ ကွဲ့ တဲး မဲ ဇဝ် ကွယ် နှိမ်၊ တဲး မဲ ဇဝ် စွယ် အုဝ်၊ တဲး မဲ ဆုင်ဖျာတ် နာ မှာန် ဒီ အုဝ်။

24 မဲ ဇဝ်ဖြာ ပီ ကြိုပ် အုဝ်၊ အုဝ် မှာန့်၊ တဲး မဲ ဘူင် ဒီ အုဝ် ခဲ့ ကာဒါန် နဝ်း မှာန် နဝ်း မွှိုမ် မဲ။ ကွဲ့ တဲး ဂေ ပွိုန် ဒီ ခူယ် ကာညး အုဝ်။

25 ကွဲ့ တဲး ဂေ ပွိုန် ဒီ ဇေန့်ဇာ ခဲင် နဝ်း ဂေ တဝ်း၊ “အေက်၊ ယေ ဟဲ့ ဟွတ့် ဘူင်၊ တဲး အန် စှိုမ်၊ တဲး အန် လိုဝ်။” ကွဲ့ တဲး ဂေ ပွိုန် ဒီ တဝ်း၊ “ယေ ဟဲ့ ဟွတ့် ဝဲန် အန်။”

26 ဂေ အီ ခူယ် အီ ကာညး အုဝ် တီ၊ တဲး ဂေ ဝီ ကာဝှ်ု ကာဝျှီန် ဝီ မွှိုမ် ဆာယ်။ ဂေ အီ ပီခိုက် ဂေ တဝ်း၊ ဂေ ဟဲ့ မွှိုမ် လွှိုမ် အုဝ်၊ တဲး ဂေ ဝီ စှိုမ် ဆာရေ ဘော ဆာယ် အီ။

27 ဂေ အီ ဝုဝ် အုဝ်၊ အီ ဆီ တဲး အုဝ် ကွယ် ဒါခိုယ်၊ တဲး ဂေ ခူယ် တဝ်း မှုဝ် ဒါခိုယ် ဆေဆေ။ တဲး ဂေ တဝ်း၊ “ဇဝ်ဖြာ ဟဲ့ မိုဝ်း ပွုန် တာင်။ ဆေ ဒဲစေန့် အန် ပွိုန် ဒီ ကွယ် ဒါခိုယ်၊ န့ လဝ့် နဝ်း အန်။”

28 ဟဲ့ ဟွတ့် ပန် တီ အုဝ် ဒီ ဘော ကာလာင် လွင် နဝ်း ဆိူဝ် နဝ်း မှာန် မဲ ဇဝ်။ အုဝ် ဒီ ဘော အိူပ် မျုက် မဲ ဇဝ် ဒွင် ဝန် ဒွင် ခိူန်။